Airtel Rwanda
Kigali

Perezida wa Barcelona yatangaje ko nta bushobozi bwo kugura Neymar buhari muri iki gihe cya Covid-19

Yanditswe na: SAFARI Garcon
Taliki:4/08/2020 12:36
0

Josep Maria Bartomeu uyobora ikipe ya FC Barcelona yatangaje ko bitakunda ko iyi kipe yongera kugura Neymar akava muri Paris St-Germain bitewe n'uko ubukungu budahagaze neza muri iki gihe cya Coronavirus.



Bartomeu yanahishuye ko no gusohora amafaranga bakagura rutahizamu Lautaro Martinez muri Inter Milan nabyo byabagizeho ingaruka zikomeye .

Bartomeu yabwiye ikinyamakuru Sport cyo muri Espanye ko hagati y'ukwezi kwa gatatu n'ukwa gatandatu uyu mwaka, amafaranga Barcelona yateganyaga kwinjiza yagabanutseho miliyoni 200 z'ama-Euro.

Yagize ati "Amakipe yose akomeye y'i Burayi yagizweho ingaruka. Ibi ntibizamara umwaka umwe, ahubwo [bizamara] itatu cyangwa ine".

Neymar w'imyaka 28 y'amavuko ukomoka muri Brazil, yageze muri PSG mu kwezi kwa munani mu 2017 aguzwe miliyoni 222 z'ama-Euro, aba umukinnyi wa mbere ku Isi ukina umupira uciye agahigo ko kugurwa amafaranga y’umurengera.

Iyi kipe kandi yari yagerageje kongera kumugura ku mpeshyi ishize ariko biranga.

Bartomeu yagize ati "Kugura Neymar? Muri iki gihe, ntibyakunda. Na PSG ntabwo ishaka kumugurisha".

"Barça yavuganye na Inter ku bijyanye na Lautaro, ariko ibiganiro byarahagaze. Uko ibintu bimeze ubu ntabwo byatwemerera gushora imari itubutse".

Bartomeu yakomeje asobanura ko Barcelona yahombye miliyoni 200 z'ama-Euro hagati y'ukwezi kwa gatatu n'ukwa gatandatu uyu mwaka.

Yakomeje agira ati "Mu mwaka wa 2020-21 twari twiteze kwinjiza miliyari 1,1 z'ama-Euro, ariko tuzinjiza 30% by'ayo".

"Niba uko iki cyorezo cya coronavirus kimeze bitagenze neza, nta bareba umupira ku kibuga bazabaho, nta basura inzu y'amateka y'ikipe, nta maduka acuruza iby'ikipe azafungura kandi hazakomeza kubaho igihombo cy'amafaranga".

"Bituma tugomba kutajenjeka na busa mu buyobozi, tugomba kugenzura tukareba ishoramari ry'ingenzi n'irishobora kuba ritegereje".

FC Barcelona ntiyagize umwaka w’imikino mwiza, uretse guhomba aya mafaranga ntiyigeze inatwara igikombe cya shampiyona ya Espagne kuko cyegukanwe na mukeba Real Madrid, ubu ikaba ishaka kugerageza ngo irebe ko yakwegukana UEFA Champions League.

   

Perezida FC Barcelona Bartomeo yatangaje ko iyi kipe nta bushobozi ifite bwo kugura NeymarJr

Byavugwaga ko Neymar ashobora kugaruka i Barcelona

Neymar yagiriye ibihe byiza muri FC Barcelona yafashije kwegukana ibikombe byinshi bitandukanye





TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND