RFL
Kigali

Coronavirus: Trump yongeye gutangaza ko umuti wa Hydroxychloroquine uvura ahubwo wanzwe kuko ari we wawutangaje

Yanditswe na: Eric Misigaro
Taliki:29/07/2020 10:10
0

Nyuma y'uko muri Werurwe Donald Trump uyobora Leta Zunze Ubumwe za Amerika yatangaje ko umuti wa hydroxychloroquine ushobora guhashya coronavirus bikaza kurangira inzobere mu buvuzi zibiteye utwatsi, kuri iyi nshuro yongeye kugaragara avuga ko uyu muti ari ingenzi.



Umukuru w’igihugu cya Amerika bwana Trump akomeje kujya imbizi n’abahanga mu bijyanye n’ubuvuzi aho akomeza kubabwira ko umuti wa Hydroxychloroquine usanzwe uvura Malaria ko ushobora kuba wakoreshwa mu kuvura coronavirus imaze kworeka imbaga nyamwinshi muri iki gihugu.

Trump yavuze ko uwo muti uvura malaria wanzwe nk'umuti wa Covid-19 kubera ko ari we wavuze ko wakoreshwa. Trump yongeye kugaruka kuri uyu muti nyuma y'uko urubuga rwa Twitter rw’umuhungu we mukuru rwahagaritwe kubera kwerekana amashusho y’umuganga uri kuvuga ko uyu muti ari inyamibwa mu kuvura covid-19.  

N'ubwo Trump yakomeje gutsimbarara kuri uyu muti abahanga mu buvuzi bavuga ko uyu muti ushobora guteza ibyago byinshi harimo n'ibyo kurwara umutima. Inkomoko yo kwamamazwa k'uyu muti ko ushobora kuba uvura covid-19 byatangiye mu kwezi kwa Werurwe bitangijwe na Trump.  Ndetse byaje gutangazwa nawe imbere y’abanyamakuru ababwira ko yamaze igihe cy’Amezi abiri afata imiti itaremezwa neza mu kwirinda iyo virusi aha yavugaga uyu muti yatangaje ukangwa.

Ubwo yari ari kuganira n’abanyamakuru ku munsi w'ejo ku wa kabiri, Perezida Trump yabwiye abanyamakuru mu biro bye White House ati: "Navuga gusa ko mpereye k'uko mbibona, ndetse nshingiye ku byo nasomye byinshi no ku bumenyi bwinshi kuri wo, ntekereza ko [umuti wa hydroxychloroquine] ushobora gutanga umusaruro mwiza cyane mu bihe bya mbere [by'uburwayi bwa Covid-19]".

"Sintekereza ko hari icyo uhomba na kimwe mu kubikora [mu kuwufata], atari uko gusa muri politike bigaragara ko udakunzwe cyane". Yongeyeho ati: "Iyo ntanze inama ku kintu, bakunze kuvuga ngo 'mwigikoresha'". 

Perezida Trump n'umuhungu we Donald Trump Jr ni bamwe mu bakoresha imbuga nkoranyambaga batangaje ubutumwa bwa videwo mu ijoro ryo ku wa mbere. Iyo videwo igaragaza itsinda ryitwa 'America's Frontline Doctors', cyangwa abaganga bo muri Amerika bari ku rugamba rwa coronavirus, ugenekereje mu Kinyarwanda. 

Abo baganga bagaragara bashishikariza abantu gukoresha hydroxychloroquine nk'umuti wo kuvura Covid-19. Imbuga za Facebook na Twitter zakuyeho ubwo butumwa, zibushyiraho n'ikimenyetso cy'uko bugamije kuyobya. Ariko izi mbuga zabikoze abarenga miliyoni 17 bamaze kubona bumwe mu butumwa bw'iyo videwo.

Twitter yanabujije uwo muhungu mukuru wa Perezida Trump kugira icyo atangaza kuri urwo rubuga mu gihe cy'amasaha 12, nk'igihano cy'uko yatangaje iyo videwo.

Src:bbc 






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND