Action College yagiranye ubufatanye na Confucius Institute, abanyeshuri biga Igishinwa bashyirwa igorora –VIDEO

Ni amasezerano yashyizweho umukono ku wa Gatanu tariki ya 17 Ukwakira 2025, agamije guteza imbere ururimi rw’Igishinwa muri iri shuri no gufasha abanyeshuri biga mu ishuri rya Action College kubyaza umusaruro ubumenyi bw’ururimi rw’Igishinwa bahakura.

Confucius Institute ni ikigo mpuzamahanga cyashyizweho n’u Bushinwa mu rwego rwo guteza imbere ururimi rw’Igishinwa (Mandarin) n’umuco w’Igishinwa mu bihugu bitandukanye. Cyashyizweho bwa mbere mu mwaka wa 2004, bikorwa n’Ikigo cy’igihugu cy’u Bushinwa gishinzwe kwigisha ururimi n’umuco (Hanban).

Ubu bufatanye na Action College buzatuma ubumenyi bw’Igishinwa bwatangwaga bwiyogera dore ko bakimara gusinyana amasezerano, iki kigo cyahise kigenera Action College ibitabo 290 byo ku rwego rwo hejuru utasanga ahandi bikaba birimo amasomo y’Igishinwa.

Uretse kandi kuba iki kigo cyahise gitanga ibyo bitabo, kizajya gutanga icyemezo (Certificate) ya HSK igaragaza ko umuntu yize neza akandi azi Igishinwa. Icyo cyemezo nicyo gikenerwa ku muntu wifuza gukora cyangwa kwiga mu Bushinwa. Icyo cyemezo ku muntu wazajya agikenera, yakwiga muri Action College akagenda agifite aho kujya kwigirayo.

Ibyiza byagezweho ku banyeshuri biga ururimi rw’Igishinwa muri Action College si ibyo gusa kuko abanyeshuri b’iri shuri bazajya bitabira amarushanwa ategurwa n’icyo kigo hirya no hino ku Isi ndetse no kubaha ‘Scholarship’ yo kujya kwiga mu Bushinwa.

Ku ruhande rw’abarezi, si ibitabo gusa bahawe bikomeza gutuma batanga ubumenyi buri ku rwego rwo hejuru ahubwo bazahura banakomeze guhabwa amahugurwa ku rurimi rw’Igishinwa ku buryo Igishinwa kizajya kigishwa muri iri shuri kizaba kiri ku rwego nk’urw’umuturage wakuriye mu Bushinwa.

Umuyobozi Ushinzwe Abafatanyabikorwa muri Action College, Steven Rwabuhihi yabwiye InyaRwanda ko amasezerano bagiranye n’iki kigo azabafasha mu kongera ubumenyi bwatangwaga ndetse ko ubu umuntu agiye kujya yiga ururimi ariko hari n’amahirwe menshi ari kwifungurira.

Ati: “Ni amasezerano azamara imyaka itatu. Iki kigo cya Confucius Institute kizajya gifasha abanyeshuri bacu kubona ‘Certificate’ za HSK kuva ku ya mbere kugera ku ya Gatandatu. Kuba twahisemo gukorana na Confucius Institute, n’uko ari cyo kigo cyonyine gifite ububasha bwo kuba cyakoresha ibyo bizamini. Ni ikigo cyashinzwe n’Abashinwa kugirango gifashe mu kumenyekanisha ururimi rw’Igishinwa hirya no hino ku Isi, hano mu Rwanda rero bafite icyicaro.”

Akomeza ati “Aya masezerano rero azafasha abanyeshuri bacu cyane cyane ba bandi bajyaga bagira imbogamizi zo kuba bajya kwiga mu gihugu cy’u Bushinwa Wasanga hari ababona ‘Scholaraship’ yo kujya kwiga mu Bushinwa, ariko bamusaba iriya Certificate’ ya HSK akayibura, aya rero ni amahirwe agize kuri we, kugirango ajye aza muri Action College tubashe kumuhugura kuri urwo rurimi rw’igishinwa, akoze ikizamini cya HSK. Haba harimo ibizamini bitandukanye, birimo kwandika, kuvuga, kumva no gusoma, ibyo byose tuzajya tubimwigishiriza hano, hanyuma ajye kubikorera muri icyo kigo.”

Action College ikomeje kwandika abandi banyeshuri bifuza gukomeza kwiyungura ubumenyi mu ndimi z’amahanga ndetse n’andi amasomo atangwa muri iri shuri Harimo ‘Candidate Libre’ ndetse n’andi masomo menshi ajyanye n’imyuga.

Imyaka 11 ya Action College yaranzwe n’ubudasa

Umuyobozi Mukuru Wungirije wa Action College, Ingabire Cynthia yavuze ko mu myaka 11 ishize ari urugendo rw’iterambere kuri bo, kuko batangiranye amasomo macye, ariko ko hamwe no kubakira ku cyerekezo cyabo bagutse, kandi bagera hirya no hino mu gihugu.

Ati “Ubu tumaze imyaka 11. Ukurikije urugendo rw’icyo gihe n’ubu ng’ubu biratandukanye. Uko yatangiye n’aho igeze ubu birigaragaza. Byatangiye ari amasomo macye dutanga, ariko ubu ng’ubu hari uburyo bimaze kwiyongeramo. Twatangiye ari Action Languages and School, ubu turi Action College, urumva ko hari ikintu kintu gihari mu buryo bw’amasomo, ndetse n’abatugana.”

Akomeza agira ati “Twigisha indimi, amategeko y’umuhanda, twigisha ibijyanye no gutwara, ariko ubu ngubu hagiye hiyongeramo ibintu bitandukanye. Harimo imyuga ijyanye no gukora muri ‘Saloon’, guteka, gukora ikawa, gutanga amasomo ya ‘Candidate Libre’ n’andi yose twongeyemo yatumye tuba ‘College’.

Ingabire yavuze ko muri iyi myaka ishize kandi, bagiranye ubufatanye n’ibigo binyuranye, kandi bishimira imikoranire n’abo. Anavuga ko kimwe mu bintu bikomeye bagezeho harimo no kuba buri mwaka batanga impamyabushobozi ku banyeshuri basoza amasomo muri Action College.

Yanavuze ko bamwe mu banyeshuri biga imyuga muri Action College bafashwa kubona ibigo na Hotel bibakira mu kwimenyereza umwuga.

Ati “Mu buryo bwo kubaka izina mu bikorwa usanga tugira amahirwe y’aho kompanyi cyangwa se ibigo bitandukanye baza gushakira abakozi iwacu bitewe n’ubumenyi babona ku banyeshuri bacu. Ni ikintu cyiza kuba kompanyi zitandukanye ziza gushakira abakozi muri Action College.”

Action College itanga amasomo y’indimi zitandukanye zifite impamyabushobozi mpuzamahanga zirimo TOEFL, SAT, DELF, IELTS, TEF, Duolingo ndetse na HSK — icyemezo kigaragaza ubumenyi mu rurimi rw’Igishinwa.

Uretse ibyo, iri shuri rinigisha amategeko y’umuhanda ndetse n’amasomo yo gutwara ibinyabiziga, bikanafasha abanyeshuri kubona ubumenyi bufatika bwo kubyaza umusaruro ibyo biga.

Mu bijyanye n’ikoranabuhanga, Action College yigisha amasomo ya ICT, Computer Networking, na Computer Maintenance, agamije gutegura urubyiruko rufite ubumenyi bukenewe ku isoko ry’umurimo rigezweho.

Iri shuri kandi rifasha abakandida bigenga (candidats libres) mu masomo atandukanye arimo Ubukerarugendo n’Ubukerarugendo n’Ubukerarugendo (Tourism & Hospitality), Ibaruramari (Accounting), Imibare, Mudasobwa n’Ubukungu (MCE), ndetse n’amashami ya Ubuvanganzo, Ubukungu n’Ubumenyi bw’Isi (LEG) na Networking.

Binyuze muri ubu buryo, Action College ikomeje kuba kimwe mu bigo bihagaze neza mu Rwanda mu gutanga uburezi buhuje n’ibikenewe ku isoko ry’umurimo, bushyigikira iterambere ry’abanyeshuri haba mu gihugu no ku rwego mpuzamahanga.

Umuyobozi Mukuru Wungirije wa Action College, Ingabire Cynthia, yashimye abafatanyabikorwa ba Action College barimo na Confucius Institute bagiranye ubufaanye bugamije guteza imbere ururimi rw’Igishinwa

Umuyobozi Ushinzwe Abafatanyabikorwa muri Action College, Steven Rwabuhihi, yavuze ko Confucius Institute yahaye Action College ibitabo 290 n’uburenganzira bwo gutanga icyemezo cya HSK

Ubuyobozi bwa Action College buvuga ko abanyeshuri biga Igishinwa muri Action College bagiye kubona amahirwe yo kwiga no gukorera mu Bushinwa

REBA AMASHUSHO UBWO ACTION COLLEGE YASINYAGA AMASEZERANO Y'UBUFATANYE NA CONFUCIUS INSTITUTE