Abanyeshuri 66,958 batangiye ibizamini bya Leta bisoza amashuri y’imyuga n’ubumenyingiro

Ku rwego rw’Igihugu, iki gikorwa cyatangirijwe mu Kigo cy’Amashuri cya Essa Nyarugunga mu Karere ka Kicukiro n’Umunyamabanga wa Leta muri Ministeri y'Uburezi, Irere Claudette. Biteganyijwe ko ibi bizamini bizasozwa ku wa 6 Kamena 2025.

Ibizamini ngiro ni igice cy’ingenzi mu burezi bushingiye ku bushobozi, kigamije gupima ubumenyi abanyeshuri bafite mu byo bize, cyane cyane mu gushyira mu bikorwa amasomo y’imyuga no gukemura ibibazo bifatika bahura na byo mu kazi ka buri munsi.

Irere Claudette yashimangiye ko ubumenyi ngiro ari inkingi ikomeye ituma urubyiruko rw’u Rwanda ruba intangarugero mu guhanga udushya, kwihangira imirimo no gutanga ibisubizo by’ingirakamaro mu iterambere ry’igihugu.

Yavuze ko Guverinoma y’u Rwanda ikomeje gushyira imbaraga mu guteza imbere ireme ry’uburezi bw’imyuga, hagamijwe gutegura abaturage bafite ubumenyi bufatika, kandi bashoboye guhangana n’isoko ry’umurimo rihindagurika.

Muri uyu mwaka w’amashuri, abarenga ibihumbi 471 ni bo biteganyijwe ko bazakora ibizamini bya Leta mu byiciro bitandukanye. Muri bo, 220,822 bazakora ibizamini bisoza amashuri abanza, 149,131 bazakora ibisoza icyiciro rusange cy’amashuri yisumbuye, abagera ku 101,057 bakore ibisoza icyiciro cya kabiri cy’amashuri yisumbuye, abandi 66,958 bakore ibizamini ngiro bya TVET.

Uyu mubare w’abanyeshuri ugaragaza ukwiyongera kw’abinjira mu mashuri no gukomeza kwagura amahirwe y’uburezi bufite ireme ku rwego rw’igihugu.

Abanyeshuri 66,958 batangiye gukora ibizamini ngiro bya Leta bisoza amashuri yisumbuye y’umwaka wa 2024-2025

Byatangijwe n’Umunyamabanga wa Leta muri Ministeri y'Uburezi, Irere Claudette