Ibi birori bizwi nka “Baby Shower” byabaye
ku Cyumweru, tariki ya 25 Ukwakira 2026, mu gihe Nishimwe Naomie n’umugabo we,
Michael Tesfay, bitegura kwakira umwana wabo w’imfura, witezwe kuba umuhungu.
Ibyaranze ibi birori si ukwitegura kwakira
umwana gusa, ahubwo ni n’uburyo byahurije hamwe abagore batandatu bafite aho
bahuriye n’amateka y’irushanwa rya Miss Rwanda.
Kubabona mu birori bimwe ni ibintu
bidasanzwe, by’umwihariko ku bakurikiranira hafi urugendo rw’iri rushanwa
n’abaryegukanye mu bihe bitandukanye.
Mu bitabiriye ibi birori harimo Mutesi
Aurore Kayibanda wabaye Miss Rwanda mu 2012, Mutesi Jolly wegukanye ikamba mu
2016, Iradukunda Liliane wabaye Nyampinga w’u Rwanda mu 2018 na Nimwiza Meghan
wegukanye iri kamba mu 2019.
Hari kandi Nshuti Divine Muheto wabaye Miss
Rwanda mu 2022, ndetse na Umuratwa Kate Anitha wabaye Nyampinga w’u Rwanda
uhagarariye igihugu muri Miss Supranational mu 2021.
Guhurira hamwe kw’aba bakobwa n’abagore
bagiye begukana amakamba mu bihe bitandukanye byahaye ibi birori umwihariko, kuko
byongeye kugaragaza ko umubano n’ubusabane bishobora gukomeza no hanze
y’irushanwa ryabahuje.
Ku ruhande rwa Naomie, ibi birori ni imwe
mu ntambwe yihariye mu rugendo rushya rw’ubuzima ari kwitegura gutangira
nk’umubyeyi. Ni umwanya wo gusangira ibyishimo n’abo akunda, mu gihe we
n’umugabo we bitegura inshingano nshya zo kurera umwana wabo wa mbere.
Nishimwe Naomie yegukanye ikamba rya Miss
Rwanda mu 2020, aba umwe mu bakobwa bagiye bagarukwaho mu rugendo rw’iri
rushanwa. Ubu, mu gihe ategereje kwibaruka, yakiriye inshuti n’abo bahuriye mu
rugendo rwa Nyampinga w’u Rwanda, basangiye ibyishimo byo kwitegura kwakira
umunyamuryango mushya.
Nishimwe Naomie wabaye Nyampinga w’u Rwanda mu 2020, yakorewe ibirori byo kwitegura kwibaruka imfura ye, byitabirwa n’aba Nyampinga batandatu barimo Mutesi Jolly, Nimwiza Meghan na Nshuti Divine Muheto
Mutesi Aurore Kayibanda mu birori bya Nishimwe Naomie
Nishimwe Naomie n’umugabo we Michael Tesfay bitegura kwibaruka imfura yabo y’umuhungu
Mu birori byo kubyishimira, Naomie yasangiye ibyishimo n’umuryango, inshuti ndetse na ba Nyampinga batandukanye begukanye amakamba ya Miss Rwanda mu bihe bitandukanye
Isimbi Model yitabiriye ibirori bya Nishimwe Naomie byo kwitegura kwibaruka umwana w'umuhungu