Covid-19-USA: Dr Stephen Hahn ushinzwe imiti yavuguruje Donald Trump wari utangaje igihe urukingo ruzabonekera

Abatuye Isi bose bari mu rungabanganabo ndetse benshi icyizere cy'ubuzima kiri kugenda kiyoyoka. Ku rundi ruhande hari abamaze kwiyakira bamenyera kubaho bahangana n’icyorezo cya Covid-19. Kuri uyu munsi Isi itegereje urukingo nk'igisubizo ntakuka kuri Covid-19 imaze kwica abantu barenga 500,000 no kwandura abarenga Miliyoni 11 ku isi.

Dr Stephen Hahn, komiseri mu kigo cya leta ya Amerika cya 'Food and Drug Administration' (FDA) ejo ku cyumweru yagize ati: "Sinavuga ngo urukingo ruzaboneka ryari." Aya magambo yatangajwe n'uyu mugabo yaje avuguruza ibyari byatangajwe na Perezida Trump.

Dr Hahn uri mu itsinda ry'ibiro bya Perezida ryo kurwanya iki cyorezo, yari abajijwe icyo avuga ku gihe Perezida Trump avuga ko urukingo ruzaboneka "vuba cyane muri uyu mwaka".

Mu ijambo ry'umunsi w'ubwigenge bwa Amerika, Trump yavugiye ku biro bye bya White House ati: "Ndashaka gushimira abahanga muri siyansi n'abashakashatsi mu gihugu, yewe no ku isi, bari gukora ibishoboka ngo haboneke imiti ivura ndetse n'urukingo".

"Turi gukoresha abahanga b'igihugu kandi birashoboka cyane ko twabona umuti cyangwa urukingo mbere cyane ko uyu mwaka urangira."

Uyu munsi wa none Amerika ni cyo gihugu kizahajwe na coronavirus kurusha ibindi ku isi kuko iyi ndwara imaze kwica abantu hafi 130,000 n'abandura bakaba bakomeje kwiyongera aho ubu barenga miliyoni 2.8.

Mu mibare Amerika yigeze gutangaza y'abashobora kuzahitanwa n'iki cyorezo ubu bamaze kurenga muri kimwe cya kabiri kuko hateganyijwe kuzitaba Imana abagera ku bihumbi 240. Abahanga muri siyansi bavuga ko urukingo rwa Covid-19 rudashobora kuboneka mbere nibura yo hagati mu mwaka wa 2021.

Mu kiganiro na televiziyo ABC News ku cyumweru, Dr Hahn yavuze ko urukingo ruri gushakishwa ku muvuduko udasanzwe, ariko ntiyavuze igihe rushobora kubonekera. Yagize ati: "Ikintu gusa twakwizeza Abanyamerika ni uko ku by'urukingo tuzafata umwanzuro ushingiye kuri siyansi."

Gushaka urukingo bigeze he?

Kugera ku rukingo ubundi bifata imyaka, iyo bitanabaye imyaka irenga 10, ariko abahanga muri siyansi bari kwihuta bishoboka mu kugabanya igihe bisanzwe bifata ngo haboneke urwa Covid-19.

Ku isi ubu hari gahunda zigera ku 120 z'inkingo ziri gukorwa. Kaminuza za Oxford na Imperial London College zo mu Bwongereza zombi zatangiye amagerageza ku bantu y'inkingo bakoze.

Abahanga mu buzima bo muri Amerika bagaragaza icyizere kigereranyije ko urukingo ruzaba rwatangiye gukorwa ari rwinshi ngo ruhabwe abantu muri uyu mwaka cyangwa mu ntangiriro z'utaha.

Dr Anthony Fauci inzobere mu by'indwara zandura muri Amerika aherutse kuvuga ko kumenya ko hari urukingo rukora neza bishobora kuzaba byagezweho mu gihembwe cya nyuma cy'uyu mwaka. Dr Fauci yavuze ko amagerageza y'inkingo ashobora kuzaba ari mu byiciro bya nyuma muri uku kwezi kwa karindwi.

Src:bbc