RFL
Kigali

Umunyarwandakazi Eliane Umuhire yegukanye igihembo cy'umukinnyikazi wa filime mwiza mu iserukiramuco rya sinema rikomeye ku isi

Yanditswe na: Mupende Gedeon Ndayishimiye
Taliki:9/07/2017 10:35
2

Umukinnyi wa filime usanzwe uzwi mu gukina amakinamico Eliane Umuhire yegukanye igihembo cy'umukinnyi wa filime w'umugore mu iserukiramuco rya sinema rya Karlovy Vary Film Festival ryabaga ku nshuro ya 52.



Ni iserukiramuco ryaberaga mu gihugu cya Repubulika ya Czech kuva Kuwa 30 Kamena kugeza kuri uyu wa 8 nyakanga abikesha filime Birds are singing in Kigali. Iyi filime Umuhire akinamo yitwa Claudine, umwana w'imfubyi wiciwe ababyeyi mu gihe cya Jenoside yakorewe Abatutsi mu Rwanda mu 1994, akaza kurokorwa n'umuganga w'umunya-pologne wakoranaga n'ababyeyi be akamujyana iwabo,  yatsindiye iki gihembo mu gihe benshi mu bakunzi ba filime ndetse n'abakora ubusesenguzi kuri filime bari batangajwe n'uburyo yitwaye muri iyi filime.

Iyi filime ni iy'umugore n'umugabo b'abanya-Pologne Joanna Kos-Krauze n'umugabo we Krzystof Krauze. Iyi filime yakorewe mu gihugu cya Pologne ndetse no mu Rwanda, yerekanwe bwa mbere mu iserukiramuco rya sinema rya Karlovy Vary Film Festival ryaberaga mu gihugu cya Repubulika ya Czech kuva tariki 30 Kamena kugeza kuri uyu wa 8 Nyakanga, rikaba rimwe mu maserukiramuco ya sinema akomeye ku isi aho ryari ribaye ku nshuro ya 52.

Umuhire Eliane

Umuhire Eliane yegukanye igihembo mu iserukiramuco rya sinema rikomeye ku isi

Mu mwaka wa 2014, ubwo umushinga w'iyi filime wari ugezemo hagati, Krzystof Krauze wari uri kuyobora iyi filime yitabye Imana azize indwara ya cancer bituma umugore we Joanna afata uyu mushinga mu maboko ye arayikora arayisoza.

Ibinyamakuru bitandukanye byandika kuri sinema byatangajwe n'uburyo Umuhire Eliane yakinnye muri iyi filime. Umusesenguzi wa filime Guy Lodge wandikira ikinyamakuru Variety kizwi gukora ubusesenguzi kuri filime, mu magambo y'icyongereza twagenekereje mu kinyarwanda yagize ati, "Abakinnyi bose bagerageje gukina neza, ariko by'umwihariko Umuhire yagaragaje ingufu zidasanzwe mu gukina Claudine uba arwana n'umujinya ndetse n'agahinda gasaze."

Umuhire Eliane yasangiye iki gihembo na Jowita Budnik bakinana muri iyi filime, bombi bakaba bahembewe uko bitwaye muri Birds are Singing in Kigali. Akimara kucyegukana yagaragaje ibyishimo mu magambo yanditse ku rubuga rwe rwa Facebook agira ati, "Umutima wanjye urasingiza Nyagasani. [Natsindiye] igihembo cy'umukinnyi mwiza w'umugore muri Karlovy Vary Film Festival [yabaga] ku nshuro ya 52."

Mu yandi magambo kandi yaje kongera ku rubuga rwe rwa Facebook, Umuhire yongeyeho ati, "Ubuzima, mu mpande zose mbutuye iki gihembo. Jowita, warakoze gufatanya nanjye uru rugendo. Nishimiye ndetse kandi ndashimira ku bw'ibi bihe. Ku ikipe yose, yaba iyo mu Rwanda no muri Pologne, umutima wanjye wuzuye amashimwe."

Umuhire Eliane

Filime "Little Crusader" yo mu gihugu cya Repubulika ya Czech niyo yegukanye igihembo gikuru cya filime nziza, bakaba hari hashize imyaka igera kuri 15 nta filime yo muri iki gihugu itwara iki gihembo. Nk'umukinnyi w'amakinamico, Eliane Umuhire yamenyekanye cyane mu itorero rya Mashirika. Nk'umukinnyi wa filime kandi, Eliane Umuhire yagaragaye muri filime Things of Aimless Wanderer ya Kivu Ruhorahoza.

Umuhire ElianeUmuhire ElianeUmuhire Eliane

Eliane Umuhire yegukanye igihembo cy'umukinnyikazi wa filime mu iserukiramuco Karlovy Vary Film Festival






TANGA IGITECYEREZO

Izina ryawe
Email yawe
Andika igitecyerezo

IBITECYEREZO

  • Bamporiki 3 years ago
    Congratulations my dear sister Eliane This is a great achievement, for you and for all Rwandan filmmakers. Proud of you.
  • 3 years ago
    congz sister


Inyarwanda Art Studio

Inyarwanda Art studio
Inyarwanda BACKGROUND