Inyarwanda art Studio
Kigali

HEROES CUP 2019: APR FC yabonye amanota atatu ya mbere inyagiye Etincelles FC-AMAFOTO

Yanditswe na: Mihigo Saddam
Taliki:29/01/2019 19:00
1

Ikipe ya APR FC yanyagiye Etincelles FC ibitego 4-0 mu mukino w’umunsi wa kabiri w’irushanwa ry’Intwari 2019, bituma APR FC ibona amanota yayo ya mbere muri iri rushanwa.



Ibitego bya APR FC byatsinzwe na Hakizimana Muhadjili, Nshuti Dominique Savio, Mugunga Yves na Jean Bosco Akayezu myugariro wa Etincelles FC witsinze igitego.

Ni APR FC yaherukaga gutsindwa na AS Kigali igitego 1-0 mu mukino w’umunsi wa mbere w’irushanwa. Jimmy Mulisa yari yakaniye uyu mukino azana abakinnyi bakomeye bitandukanye n’abo yari yitabaje mu mukino batsinzwemo na AS Kigali.


Hakizimama Muhadjili yatsinze igitego muri uyu mukino

Birumvikana APR FC ni yo yafunguye amazamu ku munota wa 30’ w’umukino ku gitego cyatsinzwe na Nshuti Dominique Savio, Hakizimana Muhadjili yunzemo ikindi ku munota wa 62’ mbere y'uko Mugunga Yves ashyiramo igitego cya gatatu ku munota wa 86’. 

Ni igitego cye cya mbere atsindiye APR FC nyuma yo y'uko yari yinjiye asimbuye Sugira Ernest ku munota wa 45’. Igitego cya kane cya APR FC cyatsinzwe na Jean Bosco Akayezu ku munota wa 47’ aho nka myugariro wa Etincelles FC yari ateye umupira asubiza inyuma ashaka guha Mbarushimana Emile bita Rupali wari mu izamu.


Imanishimwe Emmanuel umwe mu bakinnyi batakinnye umukino ubanza bari bagarutse

Wari umukino ikipe ya Etincelles FC yabanje kwihagararaho mu minota ya mbere y’umukino ndetse ukabona APR FC irakina isa n'aho ifite ubushake bucye cyane hagati mu kibuga. Gusa, ubwo APR FC yari imaze kubona igitego, abakinnyi bayo barimo; Nshuti Dominique Savio, Ntwari Evode, Buteera Andrew na Imanishimwe Emmanuel batangiye kotsa igitutu ikipe ya Etincelles FC bityo banatangira gukora amakosa yabaviriyemo ibitego.


Tuyisenge Hackim imbere ya Sugira Ernest (16)

Jimmy Mulisa umutoza wa APR FC yari yakoze impinduka mu bakinnyi 11 kuko Kimenyi Yves (GK), Rusheshangoga Michel, Imanishimwe Emmanuel, Nshimiyimana Amran, Nshuti Dominique Savio bari babanje mu kibuga mu gihe abakinnyi batanu bari babanje mu kibuga ku mukino wa AS Kigali bari babanje hanze. Abo bakinnyi barimo; Ntwari Fiacre (GK), Rukundo Denis, Sekamana Maxime, Issa Bigirimana na Songayingabo Shaffy.


Abakinnyi ba APR FC bishimira igitego

Ku ruhande rwa Etincelles FC ntabwo bari bakoze impinduka nyinshi kuko mu izamu hari hajemo Mbarushimana Emile asimbura Nsengimana Dominique wakinnye na Rayon Sports mu gihe Muhanuka Eric yari yaje mu mwanya wa Niyibizi Ramadhan wabanjemo batsindwa (2-0) na Rayon Sports.


Sugira Ernest (16) yakinnye iminota 44' ahita agira ikibazo mu kibero

Mu gukora impinduka bashaka amanota atatu, APR FC bafashe umwanzuro wo gusimbuza kuko Ntwari Evode yasimbuye Nizeyimana Mirafa, Rukundo Denis asimbura Rusheshangoga Michel wari wabanje mu kibuga ari kapiteni, Iranzi Jean Claude asimbura Hakizimana Muhadjiliwari wakomeretse ahagana ku ivi mu gihe Nkizingabo Fiston yasimbuye Buteera Andrew wasaga n'aho yananiwe bitewe n’igihe yari amaze adakina.


Rusheshangoga Michel (22) yabanje mu kibuga ari na kapiteni

Ku ruhande rwa Etincelles FC, Dusange Bertin yasimbuye Hakizimana Abdoul Kalim, Uwimana Guilain asimbura Nduwimana Michael, Hatungimana Yannick asimbura Muhanuka Eric mu gihe Ndagijimana Ewing yahawe umwanya agasimbura Akayezu Jean Bosco witsinze igitego.

Nyuma y’imikino ibiri, ikipe ya APR FC ifite amanota atatu (3) n’ibitego bitatu (3) izigamye mu gihe Etincelles FC nta nota ifite ahubwo ikaba ifite umwenda w’ibitego bitandatu (6).

Abakinnyi babanje mu kibuga:

APR FC XI: Kimenyi Yves (GK, 21), Imanishimwe Emmanuel 24, Rusheshangoga Michel (C,22), Buregeya Prince Caldo 18, Rugwiro Herve 4, Nizeyimana Mirafa 6, Nshuti Dominique Savio 27, Buteera Andrew 20, Sugira Ernest 16, Nshimiyimana Amran 5, Hakizimana Muhadjili 10.


11 ba APR FC babanje mu kibuga

Etincelles FC XI: Mbarushimana Emile (GK,1), Mumbele Saiba Claude (C,13), Akayezu Jean Bosco 7, Nahimana Isiaq 11, Tuyisenge Hackim 8, Turatsinze Heritier 16, Muhanuka Eric 6, Djumapili Iddy 14, Ngabo Mucyo Fred 6, Nduwimana Michael 10, Hakizimana Abdou Kalim 25


11 ba Etincelles FC babanje mu kibuga

PHOTOS: Saddam MIHIGO (Inyarwanda.com)


ANDI MAFOTO







IBITECYEREZO

  • eric.RIZINJIRABAKE7 months ago
    Muturaje.neza.mukomerezaho!


Bahaus

Inyarwanda BACKGROUND