Airtel Rwanda
Kigali

Igiteranyo cy'amafaranga PGGSS yasize mu mifuka y'abahanzi nyarwanda, Dream Boys ni bo basaruye akayabo!

Yanditswe na: Editor
Taliki:6/09/2019 7:53
0

2011-2018, imyaka umunani yarirenze mu Rwanda hatangijwe irushanwa rya Primus Guma Guma Super Star ryahuzaga abahanzi bakunzwe kurusha abandi mu gihugu. Ryamaze kuba amateka ntituzongera kuribona ukundi!



Iri rushanwa rya PGGSS ryabaga rihanzwe amaso n’abantu b’ingeri zose, kuva ku munyamujyi w’i Nyamirambo kugera ku muturage w’iyo i Nyabitekeri muri Nyaruguru. Muri Werurwe ni bwo hatangazwaga abahanzi bagomba kuryitabira, uwo izina rye ritabaga riri mu 10 ba mbere, byabaga ari agahinda kuri we, ku bwo guhomba amafaranga yabaga aririmo.


Tom Close ni we wegukanye PGGSS ku nshuro ya mbere akurikirwa na King James

Ifaranga ryo muri PGGSS ryarengaga abahanzi rikagera no ku bandi bantu benshi babaga bahawe imirimo inyuranye. Umujyi wabaga wabereyemo igitaramo abacuruzi baho nabo babaga basakiwe bitewe n’abantu benshi babaga bakeneye serivisi zirimo amafunguro, ibinyobwa, amacumbi, ubwikorezi n’izindi.


Bamwe mu begukanye irushanwa rya PGGSS

By’umwihariko iri rushanwa ryabaye umusemuburo ukomeye wo kuzamura ubukungu bw’abahanzi b’abanyarwanda batari bagatangira kwinjiza amafaranga menshi. Kuri benshi byari ubwa mbere batunga miliyoni ivuye mu muziki.

Abenshi mu bagiye babona ibihembo muri PGGSS byabagiriye akamaro mu buryo bugaragara n’ubwo hari n’abayamariye mu iraha. Hari n’abayabonye ariko ntatinde mu mifuka yabo kuko bari barayashoye mu bikorwa byo kwiyamamaza n’indi myiteguro inyuranye, rimwe na rimwe basaga n’abagwa mu gihombo. Ukurikije ibyakorwaga byose ingengo y’imari yakoreshejwe muri iri rushanwa ibarirwa mu mamiliyari n’ubwo abariteguraga batifuje kuyitangaza.


Riderman ni we muraperi wa mbere watwaye PGGSS

INYARWANDA yakusanyije umubare w’amafaranga ashobora kuba yarinjiye mu mufuka wa buri muhanzi, hatitawe ku yandi yaba yaramutanzweho, ayahembwe abacuranzi, abacunga umutekano, abagize akanama nkempurampaka, abashyushya rugamba, imodoka, hoteli, gutumira abahanzi bo muri Amerika, ibyuma n’indi byakenerwaga. Aya mafaranga agera kuri miliyoni 709 z’amafaranga y’u Rwanda.

Muri 2011 nibwo hatangiye irushanwa rya PGGSS. Ryegukanywe na Tom Close wahembwe amafaranga miliyoni 24 mu byiciro anakorana indirimbo n’icyamamare Sean King Stone.

Akimara gutwara igihembo yahawe sheki y’amafaranga miliyoni eshashatu, ahabwa izindi miliyoni eshashatu zo gutegura igitaramo n’umushahara wa miliyoni imwe buri kwezi nawo ungana na miliyoni 12 mu mwaka wose.

Abandi bamukurikiye icyo gihe nta kintu babonye kirenze umushahara wa miliyoni imwe buri kwezi bahembwaga mu gihe cy’amezi ane. Yose hamwe ni miliyoni 40. Kuri iyi nshuro ya mbere amafaranga yageze mu mifuka y’abahanzi agera muri miliyoni 64.


