Airtel Rwanda
Kigali

Cristiano, Messi na Ronaldinho bayoboye ikipe y’abakinnyi 11 beza b’ibihe byose muri ruhago ku Isi – AMAFOTO

Yanditswe na: SAFARI Garcon
Taliki:28/03/2020 10:23
0

Mu mateka y’umupira w’amaguru hari abakinnyi b’abahanga bakoze ibigwi n’ibitangaza byemeje rubanda bituma bahora bagaruka mu mitwe ya benshi. Biragoye guhitamo ikipe y’abakinnyi 11 beza buri wese ku mwanya we kubera ko abakinnyi b’abahanga kuri buri mwanya ari benshi cyane.



Buri wese bijyanye n’ubumenyi ndetse n’uburambe bwe mu mupira w’amaguru ashobora guhitamo ikipe ye y’abakinnyi 11 beza yabonesheje amaso ye.

Inyarwanda.com yagutoranyirije ikipe y’abakinnyi 11 beza babayeho ndetse harimo n’abagikina kuri ubu bakoze ibidasanzwe bagaragaza ubuhanga kurusha bagenzi babo bakina ku mwanya umwe ku Isi yose.

Ni ikipe igizwe n’umunyezamu Thomas Nkono, mu bwugarizi hakabamo Van Dijk, Dessaily, Roberto Carlos na Dani Alves, mu kibuga hagati hakabamo Seedorf, Ronaldinho, Cristiano na Messi bagakina ku mpande, mu gihe Ronaldo na Maradona ari bo bayoboye ubusatirizi.

1.Umunyezamu: Thomas Nkono(Cameroon)


Nkono w’imyaka 63 y’amavuko,  ni umwe mu banyezamu beza Isi yagize, yakiniye ikipe y’igihugu ya Cameroon imyaka 18 atwarana nayo igikombe cya Afurika mu 1984, yongera kuyigeza ku mukino wa nyuma mu 1986. Yakiniye amakipe atandukanye haba iwabo ndetse no hanze harimo Canon Yaoundé yahesheje ibikombe 5 bya shampiyona ndetse n’ibikombe bibiri bya CAF Champions League. Yakiniye kandi Espagnol na Bolivar. Nkono yahembwe nk’umukinnyi mwiza w’umunyafurika inshuro ebyiri.

2. Myugariro: Roberto Carlos (Brazil)


Carlos w’imyaka 46 y’amavuko, ni umwe mu bakinnyi bakinnye ku ruhande rw’ibumoso neza mu mateka y’umupira w’amaguru. Yakiniye amakipe akomeye i Burayi no muri Amerika y’Epfo, harimo Real Madrid yo muri Espagne yatwaranye nayo ibikombe 3 bya UEFA Champions League, ibikombe 4 bya shampiyona, ibikombe 2 mpuzamigabane ndetse na UEFA Super Cup. Yatwaranye kandi n’ikipe y’igihugu ya Brazil ibikombe byinshi birimo igikombe cy’Isi 2002 na Copa America 2.

Nk’umukinnyi yahembwe inshuro nyinshi, zirimo no kuba umukinnyi mwiza wa FIFA 1997.

3. Myugariro: Dani Alves (Brazil)


Alves wakiniye amakipe menshi akomeye ku mugabane w’i Burayi, ni umwe mu bakinnyi bakina ku ruhande rw’ibumoso neza. Yakiniye PSG yo mu Bufaransa, Juventus yo mu Butaliyani aha hose yagiye afasha amakipe kwegukana ibikombe bitandukanye. 

Yamenyekanye cyane akina muri FC Barcelone ayifasha kwegukana ibikombe 6 bya shampiyona, ibikombe 3 bya UEFA Champions League n’ibikombe 3 by’Isi. Alves yafashije ikipe y’igihugu ya Brazil kwegukana ibikombe bya Copa America 2 ndetse n’ibikombe mpuzamigabane 2.

4. Myugariro: Marcel Desailly (France)


Desailly ni umwe muri ba Myugariro beza Isi yagize, batazanibagirana mu mitwe ya benshi. Yakiniye amakipe atandukanye kandi akomeye arimo AC Milan yahesheje UEFA Champions League, iki gikombe kandi yacyegukanye ari muri Marseille, anahesha Chelsea UEFA Cup na UEFA Super Cup.

Yatwaranye igikombe cy’Isi n’ikipe y’igihugu y’u Bufaransa mu 1998 ndetse n’igikombe mpuzamigabane inshuro ebyiri. Ku giti cye nk’umukinnyi, Desailly yahawe ibihembo byinshi bitandukanye.

5. Myugariro: Virgil Van Dijk (U Buholandi)


Van Dijk ntabwo aramara igihe kinini azwi, ariko ni umukinnyi umaze kugaragaza ko ari umuhanga cyane ndetse akaba ari no gufasha ikipe ya Liverpool akinira kugenda yubaka amateka.

Van Dijk yafashije Liverpool kwegukana UEFA Champions League umwaka ushize, anayifasha kwegukana UEFA Super Cup ndetse n’igikombe cy’Isi, kuri ubu iyi kipe ifite amahirwe menshi cyane yo kwegukana shampiyona y’u Bwongereza y'uyu mwaka.

