Al Ahly yo mu Misiri igiye kwandika amateka mu mukino igiye gukinamo na FC Barcelona

Uyu mukino wa Joan Gamper Trophy uteganyijwe kuri uyu wa Gatatu, tariki ya 19 Kanama 2026, kuri Spotify Camp Nou. Uzatangira saa 20:00 ku isaha yo muri Espagne, ukaba ari na wo uzaba umukino wa mbere wa Joan Gamper Trophy ubereye kuri Camp Nou kuva iyi Stade yongeye gufungurwa nyuma y’imirimo yo kuyivugurura.

Joan Gamper Trophy ni umwe mu mikino ya Barcelona ibanziriza shampiyona. Witiriwe Joan Gamper, umwe mu bashinze iyi kipe, watangiye gukinwa mu 1966.

Mu myaka ya mbere, iri rushanwa ryakinwaga n’amakipe ane, ariko kuva mu 1997 ryahindutse umukino umwe uhuza Barcelona n’ikipe iba yatumiwe.

Kuri iyi nshuro, Al Ahly izaba ikipe ya mbere yo muri Afurika ndetse no mu bihugu by’Abarabu izitabira Joan Gamper Trophy. 

Uyu mukino kandi uzaba umwanya wa Barcelona wo kwereka abakunzi bayo abakinnyi bazayifasha mu mwaka w’imikino wa 2026/27.

Hamza Abdelkarim ashobora guhura n’ikipe yamureze

Muri uyu mukino hazaba hari inkuru yihariye kuri Hamza Abdelkarim, rutahizamu ukiri muto w’Umunya-Misiri wakuriye mu ishuri ry’umupira wa Al Ahly mbere yo kwerekeza muri Barcelona.

Abdelkarim yabanje kujya muri Barcelona ku nguzanyo, mbere y’uko iyi kipe imugumana burundu muri Kamena 2026, igasinyana na we amasezerano azageza muri 2029.

Uyu musore w’imyaka 18 yari yigaragaje mu makipe y’urubyiruko ya Barcelona, aho yatsinze ibitego bitandatu mu mikino 11.

Niba azashyirwa mu bakinnyi bazakina uyu mukino, Abdelkarim azaba ahanganye n’ikipe yamureze, ariko noneho yambaye umwambaro wa Barcelona.

Al Ahly na Barcelona basanzwe bahura

Nubwo ari ubwa mbere Al Ahly na Barcelona bigiye guhurira i Camp Nou, aya makipe asanzwe azi uko ahura.

Muri 2007, Barcelona yatsinze Al Ahly ibitego 4-0 mu mukino wa gicuti wabereye i Cairo, wari ugamije kwizihiza isabukuru y’imyaka 100 ya Al Ahly.

Nyuma y’imyaka ibiri, mu 2009, aya makipe yongeye guhura mu irushanwa rya Wembley Cup ryabereye i London. Barcelona yongeye gutsinda, ku bitego 4-1, igitego cya Al Ahly gitsindwa na Hany El-Agazy.

Bivuze ko umukino wo ku wa 19 Kanama uzaba ari uwa gatatu aya makipe ahuye, ariko ukaba ari ubwa mbere azaba akiniye muri Barcelona.

Al Ahly yo muri Espagne igiye gukina na FC Barcelona