Leta ya Vietnam kuri uyu wa Mbere yatangaje ko igiye kwimura abaturage bagera ku 80,000 mu mujyi wa Danang nyuma y’uko mu mpera z’iki cyumweru dusoje hagaragaye abantu batatu banduye Covid-19. Abazimurwa muri uyu mujyi umubare munini ugizwe na ba mukerarugendo aho igikorwa cyo kubimura kizamara iminsi ine.
Leta ya Vietnam yatangaje ko igiye gutangira kwimura abaturage bagera 80,000 bava mu mujyi wa Danang nyuma y'uburwayi bwa Covid-19 bwagaragaye muri uyu mujyi.
Iki
gikorwa cyo kwimura abaturage kizamara iminsi ine aho hazifashishwa kampani zitwara
abantu mu ndege z’imbere mu gihugu, umubare munini w’abazimurwa ugizwe na ba mukerarugendo
b’imbere mu gihugu ni ukuvuga abaturage batandukanye baturutse mu yindi mijyi
baje muri Danang.
Danang ni umwe mu mijyi y'ubukerarugendo muri Vietnam
Vietnam iherereye mu Majyepfo ashyira uburasirazuba bw’umugabane wa
Aziya, ni kimwe mu bihugu byo ku mugabane wa Aziya bitagaragayemo umubare
munini w’abanduye icyorezo cya Covid-19, kubera ko kuwa Gatandatu w’iki
cyumweru dusoje ari bwo hagaragaye umuntu wa mbere wanduye kuva muri Mata, abandi
batatu bagaragaye ku munsi wo ku cyumweru muri Danang.
Muri iki
gikorwa cyo kwimura abaturage kampani z’indege biteganijwe ko zizajya zikora ingendo
zigera ku 100 buri munsi ziva muri Danang zijya mu yindi mijyi 11 igize
iki gihugu. Mu mezi macye ashize iki gihugu cyashyizeho amwe mu mabwiriza akakaye
yo kurwanya ikwirakwira rya Covid-19, aho hanakozwe igikorwa cyo gupima umubare
munini w’abaturage. Imibare itangazwa na
Leta ya Vietnam igaragaza ko abamaze kwandura Covid-19 ari abantu 420 gusa, aho
nta muntu n'umwe urahitanwa n’iki cyorezo muri iki gihugu.
Vietnam ni kimwe mu bihugu byashyizeho ingamba zikomeye mu kurwanya Covid-19
Vietnam
kugeza ubu ntabwo irafungurira ba mukerarugendo baturutse hanze y’igihugu ariko
ubukerarugendo bw’imbere mu gihugu buremewe. Abaturage bazimurwa bava muri Danang
bajya mu bindi bice bigize iki gihugu, bazajya bahita bashyirwa mu kato mu
minsi igera kuri 14 nk'uko byatangajwe na minisitiri w’ubuzima muri iki gihugu.
Nyuma y’uko
hagaragaye abandi bantu banduye, minisitiri w’intebe wa Vietnam Bwana Nguyen
Xuan Phuc yatanze itegeko ko polisi ikaza amabwiriza abuza
kwinjira mu buryo butemewe mu gihugu.
Ku
cyumweru, kimwe mu gitangazamakuru cya leta cyatangaje ko mu mujyi wa Danang,
polisi yataye muri yombi umushinwa w’imyaka 42 y’amavuko aho
yari akurikiranyweho kuba umuyobozi w’itsinda ryinjizaga abantu mu buryo butemewe
bava mu Bushinwa binjira muri Vietnam.
Ku wa
mbere leta ya Vietnam yatangaje ko yataye muri yombi abantu bagera 1,500 mu
ntara ya Ha Giang ihana imbibi n’u Bushinwa aho bageragezaga kwinjira mu Bushinwa
mu buryo butemewe n’amategeko kuva muri Gicurasi. Aba bose batawe muri yombi
umubare munini wari abaviyetinamu bageragezaga kwinjira mu Bushinwa, aho bahise
bashyirwa mu kato.
Src:
Bangkok Post & Daily Mail
TANGA IGITECYEREZO