Van Dijk umaze kwegukana ibihembo byinshi bitandukanye ku giti cye nk’umukinnyi, yafashije ikipe y’igihugu y’u Buholandi kugera ku mukino wa nyuma wa UEFA Nations League ubwo batsindwaga na Portugal.

6. Hagati: Clarence Seedorf (u Buholandi)


Uyu ni umwe mu bakinnyi beza bakina mu kibuga hagati Isi yagize, yakiniye amakipe atandukanye ku mugabane w’i Burayi arimo AC Milan yo mu Butaliyani ayifasha kwegukana ibikombe bitandukanye birimo UEFA Champions League 2, anyarukira muri Real Madrid yo muri Espagne nayo ayifasha gukusanya ibikombe bitandukanye birimo UEFA Champions League 2, akaba kandi yaranafashije Ajax kwegukana ibikombe byinshi birimo na UEFA Champions League imwe.

Seedorf wakiniye ikipe y’igihugu y’u Buholandi, yegukanye ibihembo byinshi nk’umukinnyi ku giti cye.

7. Hagati: Ronaldo de Assis Moreira Ronaldinho (Brazil)


Ronaldo de Assis Moreira uzwi nka Ronaldinho yibukwa cyane ku macenga meza arimo udushya twinshi yahangaga muri buri mukino, uyu yafashije FC Barcelone kwegukana UEFA Champions League 2005-2006, afasha amakipe atandukanye arimo AC Milan, Atletico Mineiro na Flamengo kwegukana ibikombe mu bihugu iwabo.

Ronaldinho wegukanye Ballon d’Or 2005, yafashije ikipe y’igihugu ya Brazil kwegukana Igikombe cy’Isi 2002, n’igikombe cya Copa America 1999.

8. Iburyo: Cristiano Ronaldo (Portugal)


Ntawushidikanya ku buhanga bwa Cristiano ufatwa nk’umukinnyi wa mbere ku Isi muri iki gihe, uyu mugabo ukinira Juventus yanyuze mu makipe atandukanye ku mugabane w’i burayi arimo Sporting CP, Manchester United na Real Madrid yahesheje UEFA Champions League.

Cristiano yahesheje ikipe ‘igihugu ya Portugal igikombe cya EURO 2016 ndetse na UEFA Nations League mu mwaka ushize. Cristiano kandi abitse Ballon d’Or 5 n’ibindi bihembo yegukanye nk’umukinnyi ku giti cye.

9. Ibumoso: Lionel Messi (Argentina)


Messi ni umukinnyi wa mbere ku Isi wegukanye Ballon d’Or nyinshi kurusha abandi aho abitse iwe izigera kuri 6 mu myaka 12 iheruka. Mu buzima bwe yakiniye ikipe ya FC Barcelone ayifasha kwegukana ibikombe 10 bya shampiyona ya Espagne, ibikombe 6 by’igikombe cy’umwami muri iki gihugu, ibikombe 3 by’Isi ndetse n’ibikombe 4 bya UEFA Champions League.

10. Rutahizamu: Ronaldo Luís Nazário de Lima(Brazil)


Uyu ni umwe muri ba rutahizamu bizerwaga cyane muri Brazil, kubera ko atazuyazaga imbere y’izamu, abaturage bo muri iki gihugu ntibazibagirwa igikombe cy’Isi yabahesheje mu 2002 ariko akaba yari yaranagitwaye mu 1994 ubwo cyari cyabereye muri USA. Yahesheje kandi iki gihugu ibikombe 2 bya Copa America ndetse n’igikombe mpuzamigabane.

Uyu mugabo w’imyaka 43 y’amavuko, yakiniye Real Madrid ayifasha kwegukana ibikombe bitandukanye birimo UEFA Cup winner’s Cup. Ronaldo yahembwe ibihembo byinshi bitandukanye birimo Ballon d’Or 2 yegukanye mu 1997 na 2002.

11. Rutahizamu: Diego Armando Maradona (Argentina)


Maradona wafashije ikipe y’igihugu ya Argentina kwegukana igikombe cy’Isi mu 1986, ni umwe mu bakinnyi Isi yagize banditse amateka n’ibigwi muri ruhago. 

Yakiniye FC Barcelone ayifasha kwegukana  igikombe cy’umwami inshuro ebyiri, afasha Napoli yo mu Butaliyani kuba ikipe y’igitinyiro ku mugabane w’i Burayi na magingo aya, aho yayifashije kwegukana ibikombe 2 bya shampiyona, igikombe ca Copa Italia, igikombe cya Super Cup Italia na UEFA Cup.

Maradona yegukanye ibihembo bitagira ingano, birimo igihembo cya Ballon d’Or itangwa na France Football ndetse n’igihembo cya Onze d’Or inshuro ebyiri.


Ikipe y'abakinnyi 11 beza muri ruhago ku Isi mu mboni z'umunyamakuru wa INYARWANDA

Tags:




TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND