Airtel Rwanda
Kigali

UEFA Europa League: Arsenal yatunguwe na Olympiacos iyisanze mu rugo, Manchester United ikomeza muri 1/8 - AMAFOTO

Yanditswe na: SAFARI Garcon
Taliki:28/02/2020 10:00
0

Mu ijoro ryo kuri uyu wa Kane ku mugabane w’iburayi hakinwe imikino yo kwishyura muri 1/16 cya Europa League, imikino yaranzwe no gutungurana gukomeye cyane, kubera ko Arsenal yari mu makipe ahabwa amahirwe yo kwegukana irushanwa yasezerewe rugikubita bayisanze ku kibuga cyayo, mu gihe Manchester United yatangaga ibirori.



Byatunguye benshi, kubona amakipe yitwaye neza mu bikombe bikomeye ku mugabane w’iburayi ariyo abimburiye ayandi gusohoka muri iri rushanwa rugikubita, amakipe yagarutsweho na benshi ni Arsenal yo mu bwongereza yatsindiwe ku mukino wa nyuma wa Europa League mu mwaka ushize, na Ajax yo mu Buholandi yageze kure muri UEFA Champions League y’umwaka ushize.

Ku kibuga Emiratse, mu mukino wamaze iminota 120, Arsenal yongeye gutenguha cyane abakunzi bayo isezererwa muri 1/16 cya UEFA Europa League na Olympiacos ku bitego byinshi yatsindiwe mu rugo,  kuko yatsinzwe ibitego 2-1 kandi yo yaratsindiye hanze 1-0.

Mu minota 90 y’umukino ntabwo Arsenal yigeze ikina nk’ikipe iri imbere y’abafana bayo kandi ifite intego yo gukomeza mu cyiciro gikurikiyeho, kuko yarushijwe n’iyi kipe yo mu Bugereki irayisatira ndetse iyihusha ibitego byabazwe.

Mu minota 90 y’umukino Olympiacos yari yafunguye amazamu itsinda igitego kimwe, bituma amakipe yombi anganya 1-1.Bityo hongerwaho iminota 30 ya kamarampaka.

Igitego Arsenal yatsinzwe cyaturutse ku burangare bw’abakinnyi b’inyuma ba Arsenal batitaye ku gufata myugariro Pape Abou Cisse wari uhagaze wenyine mu rubuga rw’amahina ubwo haterwaga koroneri ahita atsindisha umutwe ku munota wa 53.

Ku munota wa 113 w’umukino,Kapiteni wa Arsenal Pierre-Emerick Aubameyang yahaye icyizere abafana ubwo yatsindaga igitego cyiza cyane yikaraze mu kirere nyuma y’umupira wari utewe mu rubuga rw’amahina na Ozil,myugariro wa Olympiacos awugaruza umutwe wisangira Aubameyang aratsinda.

Ku munota wa nyuma w’umukino 120,myugariro wa Arsenal yahereje umupira umunyezamu Leno atinda kuwutera imbere niko gusatirirwa n’umukinnyi wa Olympiacos wahise awumushota hahita haboneka koloneri.

Iyi Koroneri yatewe isanga ba myugariro ba Arsenal bahagaze nabi bananirwa gucunga Youssef El Arabi wahise abatsinda igitego cyabasezereye burundu mu irushanwa.

Mu yindi mikino yabaye, Manchester United yakomeje muri 1/8 nyuma yo kunyagira Club Brugge yo mu Bubiligi ibitego 5-0 mu mukino wo kwishyura wabereye mu Bwongereza.

Ajax yo mu Buholandi, yasezerewe na Getafe yo muri Espagne nubwo yatsinze ibitego 2-1 mu mukino wo kwishyura. Umukino ubanza wari warangiye Getafe itsinze 2-0.

Amakipe 15 amaze kubona itike ya 1/8 cya Europa League ni: Rangers, AS Roma, Wolfsburg, LASK, Basel, Bayer Leverkusen, Istanbul Basaksehir, Wolves, Shakhtar Donetsk, Inter Milan, Manchester United, Olympiacos, Seville, Getafe na FC Copenhagen.

Uyu munsi nibwo hamenyekana ikipe ya 16 iva hagati ya Salzburg na Eintracht Frankfurt.


Pape Abou atsindira Olympiacos igitego cya mbere



Pepe Nicolas agerageza gucenga abakinnyi ba Olympiacos


Aubameyang atsindira Arsenal igitego


El-Arabi atsindira Olympiacos igitego cya kabiri



Abakinnyi ba Arsenal baguye mu kantu


Arteta yatunguwe no gusezererwa muri iri rushanwa rugikubita





TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND