Airtel Rwanda
Kigali

Kim Jong-un uyobora Koreya ya Ruguru yishimagije avuga ko igihugu cye cyatsinze Covid-19

Yanditswe na: Eric Misigaro
Taliki:3/07/2020 11:46
0

Kim Jong-un ni umwe mu bategetsi bakunze kuvugwa mu itangzamakuru bitewe n'ibikorrwa bye bigaragiwe n'amagambo aba atangaje. Kuri iyi nshuro yagaragaye yishimira intsinzi yagezeho yo gutsinda icyorezo cya covid-19. Yatangaje ibi ubwo yari ari mu nama nkuko byatangajwe n’ibiro ntaramakuru bya leta KCNA.



Bwana Kim yari amaze iminsi atuje nyuma yuko yigeze kumara iminsi abantu bazi ko yapfuye nyamara ari muzima. Mu ijambo yavugiye mu nama ya biro politike y'ishyaka ritegeka Koreya ya ruguru, Kim yagize ati"Icyakumiriye kuza kwa virusi mbi ndetse gishobora kugumishaho ituze.

Mu mezi atandatu ashize, Koreya ya ruguru yafunze imipaka yayo ndetse ishyira mu kato abantu babarirwa mu bihumbi ubwo iyi virusi yari itangiye gukwirakwira ku isi.

Magingo aya, iki gihugu kiri mu biri ku Isi bitaragaramo umuntu n'umwe wanduye coronavirus ukirangwamo, nubwo benshi mu batuye Isi batajya bashira amacyanga iki gihugu.

Bivugwa ko Bwana Kim, muri iyi nama yabaye ku munsi w'ejo ku wa Kane, yasesenguye byimbitse ibikorwa byagezweho na gahunda idasanzwe y'amezi atandatu yo kwirinda icyorezo. Yavuze ko intsinzi mu kurwanya iki cyorezo yagezweho kubera ubuyobozi bureba kure bw'akanama gakuru k'ishyaka riri ku butegetsi.

Bwana Kim yavuzeko iki gihugu kigiye gukomeza kuba maso gishyiraho ingamba zikakaye nk'izo cyari cyarashyizeho. Yongeyeho ko icyorezo cya coronavirus kikigaragara mu bihugu by’ibituranyi.

Kuri uyu wa Gatanu, ibiro ntaramakuru KCNA bya leta ya Koreya ya ruguru byatangaje ko "yakomeje kuburira ko guhutiraho mu koroshya ingamba zo kurwanya icyorezo byateza akaga umuntu adashobora kwiyumvisha kandi katakwikurwamo"

Agapfukamunwa ni itegeko muri Koreya ya ruguru

Mu mpera y'ukwezi kwa mbere, Koreya ya ruguru yihutiye guhangana na coronavirus - ifunga imipaka yayo ndetse nyuma yaho ishyira mu kato abanyamahanga babarirwa mu magana, mu murwa mukuru Pyongyang.

Yanashyize mu kato abaturage bayo bwite babarirwa mu bihumbi za mirongo ndetse ifunga amashuri. Kuri ubu Koreya ya ruguru yongeye gufungura amashuri, ariko yagumishijeho itegeko ribuza abantu guterana muruhame.

Yanategetse kwambara agapfukamunwa mu ruhame, nkuko inkuru y'ibiro ntaramakuru Reuters yo ku itariki ya mbere y'uku kwezi kwa karindwi ibivuga, isubiramo amagambo y'umutegetsi wo mu ishami ry'umuryango w'abibumbye ryita ku buzima (OMS/WHO).

OMS inavuga ko iki gihugu - gituwe n'abaturage barenga gato miliyoni 25 - kugeza ubu kimaze gupima coronavirus abantu 922 gusa - amakuru akavuga ko bose basanze ari bazima.

Koreya ya ruguru, ihana urubibi rurerure n'Ubushinwa, yakomeje kuvuga ko nta muntu n'umwe urahaboneka wanduye coronavirus.

Ariko, Oliver Hotham, umwanditsi mukuru w'urubuga NK News rw'amakuru kuri Koreya ya ruguru by'umwihariko, mu ntangiriro y'uyu mwaka yabwiye BBC ko ibyo bishoboka ko atari ukuri.

Yagize ati: "Ni ibintu bigoye cyane ko byashoboka ko nta muntu n'umwe wanduye uhari kuko ihana urubibi n'Ubushinwa na Koreya y'epfo".

Yunzemo agira ati"By'umwihariko ku mupaka n'Ubushinwa, kubera ingano y'ubucuruzi bwambukiranya umupaka... Rwose simbona ukuntu byashoboka ko bashoboye kuyirinda, Ariko rwose bafashe ingamba z'ubwirinzi hakiri kare, rero ntekereza ko bishoboka ko bashoboye kwirinda ko icyorezo cyibasira benshi".

Src: bbc 






TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND