Airtel Rwanda
Kigali

Igikomangoma Albert wa Monaco bamusanzemo Coronavirus

Yanditswe na: Mupende Gedeon Ndayishimiye
Taliki:19/03/2020 18:12
0

Igikomangoma Albert wa Monaco i Burayi ku mugabane wugarijwe kurusha iyindi n'icyorezo cya Coronavirus, bamusanzemo iki cyorezo gihangayikishije Isi muri iyi minsi, nk'uko byahamijwe n'umuryango w'ibwami kuri uyu wa Kane tariki 19/03/2020.



Prince Albert w'imyaka 62 y'amavuko abaye umuyobozi wa mbere uzwi ku rwego rw'Isi wanduye iki cyorezo. Dailymail dukesha iyi nkuru ivuga ko umugore wa Prince Albert bitaramenyekana niba nawe yanduye Coronavirus. Umugore we w'imyaka 42 bashakanye mu 2011, ni umunya-Afrika y'Epfo wahoze ari icyamamare mu mukino wo kora. Mu 2014 babyaranye abana babiri b'impanga.

Umuryango w'ibwami watangaje ko Prince Albert akomeje akazi ke nk'ibisanzwe akaba ari kugakorera iwe mu rugo. Batangaje ko nubwo akomeje akazi, ari kwitabwaho n'umuganga we wihariye ndetse n'Inzobere mu buvuzi ikora mu bitabo byitwa The Princess Grace Hospital Centre byitiriwe nyina wa Prince Albert.


Prince Albert n'ubwo yanduye Coronavirus akomeje akazi ke

Igikomangoma Albert yabonye izuba mu 1958. Ni umwana wa kabiri w'Igikomangomakazi Grace n'Igikomangoma Rainier ba Monaco. Prince Albert yize muri Amherst College muri Massachusetts aho yakuye impamyabumenyi mu masomo ya Politike (Political science) mu 1981. Ni umunyamuryango wa International Olympic Committee.

Magingo aya Prince Albert ni umwe mu bantu ibihumbi bamaze kwandura Coronavirus yakomotse mu gihugu cy'u Bushinwa. Mu Rwanda naho iki cyorerezo cyarahageze, abamaze kucyandura ni abantu 11 nk'uko tubikesha Minisiteri y'Ubuzima (MINISANTE). Kugeza ubu ubwo twandika iyi nkuru, abamaze kwandura Coronavirus ku Isi hose ni abantu 230,542, abahitanywe nayo ni 9,390 naho abamaze gukira iki cyorezo ni 86,256.

Mu kwirinda ikwirakwira ry'iki cyorezo, u Rwanda rwafashe ingamba zo guhagarika ingendo zose z'indege mu gihe cy'iminsi 30. Leta y'u Rwanda ikomeje gusaba abantu kubahiriza ababwiriza ya MINISANTE mu rwego rwo kwirinda Coronavirus. Amwe muri ayo mabwiriza harimo gukarana intoki n'amazi meza ndetse n'isabune, kwirinda gukora ingendo zitari ngombwa, kwirinda kujya ahantu hateraniye abantu benshi, kwirinda guhoberana no gusuhuzanya abantu bahana ibiganza, n'ibindi.


Igikomangoma Albert hamwe n'Igikomangomakazi Charlene






TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND