Akaduruvayi kongeye kubura umutwe muri White House

Mu byumweru bishize, ibintu byatangiye gufata indi sura, birimo kuva mu kazi kwa Katie Zacharia wari umaze iminsi itanu gusa agizwe umuvugizi mushya wa White House, ndetse n’ibibazo byibazwa na benshi ku hazaza ha Susie Wiles, umugore w’ingenzi mu buyobozi bwa Trump.

Ibi bibaye mu gihe kitoroheye Trump, kuko Abarepubulikani benshi bahangayikishijwe n’uko igabanuka ry’icyizere Abanyamerika bamufitiye rishobora kubagiraho ingaruka mu matora yo hagati muri manda ateganyijwe ku wa 3 Ugushyingo.

White House yahakanye yivuye inyuma amakuru avuga ko mu buyobozi bwa Trump harimo amakimbirane akomeye.

Ibinyamakuru byo muri Amerika byatangiye kwita ibiro bikorerwamo n’abajyanama ba Perezida “Wild Wild West Wing”, bihasobanura nk’ahantu harangwa n’akajagari n’imikorere itagira umurongo uhamye.

Ubuyobozi bwa Trump kandi bwahakanye ibihuha bivuga ko ashaka gusimbuza Susie Wiles ku mwanya w’umukuru w’abakozi bo muri White House.

Inkuru dukesha ikinyamakuru 7SUR7 ivuga ko, Danielle Alvarez, umuvugizi wa White House, yavuze ko amakuru atangazwa n’abantu batifuje ko amazina yabo amenyekana agamije guteza urujijo.

Yagize ati: “Aba bantu bihisha inyuma y’amakuru aturuka ku bantu batavuzwe amazina, bakwirakwiza ibihuha nk’ibi, ni abantu bishakira inyungu zabo gusa.”

Yongeyeho ko nta muntu ukwiye gukomeza kurangazwa n’“amakuru y’ibinyoma”.

Ku wa Mbere, Donald Trump yongeye kugaragaza ko agishyigikiye Susie Wiles, amushyira imbere mu gikorwa kigamije guteza imbere ubuzima bw’abagore cyatangijwe na Melania Trump, umugore wa Perezida.

Susie Wiles umugore w’ingenzi mu buyobozi bwa Trump

Trump yavuze ko Wiles ari “umurwanyi ukomeye”, mu gihe uyu mugore ahanganye na kanseri y’ibere.

Wiles ni we mugore wa mbere wahawe inshingano zo kuyobora abakozi ba White House, umwanya ufatwa nk’ingenzi cyane mu mikorere y’ubuyobozi bwa Perezida.

Trump amwita “Dame de glace”, bisobanuye umugore utagaragaza amarangamutima cyane, kubera uburyo uyu munyapolitiki ukomoka muri Florida yagize uruhare mu kumufasha gutsinda amatora ya Perezida yo muri 2024 no gushyiraho umurongo uhamye mu mikorere ya White House.

Muri manda ya mbere ya Trump, White House yaranzwe n’amakuru y’abayobozi batumvikanaga, amakimbirane hagati y’abagize umuryango wa Trump n’abaminisitiri, ndetse n’abayobozi benshi bagiye bahinduranya imyanya cyangwa bakava mu kazi.

Ibyo byari bimaze kugabanyuka, ariko mu byumweru bibiri bishize hongeye kugaragara ibibazo bitandukanye.

Trump yari yarahaye Katie Zacharia inshingano zo kuba umuvugizi wa White House, ariko amakuru avuga ko yabikoze atabanje kugisha inama Susie Wiles.

Katie Zacharia wirukanwe mu nshingano nyuma y'iminsi itanu gusa

Nyuma y’iminsi itanu gusa, Zacharia yakuwe kuri uwo mwanya, nyuma yo gutanga ikiganiro n’abanyamakuru cyamaze iminota 14 gusa, aho yasubije ibibazo by’abanyamakuru batatu gusa.

Trump kandi yirukanye Kimberly Guilfoyle wari ambasaderi wa Amerika mu Bugereki, wahoze ari umukunzi w’umwe mu bahungu be. Yashinjwaga gusaba amafaranga umwe mu bantu bashyigikiye Trump.

Ikindi kibazo cyagaragaye ni igihe Trump yahagarikaga umugambi wa Pete Hegseth, Minisitiri w’Ingabo, washakaga ko igihano cyo kuraswa cy’umuntu wagabye igitero ku kigo cya gisirikare gitambutswa imbonankubone.

Amakimbirane yageze no muri Minisiteri y’Ububanyi n’Amahanga

Ibi bibazo byageze no muri Minisiteri y’Ububanyi n’Amahanga ya Amerika, aho Paolo Zampolli, umuntu wa hafi ya Trump, yanenze ubuyobozi buriho, avuga ko burangwa n’akajagari.

Ibi yabivuze nyuma yo kuvanwa ku nshingano zo kuba intumwa idasanzwe, nyuma y’amakimbirane yagiranye n’umuyobozi wo mu rwego rwo hejuru.

Hagati aho, Trump yongeye kwegera u Burusiya, atangaza ko yumvikanye na Vladimir Putin ku masezerano ajyanye na mazutu, anongera kunenga Perezida wa Ukraine, Volodymyr Zelensky.

Yagize kandi kutumvikana na Elon Musk ku bijyanye na Starshield, urusobe rw’itumanaho rikoresha ibyogajuru rufite akamaro kuri Ukraine.

Abarepubulikani bahangayikishijwe n’amatora yo hagati muri manda

Donald Trump akomeje kuvuga ko yibanze ku matora yo hagati muri manda, akaba amaze iminsi azenguruka igihugu mu bikorwa byo kwiyamamaza.

Icyakora, Abarepubulikani benshi bahangayikishijwe n’uko igabanuka ry’icyizere Abanyamerika bamufitiye, hamwe n’uburakari batewe n’izamuka ry’ibiciro bya lisansi, bishobora gutuma abazatora batabashyigikira.

White House ivuga ko ubushakashatsi bwakozwe imbere mu ishyaka bugaragaza ko Abarepubulikani bagifite amahirwe yo gutsinda amatora. Abayobozi bakuru na bo bavuga ko biteguye guhangana n’ibibazo bishobora kuvuka.

Ariko Abademokarate nibaramuka bigaruriye Kongere, biteganyijwe ko bashobora gutangiza iperereza ku bikorwa bya Trump. Perezida ubwe yigeze kuvuga ko ashobora guhura n’ikibazo cyo gukurwa ku butegetsi binyuze mu nzira ya impeachment.

Ibyo bishobora gutuma imyaka ibiri ya nyuma ya manda ye ya kabiri irangwa n’igitutu cya politiki, iperereza n’amakimbirane menshi kurushaho.

Abanyamerika barinubira izamuka ry'ibiciro bya lisansi