Nyuma y'uko Bugesera FC itsindiwe iwayo na Mukura VS igitego 1-0, irakurikizaho Al Hilal Omdurman yaraye itsinze Mukura VS ibitego 2-0 mu mukino wabaye kuri uyu wa Mbere tariki ya 8 Ukuboza. Umutoza Camarade yatangaje ko nta bwoba atewe na Al Hilal Omdurman bazahura ku wa Kane nubwo ari ikipe ikomeye, ndetse yibutsa abantu ko na Real Madrid yatsinzwe na Celta Vigo.
Ati: "Al Hilal irakomeye ariko ntinteye ubwoba. Iyo urebye abakinnyi ifite ntumenya ubanza mu kibuga n'usimbura kuko bose baratsinda, gusa mbibutse ko Real Madrid yatsinzwe na Celta Vigo."
Banamwana Camarade yagarutse ku buryo yiteguye urugamba rw'umukino Bugesera izakiramo Rayon Sports kuri iki Cyumweru. Ati: " Umpaye abato ba Bugesera, nshobora kuvuga ngo nzabatsinda gatatu kikurikiranya, ariko sinavuga ko kuba naratsinze Rayon Sports muri Shampiyona ishize, ngo nakongera nkabikora. Ngiye gukora cyane kugira ngo ndebe ko byazongera bigakunda."
Camarade yongeye ko Rayon Sports y'ubu ishyize hamwe ndetse ko kuyitsinda bigoranye kubera imitegurire yayo. Yagize ati: "Abasaza baragarutse nubwo bagarutse mu ibanga, bashyize hamwe. Ubu bayihaye Murenzi Abdullah, iri gutegura bikomeye ku buryo n'urushishi rwo mu muhanda rubimenya. Umukino uzaba ukomeye nkurikije uko Rayon Sports yiteguye."
Bugesera ishobora gukina na Al Hilal Omdurman idafite Reuben Bala Yakubu na Johnny Clement kubera imvune, gusa izaba yagaruye rutahizamu w'Umurundi Ishimirimana Darcy utarakina umukino n'umwe wa Shampiyona kubera ko yari yaragize imvune. Bugesera FC iri ku mwanya wa 12 n'amanota 10 mu mukino 11 ya Shampiyona imaze gukina.