Abakinnyi ba Filime Nyarwanda basuye urwibutso rwa Jenoside yakorewe Abatutsi rw’Akarere ka Musanze-AMAFOTO

Ni igikorwa bakoze kuri uyu wa Gatandatu tariki ya 15 Ugushyingo 2025, aho beretswe ibimenyetso ndangamateka ya Jenoside yakorewe Abatutsi mu 1994. Bari kumwe n’ubuyobozi bwa ‘Mashariki African Film Festival’ na DPC James Bagabo, aho bakiriwe n'Ubuyobozi bwa Ibuka mu Karere ka Musanze.

Nyuma yo kunamira no gushyira indabo ku mva iruhukiyemo imibiri y'Abazize Jenoside yakorewe Abatutsi mu 1994, basuye ibice bitandukanye bigize uru rwibutso, basobanurirwa amateka ya Jenoside yakorewe Abatutsi mu yahoze ari Perefegitura ya Ruhengeri.

Urwibutso rwa Jenoside yakorewe Abatutsi rwa Musanze ruruhukiyemo imibiri y’Abazize Jenoside basaga 800 biciwe mu yahoze ari Court d’Appel de Ruhengeri, barimo abari bakuwe mu yahoze ari Superifegitura ya Busengo ubu ni mu Karere ka Gakenke, bahazanywe babeshywa ko bahahungishirijwe ariko kuwa 15 Mata 1994, bakicwa n’interahamwe zifatanyije n’abari abasirikare b'u Rwanda.

Inyubako y’Urukiko Rukuru, Urugereko rwa Musanze, yahoze yitwa Cour d’Appel yahungiyemo Abatutsi barenga 400 bari baturutse mu bice bitandukanye by’iyahoze ari perefegitura ya Ruhengeri, ariko abenshi muri bo bakaba bari baturutse mu yahoze ari Superefegitura ya Busengo (ubu ni mu Karere ka Gakenke) bakaba bari bahungiye muri Superefegitura baturutse hirya no hino mu ngo bumvise ko hari ubuhungiro. 

Uwari Superefe wa Busengo, Nzanana Dismas abamuhungiragaho yaberekaga ko nta kibazo akababwira ko ntacyo bari bube ariko anavugana n’uwari Perefe wa Ruhengeri Zigiranyirazo Protais agira ngo abamwoherereze bicirwe mu mujyi wa Ruhengeri.

Nzanana yahise ababwira ko agiye kubaha imodoka zikabahungishiriza muri Zayire, bahise bazana amabisi (bus) zirabajyana babashyira mu nyubako y’iyahoze ari “Cour d’Appel”.

Ku itariki ya 15/04/2019 ni bwo interahamwe ziturutse hirya no hino harimo n’umutwe witwaga “Amahindure” wari umaze kwica Abatutsi mu yahoze ari Komine Mukingo waje gufasha izo interahamwe bica Abatutsi bose bari muri iyo nyubako.

Ababashije kuvamo baje kwicirwa kuri Mukungwa bavanywe ku bitaro bya Ruhengeri. Babanje guteramo amagerenade nyuma basubira guhorahoza abasigaye badapfuye ari na ko bafataga impinja bakazikubita ku nkuta.

Yaba mu Rwanda no ku Isi, Urwibutso rwa Jenoside yakorewe Abatutsi rw’Akarere ka Musanze rwihariye kuba ari yo nzu y’ubutabera yiciwemo abantu b’inzirakarengane bari bayihungiyemo.

Abakinnyi ba filime basuye urwibutso rwa Cour d’Appel de Ruhengeri mu rwego rwo kwiga amateka, biyemeza gukoresha ijwi ryabo mu guhangana n'abagoreka amateka

Umuyobozi wa Mashariki African Film Festival, Tresor Nsenga ashyira indabo ku mva zishyinguyemo inzirakarengane 

Abayobozi mu nzego zinyuranye ndetse n'abakinnyi ba filime bafashe umunota wo kwibuka no kuzirikana inzirakarengane zishwe muri Jenoside yakorewe Abatutsi mu 1994 zishyinguye mu rwibutso

Umuyobozi w’Akarere ka Musanze, Claudien, n’Ubuyobozi bwa Mashariki bifatanyije n’abakinnyi ba filime mu rugendo rwo kwibuka Abatutsi biciwe mu yahoze ari urukiko rw’ubujurire rwa Ruhengeri 

Urugendo rwo gusura inzibutso rugaragaza uruhare rw’abahanzi mu kubaka ubumwe binyuze mu gusigasira amateka y’igihugu

Ubuyobozi bwa Ibuka mu Karere ka Musanze bwashimiye abakinnyi ba filime ku ruhare rwabo mu kwimakaza ukuri n’isanamitima

Umuyobozi w'Akarere ka Musanze, Nsengimana Claudien na DPC James Bagabo [Uri iburyo]