Dream Boys ni bo basaruye amafaranga menshi muri PGGSS

Muri PGGSS II umuhanzi wahize abandi ari we King James yahembwe Miliyoni 24 ziri mu byiciro bitandukanye. Miliyoni yahise azihabwa 6 cash, ahabwa miliyoni eshanu zo gutegura alubumu, izindi miliyoni esheshatu azihabwa mu gutegura igitaramo cyo kumurika alubumu, ahabwa miliyoni imwe yo gufata amashusho y’indirimbo imwe iri kuri iyo alubumu ubundi akajya ahabwa ibihumbi 500 buri kwezi mu gihe cy’umwaka nabyo bingana na miliyoni 6.

Icyo gihe Jay Polly wa kabiri yahembwe amafaranga Miliyoni eshatu. King James na Jay Polly bageze ku cyiciro cya nyuma bahawe ibihumbi 500 kuri buri umwe byo kwitegura igitaramo bahuriyemo na Jason Derulo.

Aya yose yazaga yiyongera ku mushahara wa miliyoni imwe buri kwezi yahabwaga buri muhanzi mu gihe cy’amezi atanu irushanwa ryamaze. Imishahara ubwayo ni miliyoni 50. Igiteranyo cy’imishahara n’ibihembo ku bahanzi bonyine ni miliyoni 78 z’amafaranga y’u Rwanda.


Jay Polly yashyikirijwe igikombe n'uwari Minisitiri w'Umuco na Siporo, Joseph Habineza

Muri PGGSS III Riderman yabaye uwa mbere ahembwa miliyoni 24, Urban Boys babaye aba kabiri bahabwa amafaranga miliyoni enye, Butera Knowless wabaye uwa gatatu yahawe miliyoni 3, Dream Boys babaye aba kane bahabwa miliyoni ebyiri mu gihe Mico The Best wabaye uwa gatanu yahawe miliyoni imwe n’ibihumbi 500.

Uyu mwaka wagize umwihariko kuko hitabiriye abahanzi 11 bitewe nuko hari abahanzi babiri banganyije amanota. Icyo gihe buri muhanzi yahabwaga amafaranga ibihumbi 500 yo kwitegura, akanagenerwa miliyoni imwe buri kwezi.


Knowless Butera ni we muhanzikazi wegukanye iri rushanwa

Mu gihe cy’amezi atanu iri rushanwa ryamaze buri muhanzi wabaga aririmo yahembwaga miliyoni imwe buri kwezi. Ni ukuvuga miliyoni 55. Igiteranyo kuri yose ni 95.000.000.

Muri PGGSS IV Jay Polly wayegukanye yahembwe miliyoni 24, Dream Boys, bahembwa miliyoni zirindwi n’ibihumbi 500 naho Bruce Melody wabaye uwa gatatu ahabwa miliyoni zirindwi. Aba kandi bahembwe ibyuma bya muzika.

Uwa Kane yabaye Christopher ahembwa miliyoni 3,5, itsinda rya Active ryahembwe miliyoni 3, Ama G The Black ahembwa miliyoni 2,5, Jules Sentore ahembwa miliyoni 2, Senderi International Hit ahembwa miliyoni 1,5, Young Grace ahembwa Miliyoni 1, Teta Diana ahembwa ibihumbi 500.

Imishahara yo mu gihe cy’amezi atanu irushanwa ryamaze ingana na miliyoni 50 wateranyaho n’ibihembo bikaba miliyoni 100 n’ibihumbi 500.

PGGSS V yegukanywe na Butera Knowless wahembwe miliyoni 24, Bruce Melody wamuguye mu ntege yahembwe miliyoni zirindwi n’ibihumbi 500, Dream Boys bafashe umwanya wa gatatu bahembwa miliyoni zirindwi.

Umuraperi Bull Dogg yabaye uwa kane yahembwe miliyoni eshatu n’ibihumbi 500, itsinda rya Active rifata umwanya wa gatanu n’igihembo cya miliyoni eshatu, Jules Sentore wakurikiyeho yahembwe miliyoni ebyiri n’ibihumbi 500.

