Airtel Rwanda
Kigali

France: Abapolisi batutswe bituma bakora imyigaragambyo bajugunya Amapingu bamagana ababashinja irondaruhu

Yanditswe na: David Mayira
Taliki:14/06/2020 10:09
0

Mu gihugu cy’u Bufaransa Abapolisi bakoze imyigaragambyo barakaye cyane bajugunya amapingu bakoresha mu kazi kabo ka buri munsi berekana ko ibyo abaturage babashinja by’irondaruhu atari byo.



Abapolisi bajugunye amapingu hasi kubera ko batutswe  n’abaturage n'ababashinja ibikorwa by'urugomo n'irondabwoko. Abapolisi bigaragambije ku wa Gatanu banatwaye imodoka zigenda mu rukurikirane zimanuka mu gace karimo inyubako y'ibiro bya Perezida bya Champs-Élysées rwa gati mu murwa mukuru Paris, bavuza amahoni.

Ibi bikorwa by’imyigaragambyo y’Abapolisi bamaganaga abavuga ko hari isano hagati y'imikorere yabo n'iy'abapolisi bo mu mujyi wa Minneapolis muri Leta Zunze Ubumwe z'Amerika. Ku itariki ya 25 y'ukwezi gushize kwa Gatanu, abapolisi  b'i Minneapolis bataye muri yombi George Floyd, Umunyamerika ukomoka muri Afurika utari witwaje intwaro, biza kumuviramo urupfu.

Urupfu rwe rwateje imyigaragambyo muri Amerika no mu bice bitandukanye ku isi yo kwamagana irondaruhu. Abo bapolisi bigaragambya bo mu Bufaransa banarubiye kubera ko leta yaciye uburyo bwo gufata mu ijosi ababa bacyekwaho ibyaha, mu gihe babambika amapingu. Minisitiri w'ubutegetsi bw'igihugu Christophe Castaner ni we yaciye ubwo buryo ku wa Mbere w'iki cyumweru.


Hari nyuma y'aho abigaragambya mu Bufaransa bigabije imihanda bashinja polisi yo muri icyo gihugu ko ikora irondaruhu, mu buryo bumwe nk'uko polisi yo muri Amerika ishinjwa gukoresha urugomo ku bacyekwaho ibyaha b'abirabura. Ku wa kane, Bwana Castaner yagiranye ibiganiro n'amashyirahamwe y'abapolisi, ibyo biganiro ngo bikaba bikomeje, mu gihe leta ishaka uko yahosha impaka zikomeye ku irondaruhu zongeye gukaza ubushyamirane mu miryango imwe n'imwe.

Mu ntangiriro y'uku kwezi, habaye ubushyamirane ubwo abigaragambyaga, batewe akanyabugabo n'imyigaragambyo y'abamagana irondaruhu muri Amerika, bibukaga Adama Traoré, Umufaransa ukomoka muri Afurika wapfiriye mu gikorwa cya polisi mu 2016 afite imyaka 24.

Polisi y'u Bufaransa kandi ishinjwa gukomeretsa bikomeye umuhungu w'imyaka 14 y'amavuko witwa Gabriel, ubwo yari afunzwe acyekwaho kugerageza kwiba moto (ipikipiki) ahitwa Bondy hafi y'i Paris mu mpera y'ukwezi gushize.

Imyigaragambyo yo kujugunya amapingu kw'abapolisi yabaye ku wa Kane mu mijyi nka Paris, Lille, Rennes, Bordeaux, Toulouse no mu yindi mijyi, ndetse yanakomeje mu gitondo cyo ku wa Gatanu tariki 12 Kamena 2020. 

Src:BBC






TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND