Alexis Dusabe, Riderman na Tom Close mu bakwinjiza neza muri Wee

Ikigamijwe ni ugutanga umusanzu mu iterambere ry’umuziki no gufasha abadukurikira kuruhuka no kunogerwa n’impera z’icyumweru. Kuri iyi nshuro abahanzi batandukanye bakoze mu nganzo batanga ibihangano bishya.

Kuri ubu, abahanzi nyarwanda baba abakora umuziki usanzwe ndetse n’abakora uwo kuramya no guhimbaza Imana bose bakoze mu nganzo.

Muri iki cyumweru dusoje, Abaririmbyi b’Abanyarwanda barimo Nel Ngabo, Alyn Sano, Impakanizi na Boukuru, basohoye amashusho mashya y’indirimbo ‘Ye Ayee’ mu rwego rwo guha icyubahiro umuhanzi Yvan Buravan, witabye Imana ku wa 17 Kanama 2022.

Amashusho y’iyi ndirimbo yashyizwe hanze mu ijoro ryo ku wa Gatatu, tariki 30 Mata 2025, anyura mu bihe bitandukanye byaranze igitaramo cyabereye muri BK Arena, ku wa 26 Ukwakira 2024. Iki gitaramo cyari cyateguwe mu rwego rwo kwibuka no guha icyubahiro Buravan, kimwe mu byamamare byagize uruhare rukomeye mu guteza imbere umuziki Nyarwanda.

Indirimbo ‘Ye Ayee’, ifite iminota 3 n’isegonda 1, yakoranywe ubuhanga aho aba bahanzi bavanzemo ubuhanga bwabo n’ubutumwa bwimbitse, ariko ikanagaragaramo ijwi ry’umwimerere rya Buravan, wakunzwe cyane mu gihe yari akiri muzima. Yari iri kuri album ye yamenyekanye cyane yise ‘Twaje’.

YB Foundation, umuryango washinzwe mu rwego rwo gukomeza umurage wa Buravan, ni wo wasohoye iyi ndirimbo. Watangaje ko igikorwa cyo kuyivugurura cyari kigamije “kutwibutsa uburyo twakunze Buravan kuva ku ntangiriro y’urugendo rwe mu muziki, no gukomeza kumwibukira ku bikorwa bye by’ingenzi.”

Kuba aba bahanzi bahuriye muri iyi ndirimbo, ni igikorwa cyuje ishimwe n’ubwuzuzanye. Bigaragaza ko Buravan atari umuhanzi wanyuze ku rubyiniro gusa, ahubwo yari umuntu wahuje benshi, wabareze mu muziki cyangwa wababereye icyitegererezo.

Ni ikimenyetso cy’uko ubuhanzi bwe bwagize impinduka zifatika ku bandi bahanzi, bikaba ari nayo mpamvu bahisemo kumwubaha binyuze mu ijwi no mu bihangano bye.

Ni n’isomo ku bantu bose bakora umuziki n’abakunzi babo, ko umurage w’umuhanzi udapfa. Iyo ibikorwa bye byari bifite agaciro, bishobora gukomeza kubaho no kumurengera n’igihe atakiriho.

Guhuza amajwi yabo muri Ye Ayee byabaye nko gusubiza Buravan ku rubyiniro, bakamuririmbana bwa nyuma mu buryo bwuzuye urukundo n’icyubahiro.

Yvan Buravan, witwaga Yvan Dushime Burabyo, yavukiye i Bujumbura mu 1995. Yatangiye kumenyekana mu muziki mu 2009, ariko izina rye rirushaho kwamamara mu 2015 ubwo yasohoraga indirimbo ‘Urwo Ngukunda’ yakoranye na Uncle Austin. Yakomeje kugenda yigarurira imitima ya benshi binyuze mu bihangano birimo Malaika, Garagaza, Just A Dance, With You n’izindi.

Mu 2018, Buravan yegukanye Prix Découvertes RFI, aba umuhanzi wa mbere w’Umunyarwanda uyegukanye. Iki gihembo cyamuhesheje gukundwa no hanze y’u Rwanda, anatembereza umuziki we ku mugabane wa Afurika.

Buravan yitabye Imana afite imyaka 27, azize indwara ya kanseri. Urupfu rwe rwabaye igihombo gikomeye ku muziki nyarwanda n’abamukundaga hirya no hino ku isi.

Undi muhanzi wakoze mu nganzo muri iki cyumweru, ni Tom Close wavuze ko akurikije uko yahuje na Khalfan na Jay C mu ndirimbo ‘Agaca’, asanga yari yaratinze gukorana na bo kuko ari abahanga ku rwego rwo hejuru.

Uyu muhanzi agaruka kuri iyi ndirimbo yagize ati: “Ni ubwa mbere nari nkoranye n’aba baraperi, ngira ngo ariko abumvise indirimbo nabo babikubwira cyangwa dushobora kuba duhuje kwemeranya ko twari twaratinze gukorana. ni abahanga mu by’ukuri bafite impano zidasanzwe.”

Tom Close avuga ko uretse kuba yarakoranye n’abaraperi beza, ikindi yishimira ari ubutumwa bburi muri iyi ndirimbo.

Ati: “Nibaza ko ku Isi nta muntu ubayeho adafite abamurwanya cyangwa ibimurwanya. Ni indirimbo iri mu Kinyarwanda cyumvikana ntekereza ko buri wese atoramo ubutumwa bwe. Icyakora icyo nabwira abantu baba bashaka kurwanya abandi bakwiye kwibuka ko ukubaho ku imishwi atari impuhwe z’agaca, byose bigenwa na Nyagasani.”

Jay C umwe mu baraperi bakoranye na Tom Close muri iyi ndirimbo, we ahamya ko yanyuzwe n’uburyo yanditse ndetse n’ubutumwa buyigize.

Ati: “Ubundi uriya niwe Tom Close wa nyawe, muribuka indirimbo nka ‘Sinarinkuzi’, ‘Sibeza’ n’izindi, ikizamukubwira ni uko agira ubutumwa wumva bidasabye guca ku ruhande ariko kandi bugahura n’ubuzima bwacu bwa buri munsi.”

Tom Close amaze iminsi ari gukorana n’abaraperi cyane ko indirimbo yaherukaga gusohora ari iyitwa ‘Cinema’ yakoranye na Bull Dogg.

Mu bandi bakoze mu nganzo umurayi Alexis Dusabe, B-Threy wahurije abahanzi n’abaraperi batandukanye mu ndirimbo bise ‘Kabeho,’ umuhanzikazi France Mpundu, Shaffy, Bushali, Yampano, Tozi, Josh Ishimwe n’abandi benshi basohoye ibihangano biryoheye amatwi.

Dore urutonde rw’indirimbo 20 InyaRwanda yaguhitiyemo zakwinjiza neza muri weekend:

1. Ye Ayee (Remix) - Yvan Buravan Ft Nel Ngabo, Impakanizi, Boukuru & Alyn Sano