Kigali

Kamichi, Shizzo n’abandi bazaririmba mu gikorwa cya mbere The Mane ikoreye muri Amerika

Yanditswe na: Janvier Iyamuremye
Taliki:16/10/2019 9:37
0

Umuhanzi Kamichi Karidinali, umuraperi Shizzo n’abandi babarizwa muri Leta zunze ubumwe za Amerika bagiye guhurira mu gitaramo ‘International Peace Concert 2019’ cyateguwe na Bad Rama abinyujije muri ‘Label’ ya The Mane afatanyije na Peace Center For Forgiveness Reconciliation.



Iki gitaramo kizabera ahitwa Butler University (The Reilly Room), kuwa 10 Ugushyingo 2019 guhera saa cyenda z’amanywa kugera saa kumi n’ebyiri ku isaha yo muri Leta zunze ubumwe za Amerika.

Abahanzi batumiwe ni Itorero Hoza Dance Troupe, umuraperi Shizzo, Kamichi, The Monster, M Twice na T Wise. Kwinjira ku munyeshuri ufite ikarita y’ishuri ni amadorali 5$. Ku muntu utari umunyeshuri kwinjira ni amadorali 10$. Ni mu gihe mwana uri munsi y’imyaka 6 kwinjira ari ubuntu.

Amafaranga azava muri iki gitaramo azahabwa Itorero Hoza Dance Troupe mu rwego rwo kubashyigikira mu rugendo rwabo rw’umuziki. Iki gitaramo cyateguwe ku bufatanye bwa ‘Label’ ya The Mane ifatanyije na Peace Center For Forgiveness, Reconcialition Inc ndetse na Desmond Tutu Peace.

Bad Rama Umuyobozi wa The Mane, yatangarije INYARWANDA ko yamaze kunoza ibiganiro na Peace Center For Forgivenes bazajya bakorana mu bikorwa bitandukanye.

Yagize ati “Iyo ‘organization’ tugiye gukorana turi no mu biganiro byo kuba bajya batera inkunga The Mane mu gushaka no guteza imbere impano z’abana b’abanyarwanda.” Avuga ko igikorwa cya mbere bahuriyeho bazagikorana muri Kamena 2020.

Peace Center For Forgivenes ifite intego yo gufasha no guteza imbere impano mu rubyiruko. Yavuze ko muri Kamena 2020 atekereza gutegura igikorwa yise ‘Talent Street Detection’ aho azashakisha impano mu rubyiruko mu bitaramo bizabera ahantu hatandukanye harimo no mu muhanda.


Bad Rama agiye gufungura ishami rya The Mane muri Leta zunze ubumwe za Amerika

Ni igikorwa avuga ko yateguye kugira ngo buri mwaka amurike impano nshya ziri mu rubyiruko. Yongeraho ko kimwe mu byamujyanye muri Leta zunze ubumwe za Amerika harimo gushaka uko yafungura ishami rya The Mane muri Amerika kugira ngo abanyarwanda batuyeyo bazajye bagira ibihe byabo byo kwidagadura.

Avuga ko arajwe ishinga no guteza imbere umuziki w’u Rwanda mu nguni zose.

Umuraperi Shizzo ugiye kuririmba muri iki gitaramo azwi mu ndirimbo nka “Intashyo”, ‘The Home Coming’, ‘Bact To Me’ yakoranye na T-Wise nawe uzaririmba muri iki gitaramo.

Kamichi yatangarije INYARWANDA ko kuva mu mwaka wa 2002 ari inshuti na Bad Rama ku buryo atamutenguha mu gikorwa cyose yamwiyambazamo. Yavuze ko nk’umuhanzi yiteguye gutanga ibyishimo muri iki gitaramo.

Ati “Umuhanzi asabwa kuririmba gushimisha abantu gukoresha umuhogo n’ikindi icyo ari cyo cyose gusa neza nyine abantu bakabona umusitari bategereje ukabanezeza.”

Kamichi ugiye kuririmba muri iki gitaramo yakunzwe mu ndirimbo nka “Byacitse”, “Aho ruzingiye”, “Warambeshye” n’izindi ziyongereye ku ndirimbo “Ni Forever” na “My Karabo” aherutse gushyira hanze.

Ni umwe mu bahanzi baririmbye banabifatanya n’urugendo rw’itangazamakuru. Muri Nyakanga 2019  yakoze ubukwe n’umukunzi we ufite inkomoko i Huye. Uyu muhanzi amaze imyaka isaga itanu atuye ku butaka bwa Leta Zunze Ubumwe za Amerika ku wa 18 Nzeri 2018 nibwo yibarutse umwana w’umukobwa.

Kamichi ugiye kuririmba muri iki gitaramo aherutse gushyira hanze indirimbo yise 'Ni Forever'

KANDA HANO UREBE AMASHUSHO Y'INDIRIMBO "NI FOREVER" YA KAMICHI








Inyarwanda BACKGROUND