Cynthia Erivo yanenze abavuga nabi ubucuti afitanye na Ariana Grande

Mu kiganiro yagiranye n’ikinyamakuru The Guardian cyasohotse ku wa 27 Ukwakira 2026, Erivo yavuze ko hari abantu batishimiye kubona abagore babiri bafitanye ubucuti bukomeye, bagaragazanya amarangamutima mu ruhame.

Yagize ati: “Byari bitangaje kubona abantu benshi bicaye mu ngo zabo bakigira abahanga mu by’imitekerereze y’abantu. Hari ikintu kidasanzwe cyo kutishimira ko abagore babiri bashobora kuba inshuti by’ukuri.”

Erivo na Grande bakinnye ari Elphaba na Glinda muri filime Wicked yasohotse muri 2024 n’iyakomeje inkuru yayo, Wicked: For Good, yasohotse muri 2025. Muri izi filime, aba bakinnyi bagaragaza abakobwa babiri biganaga muri kaminuza ya Shiz, ubucuti bwabo bukabafasha kwimenya no gukura mu mitekerereze.

Ubucuti bwabo bwakomeje kuvugisha benshi mu gihe bazengurukaga ibihugu bitandukanye mu bikorwa byo kwamamaza izi filime. Hari abibazaga impamvu bahorana, bakarira cyangwa bagaseka bari kumwe, abandi bagashidikanya ku kuba amarangamutima bagaragazaga yari ay’ukuri.

Erivo yavuze ko ibyo byamushyize mu bihe bigoye, kuko uko bari kwitwara kose hari abari kubinenga.

Yagize ati: “Abantu baribazaga bati ‘Kuki ari inshuti? Kuki bafitanye isano ikomeye? Hagomba kuba hari ikibazo kuri bo. Kuki bagaragaza amarangamutima? Kuki barira? Kuki baseka? Kuki bagaragaza ko bafite ubuzima n’amarangamutima?’”

Yasobanuye ko uko abantu babyakiriye byari bifite impande ebyiri, kuko iyo baza kugaragara nk’abatagira amarangamutima, na bwo hari abari kubanenga.

Ati: “Iyo tuba twaragaragaye nk’abantu badafite amarangamutima mu maso, na bwo hari ikindi bari kuvuga.”

Yavuze ku kurinda Ariana Grande ko hagira umufana umwegereye

Erivo yanagarutse ku byabaye ku wa 13 Ugushyingo 2025 muri Singapore, ubwo umugabo yirukankaga agana kuri Ariana Grande mu gihe bari mu birori byo kwerekana filime Wicked, akamushyira ukuboko ku rutugu. Erivo yahise yinjira hagati yabo kugira ngo amurinde.

Yavuze ko icyo gihe cyamuteye ubwoba, kuko nta wundi muntu wabonaga uri kugira icyo akora ngo ahagarike uwo mugabo.

Ati: “Nta wundi muntu wagiraga icyo akora. Twari turi ahantu hafunguye, abantu bose bashoboraga kutubona. Igitekerezo cya mbere cyaje mu mutwe wanjye ni ukugira nti: ‘Uyu mugabo mumukureho nonaha.’”

Icyakora, Erivo ntiyishimiye uburyo bamwe bagaragaje ko icyo yakoze cyari ukwitwara nk’umurinzi wa Grande, aho kukibona nk’igikorwa gisanzwe umuntu yakorera inshuti ye.

Yavuze ko yatunguwe no kubona abantu bafata igikorwa cy’ubumuntu nk’aho cyari gishingiye ku isura ye cyangwa ku kuba afite inshingano zo kurinda Grande.

Yagize ati: “Natekereje nti: ‘Ese kubera ko nsa ntya, ni yo mpamvu ushobora kumbwira utyo ku kintu nari gukorera inshuti yanjye, kandi nkaba nizeye ko na yo yari kubinkorera?’ Ariko ngo ngomba kuba ndi umurinzi we.”

Umuyobozi wa Wicked yashimye ubucuti bwabo

Umuyobozi wa filime Wicked, Jon M. Chu, na we yigeze kuvuga ko ubucuti bwa Erivo na Grande bwari kimwe mu bintu byiza cyane yishimiye kubona bikura mu gihe cyo gutunganya izi filime.

Yavuze ko bombi ari abahanzi bafite impano ikomeye, kandi ko bari kuba bahanganye cyangwa batumvikana, ariko bagahitamo gushyira inyungu za filime imbere y’izabo bwite.

Chu yashimangiye ko bombi bashoboye kwinjira neza mu nshingano zabo za Elphaba na Glinda, bakabasha no kwifashisha izo nshingano mu kwimenya.

Nyuma yo gusohoka kwa filime, ubucuti bwabo bwarakomeje. Mu Ugushyingo 2025, Erivo na Grande bagaragaje ko bakoze tatouage zihuje ku biganza byabo, zanditseho amagambo “For Good”, ajyanye n’inkuru ya Wicked.

Kugeza ubu, Cynthia Erivo akomeje ibikorwa bye mu mwuga wo gukina filime. Aherutse kugaragara muri Prima Facie, filime y’ikinamico ivuga ku mategeko yerekanwe bwa mbere mu iserukiramuco rya filime rya Toronto muri Nzeri 2026, nubwo itariki izasohokeraho muri Leta Zunze Ubumwe za Amerika itari yatangazwa.