Iri tsinda ry’abashoramari rizwi nka 1892 Holdings ryari ryabanje kuvugwa ko ryaguze hafi kimwe cya gatatu cy’iyi kipe, ariko amakuru mashya avuga ko imigabane ryabonye ingana na 38%.
Ni nyuma y'uko bivuzwe ko iri tsinda rifite amahirwe yo kugura imigabane myinshi ikarigeza ku rwego rwo kuba nyir’ubwiganze muri Liverpool mu mezi 12 ari imbere nubwo kugeza ubu nta masezerano arihuza n’iyo gahunda ku buryo budasubirwaho.
Ku wa Gatanu, ni bwo FSG yatangaje ko yagiranye na 1892 Holdings “amasezerano ya burundu” yo kugurisha imigabane mike ariko ifite uruhare rukomeye mu mikorere y’ikipe.
1892 Holdings yitiriwe umwaka Liverpool yashinzwe, iyobowe n’umushoramari w’Umwongereza ufite inkomoko mu Buhinde, Amit Bhatia. Muri iri tsinda harimo Jeff Bezos na Eduardo Saverin, umwe mu bashinze Facebook.
Bhatia azahabwa n'umwanya w'ubuyobozi muri Liverpool, ndetse yinjire mu Nama y’Ubutegetsi yaguwe y’iyi kipe, mu gihe hagitegerejwe kwemezwa kw’amasezerano n’inzego zibishinzwe.
Uyu mushoramari akaba n'umukwe wa Lakshmi Mittal, umwe mu bakire bakomeye mu Buhinde. Bhatia yamaze imyaka 18 ari umuyobozi ndetse n’umwe mu bafite imigabane muri Queens Park Rangers, mbere y’uko arekura imigabane ye muri iyi kipe mu kwezi gushize.
Amakuru avuga ko aya masezerano yatumye agaciro ka Liverpool kagereranywa hagati ya Miliyari 5 na Miliyari 6 z'ama pound, bikomeza kuyigira kipe ikomeje kuba imwe mu zifite agaciro gakomeye ku isi.