Nyuma y'aho umukuruw’Igihugu cya Madagascar Andry Rajoelina atangaje ko bamaze kubona umuti wa Covid-19, ubu igice kinini cy'ikirwa cya Madagascar kirimo n'umurwa mukuru, Antananarivo, cyasubijwe muri 'Guma mu rugo' kubera kwiyongera kw'ubwandu bwa coronavirus.
Leta yatangaje ko izi ngamba zigomba gutangira kubahirizwa guhera kuri uyu wa Mbere tariki 6 Nyakanga 2020 kugeza tariki 20 y'uku kwezi kwa Karindwi.
Itangazo rya leta rivuga ko "umuntu umwe gusa mu rugo ari we uzemererwa kuva mu rugo hagati ya saa Kumi n'ebyiri z'igitondo na saa sita z'amanywa". Abategetsi bavuga ko izi ngamba zigamije kugabanya ikwirakwira ry'iki cyorezo.
Leta ya Madagascar imaze gutangaza abantu 3,250
banduye Covid-19 muri bo 33 imaze kubica naho 1,135 bamaze kuyikira kuva
yahagera mu kwezi kwa gatatu, nkuko imibare ya Kaminuza ya Johns Hopkins yo
muri Amerika ibigaragaza.
Madagascar yavuzwe cyane mu makuru mu kwezi kwa gatanu ubwo
Perezida Andry Rajoelina yatangazaga ko babonye umuti ushobora kuvura no
kurinda iki cyorezo. Uyu "muti" muri Madagascar bise CovidOrganics
ukoze mu byatsi byitwa Artemisia bisanzwe bikoreshwa mu kuvura Malaria,
watanzwe henshi mu mashuri mu gihugu.
N'ubwo wari utaremezwa n'abahanga muri siyansi ko uvura iyi
ndwara, ibihugu bimwe bya Afurika byawutumijeho ngo biwifashishe. Mu kwezi kwa
gatanu, Umuryango w'Ubumwe bwa Afurika watangaje ko ushaka gufata ibipimo bya
siyansi ngo urebe niba uyu muti "ntacyo utwaye kandi unavura".
Ishami ry'umuryango w'abibumbye ryita ku buzima (OMS/WHO)
ryaburiye abantu kwirinda gukoresha imiti itarapimwe mu kuvura coronavirus.
SRC: BBC
TANGA IGITECYEREZO