Ikipe y'igihugu ya Algeria niyo yabitangaje ibinyujije ku rubuga rwayo rwa X. Uyu mukino uteganyijwe tariki ya 5 z'ukwezi kwa Kamena ukaba uzabera muri Chahid Mohamed Hamlaoui Stadium iherereye mu gace ka Constantine muri Algeria.
Ni umukino uzakinwa mu gihe n'andi makipe y'ibihugu azaba arimo arakina imikino ya gicuti. Ikipe y'igihugu ya Algeria isanzwe ifite izina rinini mu mupira w'amaguru dore ko ifite ibikombe bibiri by'igikombe cy'Afurika yatwaye mu 1990 na 2019.
Imaze kwitabira igikombe cy'Isi inshuro enye aho kure yageze ari muri 1/8 muri 2014. Iyi kipe kuri ubu iri ku mwanya wa 36 ku rutonde ngarukakwezi rw'impuzamashyirahamwe y'umupira w'amaguru ku Isi, FIFA ifite abakinnyi batandukanye b'amazina manini barimo Riyad Mahrez wakiniye amakipe arimo Manchester City yo mu Bwongereza ariko kuri ubu ari muri Al Ahly yo muri Arabia Saudite.
Aya makipe yombi yaherukaga guhura muri 2013 aho byarangiye ikipe y'igihugu y'u Rwanda, Amavubi, itsinzwe igitego 1-0.
Amavubi azakina na Algeria nyuma y'uko aheruka guha akazi Adel Amrouche uvuka muri iki gihugu. Iyi kipe y'igihugu izakina uyu mukino mu gihe izaba yitegura kuzakina na Nigeria na Zimbabwe mu kwezi kwa 9 mu gushaka itike y'igikombe cy'Isi cya 2026.
Algeria izakina n'Amavubi