RFL
Kigali

Lionel Messi akomeje guca uduhigo, nyuma ya Ballon d’Or ya 6 yegukanye ikindi gihembo

Yanditswe na: SAFARI Garcon
Taliki:6/12/2019 21:05
0


Rutahizamu ukomoka muri Argentine ukinira FC Barcelone yo muri Espagne, Lionel Messi waciye agahigo nyuma yo kwegukana Ballon d’Or ya Gatandatu, yatowe nk’umukinnyi mwiza wahize abandi muri shampiyona ya Espagne (La Liga) mu kwezi kwa 11.



Mu kwezi kwa 11 Lionel Messi yakinnye imikino itatu muri shampiyona ya Espagne, atsinda ibitego 4 atanga n’umupira umwe wavuyemo igitego, yatsinze igitego kimwe ku mukino wa Celta Vigo, anatsinda ibitego bitatu ku mukino wa Legagnes, kuri uyu mukino yanahaye umupira Suarez wavuyemo igitego cya mbere cya Barcelone.

Mu kwezi kwa 11 kandi Messi yatsinze ibitego bibiri mu mikino ibiri yakiniye ikipe y’igihugu ya Argentine, anatsinda igitego kimwe mu mukino wa Champions League FC Barcelone yakinagamo na Borussia Dortmund, uteranyije imikino yose Messi yakinnye muri uyu mwaka w’imikino,  usanga ari 14 akaba yaratsinzemo  ibitego 11, anatanga imipira 8 yavuyemo ibitego.

Imibare ikaba igaragaza ko akiri umukinnyi uri ba mbere ku isi. Ku wa mbere w’iki cyumweru ni bwo ikinyamakuru cyandikirwa mu Bufaransa cya France Football cyahaga Messi Ballon d’Or ya Gatandatu , akaba yarahise aca agahigo ko kuba ari we utwaye Ballon d’or nyinshi mu mateka, dore ko yahise arusha Cristiano Ronaldo banganyaga.

Lionel Messi akaba azashyikirizwa iki gihembo yatsindiye kuri uyu wa Gatandatu i Camp Nou, mbere y’umukino uzahuza FC Barcelone na Deportivo Alaves. Si ubwa mbere Messi yegukanye iki gihembo kuko kuva yagera muri Barcelone nkuru mu mwaka wa 2004, yatangiye kucyegukana inshuro nyinshi.


Lionel Messi yatowe nk'umukinnyi mwiza w'ukwezi kwa 11 muri La Liga

Messi yatsindiye Barcelona ibitego 4 mu mikino 3 yakinnye mu kwezi kwa 11

Muri uko kwezi Messi yatsindiye Argentine ibitego 2

Ku wa mbere w'iki cyumweru Messi yegukanye Ballon d'Or ya Gatandatu 





TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND