Airtel Rwanda
Kigali

Shampiyona ya RD Congo yasojwe imburagihe TP Mazembe ihabwa igikombe

Yanditswe na: SAFARI Garcon
Taliki:14/05/2020 19:03
0

Ishyirahamwe ry’umupira w’amaguru muri Repubulika Iharanira Demokarasi ya Congo (FECOFA) ryafashe umwanzuro wo guhagarika shampiyona y’icyiciro cya mbere igitaraganya kubera umuvuduko w’icyorezo cya Coronavirus muri iki gihugu bituma TP Mazembe ihabwa igikombe.



Shampiyona y’umupira w’amaguru muri DR Congo yari imaze igihe yarahagaze kubera Covid-19, ariko FECOFA yafashe umwanzuro wo kuyishyiraho akadomo nyuma yo kubona ko bitazakunda ko ikinwa ikarangira.

Mu itangazo FECOFA yasohoye, rivuga ko TP Mazembe yari iyoboye urutonde rw’agateganyo rwa shampiyona mbere yuko ihagarikwa n’amanota 53, mu mikino 20, ihawe igikombe cy’uyu mwaka wa 2019/2020 cyabaye icya 18 yegukanye mu mateka yayo.

AS Vita Club ni yo yabaye iya kabiri n’amanota 48, nkuko iryo tangazo rikomeza ribivuga.

FECOFA yanemeje ko amakipe abiri ya nyuma ku rutonde rwa shampiyona - OC Bukavu Dawa de Bukavu na AS Nyuki de Butembo - yamanutse mu cyiciro cya kabiri.

Ni mu gihe amakipe ya JSK de Kinshasa na Etoile Jaune du Katanga yo yazamutse mu cyiciro cya mbere.

Ku makipe azasohokera DR Congo muri CAF Confederation Cup, bitewe n’uko igikombe cy’Igihugu (Coupe du Congo) cyasheshwe, hazasohoka Daring Club Motema Pembe (DCMP) na AS Maniema de Kindu zari ku mwanya wa gatatu n’uwa kane ku rutonde rwa Shampiyona.

Iyi shampiyona ije ikurikiye iya Kenya nayo yahagarutswe igitaraganya kubera COVID-19 hanyuma igikombe gihabwa ikipe ya Gor Mahia.

Uretse shampiyona zo muri Afurika zimwe na zimwe zahagaritswe,izindi shampiyona zirimo iy’u Bubiligi n’u Buholandi zagizwe imfabusa, mu Bufaransa shampiyona yasheshwe igitaraganye PSG ihabwa igikombe.


TP Mazembe yahawe igikombe cya shampiyona ya DR Congo yahagaritswe igitaraganya kubera COVID-19





TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND