Inyarwanda art Studio
Kigali

CAF: Rayon Sports izahura na Al-Hilal mu gihe AS Kigali iri kumwe na KMC ya Mugiraneza Jean Baptiste Miggy

Yanditswe na: Mihigo Saddam
Taliki:21/07/2019 18:38
0

Muri tombola y’uko amakipe azahura mu mikino ya Total CAF Champions League 2019-2020, ikipe ya Rayon Sports yisanze iri kumwe na Al-Hilah yo muri Sudan iheruka guhura na Mukura VS mu gihe AS Kigali izahura na KMC yo muri Tanzania.



KMC ni ikipe yo muri Tanzania iheruka mu mikino ya CECAFA Kagame Cup 2019 aho yari mu itsinda rya mbere (A) yahuriragamo na Rayon Sports, Atlabara na TP Mazembe.

Al-Hilal yo muri Sudan iheruka mu Rwanda ubwo yakinaga na Mukura Victory Sport mu karere ka Huye ubwo bari mu ijonjora rya gatatu mu mikino ya Total CAF Confederation Cup 2018-2019.


Rayon Sports izakina Total CAF Champions League kuko yatwaye igikombe cya shampiyona 2018-2019

Imikino ya Total CAF Champions League 2019-2020 irimo Rayon Sports, ni irushanwa rihuza amakipe yatwaye ibikombe bya shampiyona. Iri rushanwa rizatangira hagati ya tariki 9-10 Kanama 2019 bakina umukino ubanza ubwo izaba yakira Al-Hilal (South Sudan) mbere y'uko bazakina umukino wo kwishyura hagati ya tariki 22-24 Kanama 2019.


Al Hilal FC ubwo yari i Huye yaje gusura Mukura VS 

Ikipe izatambuka hagati ya Rayon Sports na Al-Hilal izahura hagati n’iyizava hagati ya Enyimba SC (Nigeria) na Rahimo FC kuko bazahura mu ijonjora rya mbere.

Ku rundi ruhande, imikino ya Total CAF Confederation Cup 2019-2020, AS Kigali izakira KMC hagati ya tariki ya 9 Kanama na tariki ya 11 Kanama 2019 mu mukino ubanza mbere y’uko hakinwa imikino y’ijonjora rya kabiri. Umukino wo kwishyura uzakinwa hagati ya tariki 23-25 Kanama 2019.

KMC ni ikipe yo muri Tanzania yari mu mikino ya CECAFA Kagame Cup 2019 ikahava inasinyishije Mugiraneza Jean Baptiste Miggy umunyarwanda ukina hagati mu kibuga.


KMC izagaruka mu Rwanda mu kwezi gutaha 

Ikipe izava hagati ya KMC na AS Kigali izahura n’iyizava hagati ya Proline FC (Uganda) na Masters Security Services (Malawi).


AS Kigali izakina Total CAF Confederation Cup kuko yatwaye igikombe cy'Amahoro 2019








Bahaus

Inyarwanda BACKGROUND