Byasabye kuyihindurira izina! Rodges Films yagaragaje imvano ya filime ‘Intama n’ikirura’ agiye gushyira ku isoko

Uyu mushinga watangiye witwa “The Survivor of Illusion”, ariko izina riza guhindurwa mu rwego rwo kwiyegereza abareba filime b’Abanyarwanda, ndetse no guhuza izina n’inkuru ikubiyemo kuko ikinwa mu Kinyarwanda.

‎Asobanura ati “Twahisemo izina ‘Intama n’ikirura’ kuko rifite igisobanuro gikomeye kuri filime. Ni inkuru y’urukundo rufite ibanga rikomeye, hagati ya Linda na Ngenzi. Linda yizera Ngenzi nk’intama, ariko atazi ko ari we wamwiciye se — ni ikirura kiyoberanya,”

‎Filime ikubiyemo ubuzima bwo mu buzima busanzwe, amabanga y’urukundo, igihishwe inyuma y’amarangamutima, no guhangana kw’ukuri n’ikinyoma. Ni umushinga uteguye mu buryo bugezweho, wubakitse ku bitekerezo birambye kandi bishobora kuvugisha benshi.

‎Rodges avuga ko yakuze akunda kureba filime, ariko buhoro buhoro abyinjiramo nk’umwuga. Ibyo byatumye ashinga Rodgesfilm, sosiyete ifite intego yo kuzamura sinema nyarwanda no gufasha abahanzi bafite impano kubona urubuga n’ubufasha bwisumbuyeho.

‎Ati “Nakoze filime ya mbere ntekereza ku nzozi. Ariko uko nagendaga niga byinshi, nasanze sinema ari business, atari hobby gusa. Natangiye kwihugura mu by’imenyekanisha n’ubucuruzi bwa filime (film marketing), kuko nziko kugira ngo igihangano kigere kure, bisaba byinshi birenze kurema gusa,”

‎Ni muri urwo rwego, Rodges avuga ko Rodgesfilm igiye kuba urubuga rutanga amahirwe ku rubyiruko, ikaba n’umuyoboro wo kugera ku isoko ryo mu Rwanda no hanze yarwo.

Agira ati: “Sinema yacu iracyafite imbogamizi mu isoko no mu musaruro wayo. Rodgesfilm izanye igisubizo cyo gushyira imbaraga mu bucuruzi bwa filime, kugira ngo abahanzi babone amafaranga, ariko n’abafana babone ibihangano bikozwe neza kandi bifite ireme.”

‎Filime “Intama n’ikirura” izaba igizwe n’ibice icyenda (9). Ibyo bice bitatu bya mbere bizasohoka ku buntu, mu rwego rwo gukangurira abantu kuyimenya no kuyikurikirana. Ibisigaye bitandatu bizajya bigurwa kuri 1000 Frw buri kimwe, bikazajya biboneka kuri shene ya YouTube channel yitwa Rodgesfilm n’ubundi buryo bwateguwe n’iyo studio.

‎Ni uburyo bwo gutoza abantu kugura ibihangano, kugira ngo sinema nyarwanda ivemo umuco w’imishinga isabiriza, ahubwo ibe umwuga urambye.

‎Rodgesfilm kandi iteganya gukomeza gukora izindi filime, ama-series ndetse n’inkuru mpamo zishingiye ku buzima bw’Abanyarwanda. Yifuza ko ibyo byose bizakorwa mu buryo bw’umwuga, bihanga amasoko mashya ku bahanzi n’abanyempano batandukanye.

‎Rodges asoza avuga ko Abanyarwanda bakwiye kumva ko sinema atari iy’abandi, ahubwo ari iyabo, ko bakeneye kuyishyigikira, bagakurikira ibikorwa bya studio ye kugira ngo byubake uruganda rwa filime rudashingiye ku marangamutima gusa, ahubwo runatanga akazi, umusaruro n’icyubahiro nk’ibindi byiciro byose by’ubuhanzi.

‎Rodges ati “Mfite byinshi byiza byubaka sinema nyarwanda n’Afurika muri rusange. Abanyarwanda nindamuka mbabonye inyuma yanjye, dushobora guhindura byinshi mu gihe gito,”

Urukundo rwabo rwari nk’urugamba hagati y’intama n’ikirura… Filime nshya Intama n’ikirura igiye guhindura isura ya sinema nyarwanda

Hari igihe uwo wizera ari we urimbura byose… Linda ntiyabashije kubona ikirura mu isura y’intama ya Ngenzi bakinana muri iyi filime izajya ku isoko tariki 29 Kanama 2025