Airtel Rwanda
Kigali

Nyandwi Saddam, Ndacyayisenga Ally, Kwizera Janvier na Japhet Imurora ku rutonde rw’abakinnyi Etincelles FC yifuza

Yanditswe na: Mihigo Saddam
Taliki:17/06/2019 18:33
0

Mu gihe amwe mu makipe yo mu Rwanda arimbanyije muri gahunda yo kurambagiza abakinnyi, Etincelles FC bacitswe n’urutonde rw’abakinnyi bifuza kuzaba bafite mu mwaka w’imikino 2019-2020.



Ku rutonde INYARWANDA ifitiye kopi hariho abakinnyi 24 ikipe ya Etincelles FC yumva izaba ifite mu mwaka w’imikino 2019-2020. Aba bakinnyi barimo abashya n’abasanzwemo barangije amasezerano bagomba guhabwa andi.

Abakinnyi basanzwe muri Etincelles FC bagifite amasezerano ntabwo bari kuri uru rutonde kuko bakiri abakozi b’ikipe. Gusa, umukinnyi wasoje amasezerano akaba atari kuri uru rutonde n’uko abayobozi b’ikipe batamufite mu mibare mu gihe uwo bashaka yaba yabonetse. Abasoje amasezerano bari ku rutonde nuko hari gahunda yo kubaha andi.

Nyandwi Saddam myugariro w’iburyo mu ikipe ya Rayon Sports kuva mu 2017 ari ku rutonde rw’abakinnyi bakina inyuma bifuzwa na Etincelles FC dore ko uyu musore yasoje amasezerano muri Rayon Sports ifite igikombe cya shampiyona 2018-2019.


Nyandwi Saddam arashakwa na Etincelles FC

Moussa Ally Sova wakunze kuba kapiteni wa Sunrise FC nyuma akaza kubyanga akaba akina hagati mu kibuga, ari ku rutonde rw’abakinnyi bifuzwa na Etincelles FC.


Moussa Ally Sova umukinnyi wo hagati muri Sunrise FC

Ndacyayisenga Ally watandukanye na FC Bugesera mbere y’uko shampiyona 2018-2019 irangira, ari ku rutonde rw’abakinnyi 24 Etincelles FC yifuza kuzaba ifite muri 2019-2020 aho ari mu bazaba bakina inyuma ku ruhande rw’iburyo no mu mbavu z’ikibuga.


Ndacyayisenga Ally umukinnyi ukina impande zose z'ikibuga

Kwizera Janvier bita Rihungu ni umunyezamu mu ikipe ya Bugesera FC wanasoje amasezerano yari afitanye n’iyi kipe iba i Nyamata, uyu musore nawe ari ku rutonde rw’abakinnyi bifuzwa na Etincelles FC kuzaba ari mu izamu afatanya na Hategekimana Bonheur umunyezamu wabuze umwanya wo gukina muri AS Kigali.


Kwizera Janvier umwe mu banyezamu u Rwanda rufite bafite impano

Niyitegeka Idrissa akina hagati muri Bugesera FC ariko kuri ubu akaba ashakwa cyane n’ikipe ya Etincelles FC n’ubwo uyu musore agifite amasezerano y’umwaka umwe muri Bugesera FC.


Niyitegeka Idrissa (Umutuku) nawe arashakwa na Etincelles FC

Amakuru agera ku INYARWANDA nuko Niyitegeka ari mu karere ka Rubavu dore ko ari naho avuka ariko akaba ari mu biganiro n’ikipe ya FC Etincelles mu kuba yayikinira umwaka utaha w’imikino biciye mu bwumvikane Bugesera FC yagirana na Etincelles FC.

Etincelles FC kandi irifuza ko yazakorana na Muhoza Tresor wa Kirehe FC wanasoje amasezerano, Kikunda Musombwa Patrick bita Kaburuta wa Musanze FC kuko yagezeyo avuye muri Etincelles FC, Norman Ogik ukinira Police FC muri Uganda na Imurora Japhet ukina muri Musanze FC.


Kikunda Musombwa Patrick bita Kaburuta 

Aba bakinnyi biyongeraho Ishimwe Christian ukina inyuma ahagana ibumoso muri FC Marines, ikipe ihora ihanganye na Etincelles FC.


Ishimwe Chtristian (6) arashakwa muri Etincelles FC avuye muri Marines FC 

Dore urutonde rw’abakinnyi Etincelles FC yifuza kuzaba ifite mu 2019-2020:

Abanyezamu: Kwizera Janvier (Bugesera FC), Hategekimana Bonheur (AS Kigali).

Abakina inyuma: Nyandwi Saddam (Rayon Sports), Hakizimana Abdoul Karim (Etincelles FC), Ndacyayisenga Ally (Bugesera FC), Nahimana Isiaka (Etincelles FC), Kayenga Toussaint (Etincelles Junior), Nkuranga Fiacre (Nta kipe afite), Ishimwe Christian (FC Marines), Iddy Djumapili (Etincelles FC), Nshimiyimana Abdoul Papy (Etincelles FC), Rucogoza Aimable (Etincelles FC).

Abakina hagati: Niyitegeka Idrissa (Bugesera FC), Nduwimana Michel (Etincelles FC), Sibomana Guy Borris (Les Lierres FC), Mpore Arsene (Nta kipe afite),Kwizera Eric (Les Lierres FC), Nduwimana Danny (Atletico FC/Burundi), Muhoza Tresor (Kirehe FC), Moussa Ally Sova (Sunrise FC), Kikunda Musombwa Patric (FC Musanze).

Abataha izamu: Norman Ogik (Police FC/Uganda), Imurora Japhet (Musanze FC) na Mumbele Saiba (Claude).


Urutonde rw'abakinnyi bifuzwa muri Etincelles FC 2019-2020  





TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND