iTel
Kigali

Incamake kuri Nimwiza Meghan wegukanye ikamba rya Nyampinga w’u Rwanda 2019-AMAFOTO+VIDEO

Yanditswe na: Janvier Iyamuremye
Taliki:28/01/2019 7:06
1

Ni mwiza koko! Umukobwa witwa Nimwiza Meghan wari uhagarariye Umujyi wa Kigali mu irushanwa rya Miss Rwanda ni we wegukanye ikamba rya Nyampinga w’u Rwanda 2019 ahigitse abakobwa 5 bari bahataniye ikamba.



Ni mu birori byabereye muri Intare Conference Arena ku wa Gatandatu tariki 27 Mutarama 2018, gusa yatangajwe ku isaha saa sita n’iminota 02’ kuri iki Cyumweru tariki 27 Mutarama 2019. Yasimbuye Iradukunda Liliane wari umaranye iri kamba umwaka wose.

Meghan, yitiranwa n’umugore w’igikomangoma cy’u Bwongereza Harry! Ubuzima we buhinduriwe mu maso y’abari bakurikiranaga umuhango wo gutoranya Nyampinga w’u Rwanda 2019.

Uyu mukobwa yari yatangajwe mu bakobwa batanu bahatanira kuvamo Nyampinga w’u Rwanda aribo: Gaju Anita wambaye nimero 35, Nimwiza Meghan wambaye nimero 32, Ricca Michaella Kabahenda (No.9), Uwihirwe Yasipi Casmir (No.21), Uwase Sangwa Odile (No.16).

Nimwiza Meghan yahawe imodoka!

Nimwiza azajya ahembwa ibihumbi 800 Frw buri kwezi. Azajya ahabwa ibikoresho by’isuku, amavuta, imodoka yo kugendamo n’ibindi byinshi bifunguye ubuzima bushya. Igisonga cya mbere yahawe Miliyoni imwe (1,000,000 Frw), Igisonga cya kabiri ahabwa ibihumbi magana atanu (500,000 Frw).

Nimwiza Meghan yatunguwe bakimutangaza ko ariwe wegukanye ikamba, yarize! Mu rugendo ahatanira ikamba, yigaragaje nk’umukobwa w’ikimero, kuvugira mu ruhame abigira iturufu ikomeye by’akarusho anogera benshi mu gutondekanya ibitekerezo bye yisunze ururimi rw’icyongereza.

Uyu mukobwa yari yambaye nimero 32 mu irushanwa rya Miss Rwanda 2019. Yinjiye mu irushanwa ku itike y’Umujyi wa Kigali ari kumwe na Gakunde Iradukunda Prayer (No.4); Niyonshuti Assoumpta (No.1), Ibyishaka Aline (No.14) , Umutoni Grace (No.17) ndetse na Uwase Sangwa Odile (No.25).

Miss Rusaro Carine, yavuze ko guhitamo Nyampinga w’u Rwanda 2019, bitari byoroshye. Ati “…Gutora Nyampinga w’u Rwanda kuri uyu mugoroba (kuwa 6) ntabwo kari akazi koroshye kubona bariya batanu. Twagendeye uko batuje imbere, ibyo navuga muri macye bwa bwiza n'uburanga, buri mu bagize akanama nkemurampaka agenda atanga amanota. Twagendeye ku buryo badusubijemo ndetse n’ireme ry’ibisubizo.”

Ibi ni byo byashingiweho Nimwiza Meghan agirwa Nyampinga w’u Rwanda. Yagaragiwe n’abakobwa barimo Mwiseneza Josiane wabaye Miss Popularity, Uwase Sangwa Odile wagizwe igisonga cya kabiri, mu gihe Uwihirwe Yasipi Casmir yabaye igisonga cya Mbere.

Mu kiganiro yahaye INYARWANDA, bari mu mwiherero w’irushanwa rya Miss Rwanda 2019, yatangaje ko kujya muri ‘boot camp’ yumvaga abifitiye ubwoba. Ati “Naje mfite ubwo bwo kubana n’abandi numvaga hashobora kuba harimo nka […] bafite imico itandukanye. Byarantunguye kumva abantu bose twakorana.”

Yagize ati “Umushinga nawise ‘urubyiruko kwitabira gukora ubuhinzi’ . Ni cyo numvise nshaka cyane biragaragara y’uko Leta ibishyiramo imbaraga ariko ntabwo urubyiruko rurumva cyane akamaro k’ubuhinzi.” Yavuze ko azaganiriza abantu batandukanye bashinzwe urubyiruko bamuhuze nabo abereke ko aribo maboko y’igihugu, abasobanura ko ubuhinzi bufatiye runini igihugu cy’u Rwanda.

Irushanwa rya Miss Rwanda 2019 ryatangiye mu Ukuboza 2018, imibare igaragaza ko hiyandikishije abakobwa 340 mu Ntara enye n’umujyi wa Kigali, haje kuvamo 37 bagiye gutoranywamo 20 berekeza mu mwiherero. Mu Ntara enye hatoranyijwe abakobwa 31, Umujyi wa Kigali uhagararirwa n’abakobwa 6.

AMAFOTO:

Yegukanye ikamba asimbura Miss Iradukunda Liliane.

Miss Iradukunda Liliane watanze ikamba.

Casmir Yassip, Igisonga cya mbere.

Odile Uwase yambitswe ikamba ry'igisonga cya kabiri.

MEGHAN AKIRI MU MWIHERERO ASOBANURA UMUSHINGA WE

MEGHAN ASOBANURA UMUSHINGA WE IMBERE

NIMWIZA MEGHAN YAMBITSWE IKAMBA

AMAFOTO: Cyiza Emmanuel-INYARWANDA.COM

VIDEWO: Nsengiyumva Emmanuel-INYARWANDA.COM

ANDI MAFOTO







IBITECYEREZO

  • Maurice4 months ago
    Nuyu twari dutegereje rwose


Inyarwanda BACKGROUND

Copyright © 2008-2019 Inyarwanda Ltd
RSS