Ni irushanwa ryabereye mu Karere ka Huye kuva kuwa Gatanu taliki ya 8 kugeza ku Cyumweru taliki ya 10 Kanama 2025. Harushanijwe amakipe ya Karate mu Rwanda mu byiciro bibiri ari byo Kumite (Kurwana) no muri Kata (Kwiyerekana) mu bagabo no mu bagore.
Hanarushanijwe kandi abakinnyi ku giti cyabo muri ibyo byiciro aho nko muri Kumite (Kurwana) barushanijwe hashingiwe ku biro nkuko biteganywa n’amategeko.
Mu cyiciro cyo kurushanwa ku bakinnyi ku giti cyabo muri Kata (kwiyerekana) mu bagabo, abitwaye neza ni Usengimana Omar ukinira The Great Warriors Karate Academy yo mu Rwanda, John Omondi ukinira JKASky-Life Karate Club yo muri Uganda, Munyaburanga Jean Claude ukinira The Great Warriors Karate Academy yo mu Rwanda na Niyonkuru Sidick ukinira APR Karate-Do yo mu Rwanda.
Mu bagore ho uwitwaye neza ni Uwase Razia na Abayisenga Palemonique bakinira APR Karate-Do, Yezakuzwe Lucie ukinira Agahozo Shalom na Niyonkuru Joseline ukinira Hero Karate Do-Rafiki.
Mu cyiciro cy'amakipe mu bagabo amakipe yitwaue neza ni APR Karate-Dona, Zen Karate-Do, The Great Warriors Karate Academy na Zanshin Karate Academy. Ni mu gihe mu bagore ho APR Karate-Do, Hero Karate Do-Rafiki, Zanshin Karate Academy na Nyamagabe Karate Club.
Muri rusange amakipe yegukanye imidari myinshi arimo APR Karate-Do yabaye iya mbere yatwaye imidari itandatu ya Silver ’ine ya Feza n’inine y’umuringa, The Great Worriors Karate Academy yabaye iya kabiri aho yatwaye imidari ine ya Zahabu umwe wa Feda n’ine y’umuringa naho Kenyata National Hospital iba iya gatatu n’imidari ibiri ya zahabu,itatu ya Feda n’itatu y’umuringa.
Umuyobozi wa Zanshin Karate Academy yateguye iri irushanwa Sensei (Mwarimu) Mwizerwa Dieudonné yavuze ko ari ibyishimo bitewe n’uko irushanwa ryagenze dore ko ryari ryanitabiriwe n’abakinnyi bavuye mu bihugu bitandukanye bari ku rwego rwo hejuru.
Ati: ”Ni ibyishimo gusa twabonye imikino myiza kandi twabonye ubwitabire bw’abakinnyi beza bari ku rwego mpuzamahanga ndetse tw’abonye n’ubwitabire bw’abafana buri hejuru. Umwihariko waryo hitabiriye abakinnyi biganjemo mpuzamahanga kurusha abakinnyi b’imbere mu gihugu gusa. Harimo abakinnyi bo mu Rwanda, abo muri Kenya, abo muri Congo nabo muri Gabon."
Yavuze ko bigaragara ko Karate mu Rwanda iri ku rwego rwo hejuru bitewe n’uko abakinnyi bo mu Rwanda ari bo bitwaye neza kandi bakaba barimo guhura n’abandi bari ku rwego mpuzamahanga.
APR Karate-Do yihariye imidari muri Zanshin Karate Championship 2025
Irushanwa rya Zanshin Karate Championship 2025 ryakinirwaga mu karere ka Huye mu mpera z'icyumweru gishize