Senderi International yahembwe miliyoni ebyiri, Oda Paccy ahembwa miliyoni imwe n’ibihumbi 500, Rafiki ahembwa miliyoni imwe naho itsinda rya TNP rihembwa ibihumbi 500. Imishahara y’amezi atanu ni miliyoni 50 wakongeraho ibihembo bikaba miliyoni 102 n’ibihumbi 500.

Muri PGGSS VI Itsinda rya Urban Boys ryahize abandi, Bralirwa yabageneye miliyoni 24 z’amafaranga y’u Rwanda. Christopher wabaye uwa kabiri ahabwa 7,500,000 naho umuhanzi wa gatatu ari we Bruce Melody yatahanye miliyoni zirindwi. Uhereye kuwa kane gusubira inyuma bagiye barushanwa ibihumbi magana atanu gusa umuhanzi wa cumi we yahembwe ibihumbi 500 gusa.


Urban Boys begukanye PGGSS bakiri kumwe na Safi Madiba

Imishahara y’amezi atanu ingana na miliyoni 50 wakongeraho ibihembo byose hamwe bikaba miliyoni 102 n’ibihumbi 500. PGGSS VII yegukanywe n’itsinda rya Dream Boys naryo rihabwa amafaranga miliyoni 24. Bitandukanye n’imyaka yari yabanje hahembwe abanzi batatu.

Christopher wabaye uwa kabiri yahembwe amafaranga 4.500.000 naho Bull Dogg wabaye uwa gatatu ahembwa 4.000.000. Imishahara y’abahanzi mu gihe cy’amezi mu gihe cy’amezi ane yari miliyoni 40 byose hamwe bikaba miliyoni 72 n’ibihumbi 500.

Primus Guma Guma Super Star yabaye bwa nyuma ni iya munani. Yegukanywe na Bruce Melody wahembwe miliyoni 20, Christopher watowe n’abafana benshi akanaba uwa kabiri yahembwe 19.500.000.

Itsinda rya Active ryabaye irya gatatu rihembwa miliyoni enye, Uncle Austin aba uwa kane ahembwa miliyoni eshatu n’igice mu gihe Queen Cha wabaye uwa gatanu yahembwe miliyoni 3.

Abahanzi baririmba mu matsinda bongerewe umushahara wa buri kwezi bahabwa miliyoni imwe n’ibihumbi 500 mu gihe abahanzi bikorana ku giti cyabo bakomeje guhembwa miliyoni imwe. Muri iki gihe cy’amezi ane imishahara y’abahanzi ingana na miliyoni 44.

Igiteranyo amafaranga yinjiye mu mifuka y’abahanzi muri 2018 ni miliyoni 94. Dream Boys na Bruce Melody ni bo basaruye akayabo. N’ubwo iri rushanwa ryitabiriwe n’abahanzi batandukanye ariko hari ababyungukiyemo kurusha abandi.

Dream Boys begukanye ubwa mbere milliyoni ebyiri bahembwe muri PGGSS III ubwo batsindiraga umwanya wa gatatu, miliyoni zirindwi n’ibihumbi 500 bahembwe muri PGGSS IV ubwo bafataga umwanya wa kabiri, miliyoni 7 bahembwe muri PGGSS V ubwo bafata umwanya wa gatatu, na miliyoni 24 bahembwe ubwo batwara iri rushanwa muri 2017. Yose hamwe akaba ari 40,500,000 Frw.

Bruce Melody yahembwe miliyoni zirindwi muri PGGSS IV ubwo yabaga uwa gatatu, yongera gutsindira izindi miliyoni zirindwi n’ibihumbi 500 muri PGGSS V, agaruka muri 2018 yegukana igihembo cya miliyoni 20. Yose hamwe ni miliyoni 35.


Bruce Melody ni we muhanzi ku giti cye wasaruye akayabo muri PGGSS

Umwanditsi: Muvunyi Arsene






TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND