ParaVolleyAfrica 2019: Ikipe y’abakobwa b’u Rwanda yatsinze Misi

Wari umukino w’amateka ku bihugu byombi kuko no mu 2017 ubwo iyi mikino n’ubundi yaberaga mu Rwanda, ikipe y’abagore b’u Rwanda yatwaye igikombe batsinze Misiri ku mukino wa nyuma.

Ikipe y'abagore b'u Rwanda bishimira gutsinda Misiri

Umukino wo ku mugoroba w’iki Cyumweru, u Rwanda ruri mu rugo rwatangiye rutsinda seti ya mbere n’amanota 26-24 mbere y’uko Misiri ibishyura muri seti ya kabiri ikabatsinda amanota 25-15.

U Rwanda rwagarutse mu iseti ya gatatu ruyitsinda n’amanota 25-22 mbere yo gutsinda iya kane n’amanota 25-20.

Umukino w'u Rwanda na Misiri uba ari ishiraniro (Derby)

Ikipe y'abagabo b'u Rwanda nayo iri mu mwiherero yitegura kuzatangira imikino kuwa 18 Nzeri bari baje gufana bashiki babo

Nyuma yo gutsinda Misiri amaseti 3-1 (26-24, 15-25, 25-22 na 25-20), u Rwanda ruragaruka mu kibuga kuri uyu wa mbere saa tatu z’igitondo bakina umukino wo kwishyura bafitanye na Kenya (09h00’) mbere yo kuza guhura kandi na Misiri saa moya (19h00’) mu mukino wo kwishyura. Saa munani ni bwo Misiri ikina na Kenya mu mukino wo kwishyura kuko uwubanza Misiri yatsinze Kenya amaseti 3-0.

Dr.Mossad A.Mohammed umutoza mukuru w'u Rwanda

Muri iyi mikino y’icyiciro cy’abagore, hitabiriye ibihugu bitatu ari byo u Rwanda rwakiriye, Kenya na Misiri. Aha bazakina hagati yabo (Round Robbin) nyuma amakipe abiri ya mbere azahurire ku mukinowa nyuma.

Ikipe izatwara igikombe izakina imikino Olempike ya 2020 izabera i Tokyo mu Buyapani.

Mbere y’uko u Rwanda rucakirana na Misiri, habanje kuba umuhango wo gufungura irushanwa ku mugaragaro (Opening Ceremony).

Itorero ribyina imbyino gakondo

Mu myanya y'icyubahiro

Guy Rurangayire Didier umuyobozi wa siporo muri MINISPOC

Hatangizwa irushanwa ku mugaragaro

Muri uyu muhango, Murema Jean Baptiste umuyobozi wa Komite y’igihugu y’imikino y’abafite ubumuga (NPC Rwanda) yahaye ikaze ibihugu byose biri mu Rwanda byitabiriye iyi mikino anashima cyane impuzamashyirahamwe y’iyi mikino muri Afurika (Africa Para Volley) ku ruhare bagize kugira ngo u Rwanda baruhe andi mahirwe yo kwakira iri rushanwa mpuzamahanga.

“Ibihugu byose biri hano mu Rwanda byitabiriye irushanwa bihawe ikaze. Nka NPC Rwanda turashima cyane Para Volley Africa yongeye kutugirira icyizere cyo kongera kwakira iri rushanwa. Ibi bigaragaza ko hari icyizere batubonamo mu iterambere ry’umukino wacu ". Murema

Murema Jean Baptiste Perezida wa NPC Rwanda

Nzeyimana Celestin umunyarwanda akaba n’umunyamabanga mukuru wa Para Volley Africa wari muri uyu muhango yavuze ko ari iby’agaciro gakomeye kuba u Rwanda ruri kwakira iyi mikino ihuza ibihugu bya Afurika hanagamijwe gushaka itike y’imikino Paralympic izabera mu Buyapani mu 2020.

Celestin Nzeyimana umunyamabanga wa Para Volley Africa

Agaruka ku ikipe y’u Rwanda, Nzeyimana yabagiriye inama y’uko bakoresha imbaraga zose bafite kugira ngo babyaze umusaruro amahirwe bahawe bityo babe babona itike izabajyana mu Buyapani kwipima n’ibihugu bikomeye ku rwego rw’isi.