Duhereye muri Libya ku wa Gatanu ikipe ya Al Ahli Tripoli ikinamo Manzi Thierry na Bizimana Djihad yanganyije na Olympic Azzawiya SC ibitego 2-2 mu mikino ya kamparamaka ya shampiyona.
Muri uyu mukino ntabwo Aba Banyarwanda bose bigeze ntabwo bigeze bakoreshwa dore ko batari no ku ntebe y'abasimbura.
Kugeza ubu Al Ahli Tripoli itsinda irimo rya B iri ku mwanya wa mbere ikaba izasubira mu kibuga ikina na Abu Salim mu gikombe cy'igihugu ku wa Gatatu.
Ku Cyumweru muri Afurika y'Epfo kuri Mabhida Stadium mu mujyi wa Durban ni bwo ikipe ya Kaizer Chiefs ikinamo Ntwari Fiacre yakinnye na Orlando Pirates ku mukino wa nyuma w'irushanwa rya Nedbank Cup.
Nyuma y'uko Kaizer Chiefs yari yitwaye neza isezerera Mamelodi Sundowns muri 1/2 yaje no kwitwara neza ku mukino wa nyuma itsinda Orlando Pirates ibitego 2-1.
Ni ibitego bya Gaston Sirino ku munota wa 10 na Yusuf Maart ku wa 80 mu gihe kimwe cya Orlando Pirates cyo cyatsinzwe na Evidence Makgopa ku munota wa 17.
Ntwari Fiacre, kuri uyu mukino yari ku ntebe y'abasimbura ariko iki ni igikombe cya mbere atwaranye na Kaizer Chiefs nyuma y'uko ayigezemo mu mpeshyi y'umwaka ushize atanzweho arenga miliyoni 400 Frw.
Iyi kipe yo yaherukaga gutwara igikombe kimwe mu bikomeye bikinirwa muri Afurika y’Epfo muri 2015 ubwo yatwaraga icya Shampiyona.
Nubwo iyi kipe yatwaye iki gikombe ariko ntabwo muri shampiyona ihagaze neza kuko kugeza ubu iri ku mwanya wa 9 ikaba izasubira mu kibuga ikina na Sekhukhune United F.C ku wa Gatandatu.
Muri shampiyona y'icyiciro cya mbere muri Tunisia,ku wa Gatandatu Stade de Tunisien ikinamo Mugisha Bonheur yatsinze Tataouine ibitego 2-1 . Uyu mukinnyi w'Amavubi yabanje mu kibuga ndetse niwe watsinze igitego cya 2 kuri penariti.
Muri shampiyona Stade de Tunisien iri ku mwanya wa 6 ikaba izasubira mu kibuga ikina na Soliman ku wa Kane.
Muri iyi shampiyona kandi ku munsi w'ejo Olympic de Beja ikinamo Ishimwe Anicet yanyagiwe na ES Tunis ibitego 5-0. Uyu mukinnyi w'Amavubi yari ku ntebe y'abasimbura ariko ntabwo yigeze akoreshwa.
Kugeza ubu Olympic de Beja iri ku mwanya wa 10 ku rutonde rwa shampiyona ikaba izasubira mu kibuga ikina na Bizertin ku wa Gatanu.
Ku munsi w'ejo mu Misiri Zed FC ikinamo Rafael York yaguye miswi na Modern Sport 1-1. Uyu mukinnyi w'Umunyarwanda ntabwo yigeze akoreshwa kuri uyu mukino dore ko atari no ku ntebe y'abasimbura.
Zed FC iri ku mwanya wa mbere mu makipe ari guhatanira kutamanuka muri shampiyona y'icyiciro cya kabiri mu Misiri ikaba izasubira mu kibuga ikina na ENPPI tariki ya 25 z'uku kwezi.
Muri shampiyona y'icyiciro cya mbere muri Azerbaijani, ku wa Gatandatu FC Zira ikinamo Mutsinzi Ange yatsinze Sabail ikinamo Nshuti Innocent igitego 1-0.
Ku ruhande rwa FC Zira yabanje mu kibuga ndetse nta nubwo yasimbujwe naho ku ruhande rwa Sabail ho ntabwo Nshuti Innocent yigeze akoreshwa ariko yari ku ntebe y'abasimbura.
Kugeza ubu FC Zira iri ku mwanya wa 2 ku rutonde rwa shampiyona ikaba izasubira mu kibuga ikina na Sabah FC ku wa Gatandatu mu gihe Sabail yo iri ku mwanya wa nyuma ku rutonde rwa shampiyona ikaba izasubira mu kibuga ikina na Neftici ku wa Gatanu.
Muri shampiyona y'icyiciro cya mbere mu Bubiligi,ku wa Gatandatu ikipe ya Beerschot yari yaratiye Hakim Sahabo nibwo yakinaga umukino wayo wa nyuma muri iyi shampiyona dore ko yamaze kumanuka mu cyiciro cya kabiri. Yatsinze Cercle Brugge ibitego 4-2. Uyu mukinnyi w'Amavubi yari yabanje mu kibuga gusa aza gusimbuzwa ku munota wa 70.
Ku wa Gatandatu muri shampiyona y'icyiciro cya 3 mu Busuwisi ikipe ya SR Delémont ikinamo Johan Marvin Kury yatsinzwe na Baden igitego 1-0. Uyu mukinnyi w'Amavubi ntabwo yari yabanje mu kibuga ariko yinjiyemo asimbuye mu gice cya kabiri.
Kugeza ubu Delémont iri ku mwanya wa nyuma ku rutonde rwa shampiyona ikaba izasubira mu kibuga ikina na FC Breitenrain Bern ku Cyumweru.
Muri shampiyona y'icyiciro cya kabiri muri Leta zunze ubumwe z'Amerika, ku wa Gatandatu ikipe ya Rhode Island ikinamo Kwizera Jojea yanganyije na Monterey Bay FC igitego 1-1.
Uyu mukinnyi w'Amavubi yari yabanje mu kibuga aho ari nawe wagize amanota menshi ndetse nta nubwo yigeze asimbuzwa.
Kugeza ubu Rhode Island iri ku mwanya wa 10 ku rutonde rwa shampiyona ikaba izasubira mu kibuga ikina na Birmingham Legion ku wa Gatanu.
Mugisha Bonheur yatsinze igitego cye cya 5 kuva ageze muri Stade de Tunisien
Mugisha Bonheur akomeje gufasha ikipe ye ya Stade de Tunisien