Amerika iracyayoboye: Ibihugu 10 bifite abaherwe benshi ku Isi mu 2025

Leta Zunze Ubumwe za Amerika ni cyo gihugu cyaje ku isonga mu kugira abajejetafaranga benshi, aho gifite abaherwe barenga 900, bose hamwe bafite umutungo ubarirwa muri tiriyoni 6.8 z’amadolari ya Amerika.

Ubushinwa n’Ubuhinde birakurikirana mu myanya ya kabiri n’iya gatatu, aho bigaragaza ubushobozi bwabyo mu bukungu bwihuta, cyane cyane mu ikoranabuhanga, inganda no mu rwego rw’imari. Ibihugu by’i Burayi nk'u Budage n’u Bufaransa, kimwe n'u Burusiya, nabyo biri mu bihugu bifite abaherwe benshi, bagaragaza uruhare runini rw’uyu mugabane mu mibereho y’isi y’ubu ishingiye ku bucuruzi n’ikoranabuhanga.

Urutonde rwa Forbes rwagaragaje ko ku isi hari abaherwe barenga 3,000, bose hamwe bafite umutungo wa tiriyoni 16.1 z’amadolari. Ariko uwo mutungo munini ugaragara cyane mu bihugu bitatu gusa ari byo Leta Zunze Ubumwe za Amerika, Ubushinwa n’Ubuhinde, aho bifite hejuru ya 50% by’abaherwe bose ku isi n’umutungo wabo.

Muri Amerika honyine, abaherwe bavuye kuri 813 mu mwaka ushize bagera kuri 902 mu 2025. Muri abo, harimo Elon Musk wasubiye ku mwanya wa mbere ku rutonde rw’abaherwe, akaba afite umutungo ubarirwa muri miliyari 342 z’amadolari. Yongeye guca kuri Bernard Arnault wa LVMH utunze miliyari 178.

Harimo kandi Mark Zuckerberg wa Meta utunze miliyari 216, Jeff Bezos wa Amazon ufite miliyari 215, na Larry Ellison wa Oracle utunze miliyari 192. Aba bagabo bane bose bakomoka muri Leta Zunze Ubumwe za Amerika, bigaragaza ko iki gihugu gikomeje gutegeka isi mu bijyanye n’iterambere ry’ubukire.

Nubwo hari ibihugu 17 bifite umuherwe umwe gusa, ibihugu 10 bya mbere bigaragaza uko ubutunzi bw’isi buri kwikubira mu nkingi nke z'ubukungu, n’uburyo urwego rw’ikoranabuhanga, imari n’inganda bikomeje guhindura imibereho ya benshi ku isi.

Dore urutonde rw’ibihugu bituwe n’abaherwe benshi ku Isi mu 2025 nk’uko byatangajwe na Forbes: