Airtel Rwanda
Kigali

Jurgen Klopp wa Liverpool yatowe nk’umutoza w’umwaka mu Bwongereza

Yanditswe na: SAFARI Garcon
Taliki:28/07/2020 15:51
0

Umudage utoza ikipe ya Liverpool yo mu Bwongereza, Jurgen Klopp yatowe n’ishyirahamwe ry’abatoza mu Bwongereza nk’umutoza wahize abandi muri uyu mwaka w’imikino 2019/20 muri shampiyona y’u Bwongereza ‘Premier League’.



Klopp yahesheje ikipe ya Liverpool igikombe cya shampiyona nyuma y’imyaka 30 yari ishize itazi uko gisa.

Emma Hayes yahembwe nk’umutoza wahize abandi mu cyiciro cy’abagore, nyuma yo guhesha ikipe ya Chelsea y’abagore igikombe cya shampiyona.

Marcelo Bielsa utoza ikipe ya Leeds United ibarizwa muri Championship, yahembwe nk’umutoza w’indashyikirwa muri shampiyona y’icyiciro cya kabiri mu Bwongereza.

Agaruka ku myitwarire ya Klopp, mu kiganiro Sir Alex Ferguson wahoze utoza Manchester United yagiranye na Sky sports yagize ati: "Yari abikwiriye, imyitwarire y’ikipe ubwayo irivugira, kandi umutoza ubwe abigiramo uruhare rukomeye cyane".

Nyuma yo guhabwa iki gihembo, Jurgen Klopp yagaragaje amarangamutima ye anatangaza ko yishimiye ko ibyo yakoze muri uyu mwaka w’imikino byahawe agaciro n’abatoza bagenzi be.

"Nishimiye kuba natowe n’ishyirahamwe ry’abatoza mu Bwongereza nkanahabwa igihembo cy’umutoza w’umwaka, nshimishijwe kandi no kuba negukanye igikombe Sir Alex Ferguson nawe yatwaye, uyu mugabo ndamukunda cyane".

"Nzi neza ko bidakwiye 100% nk’umutoza wa Liverpool ariko ndamukunda. Niwe mutoza w’umwongereza wa mbere twahuye ndetse ndetse tunasangira ifunguro rya mugitondo, sinzi neza niba abyibuka, gusa njye nabifashe nk’igitangaza".

"Ni iby’igiciro gikomeye gutorwa n’abatoza bagenzi banjye, bakampa igihembo".

Jurgen Klopp yakoze akazi gakomeye muri uyu mwaka w’imikino, kuko yahesheje Liverpool igikombe cya shampiyona nyuma y’imyaka 30 igishaka yarakibuze, ikaba yaracyegukanye ifite amanita 99 irusha amanita 18 Manchester City yasoje ku mwanya wa kabiri.

Klopp yahembwe nk'umutoza w'umwaka muri shampiyona y'u Bwongereza

Klopp yafashije Liverpool kwegukana igikombe cya shampiyona nyuma y'imyaka 30





TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND