Airtel Rwanda
Kigali

Umujyanama wa Diamond yabaye umuntu wa Gatandatu muri Tanzania wanduye Coronavirus

Yanditswe na: Janvier Iyamuremye
Taliki:19/03/2020 15:31
0

Umujyanama wa Diamond witwa Sallam Mendez, yiyongereye ku rutonde rw’abarwayi batandatu muri Tanzania bagaragaweho n’icyorezo cya Covid-19 giterwa n’agakoko kitwa Corona.



Ku gicamunsi cy’uyu wa kane Sallam Mendez Sk yanditse kuri konti ya Instagram, avuga ko yanduye Coronavirus. 

Yashyizwe mu kato mu Mujyi wa Dar es sallam aho ari gukurikiranwa n’abaganga.

Yavuze ko ameze neza asaba buri wese gukomeza kwiyitaho. Ati “Ibizamini byagaragaje ko nanduye Coronavirus ariko buri kimwe cyose kimeze neza. Buri wese akaze ubwirinzi muri iki gihe cy’iyi virus.” 

Uyu mugabo yashimye Guverinoma ya Tanzania yakajije imbaraga mu guhangana n’iki cyorezo. Yavuze ko n’ubwo ari wenyine akomeje gusengera imiryango itandukanye, akangurira abantu kugira umuco wo gukaraba neza intoki.

Ikinyamakuru Mpasho cyanditse ko uyu mugabo yasanganwe iyi ndwara nyuma y’iminsi mike avuga mu rugendo rw’akazi mu Burayi.  

Ikinyamakuru Tuko.co.ke kivuga ko Sallam yakoreye ingendo muri Sweden, Denmark no mu Bufaransa kuwa 05 -13 Werurwe 2020.  

Abahanzi babarizwa muri Label yitwa Wasafi ifasha abahanzi mu bya muzika barimo Diamond na Rayvanny wamwihanganishije bamubwira ‘uraza kumera neza’.

Minisitiri w’ubuzima muri Tanzania, Madamu Ummy Mwalimu yavuze ko imibare y’abanduye Coronavirus muri Tanzania yavuye kuri bane yageze kuri batandatu. 

Abamaze kwicwa na Coronavirus muri Afurika ni 16: Batandatu bo mu Misiri, batandatu muri Algeria, babiri muri Maroc, umwe muri Sudan n'umwe muri Burkina Faso.

Sallam umujyanama wa Diamond yatangaje ko yanduye Covid-19

Diamond yihanganishije umujyanama we wanduye Coronavirus





TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND