Harmonize yifurije isabukuru nziza umugore we Sarah abakunzi be batungurwa n’uko umugore we yagaragaye ku ifoto

Mu butumwa yashyize ku rukuta rwe rwa Instagram, Rajabu Abdul Kahali uzwi nka Harmonize nk’izina ry’ubuhanzi yabuherekesheje ifoto y’umugore we Sarah Michelloti ari mu mwambaro udoze mu gitenge. Yamushimiye kuba bamaranye imyaka 4 babana ndetse amwifuriza ishya n’ihirwe mu byo arota kugeraho mu buzima.

Harmonize n'umugore we Sarah Michelotti 

Harmonize ukunda kwiyita Konde Boy yagize ati:”Warakoze...Mwamikazi ku bw’imyaka 4, Imana iguhe umugisha. Wishimire umunsi wawe. Ndakwifuriza ishya n’ihirwe ku nzozi zawe wifuza kugeraho.” Nyuma y’ubu butumwa Sarah nawe yahise umusubiza amubwira ko nawe amwifuriza ibyiza ndetse amushimira ku bw’ubutumwa yamugeneye ku isabukuru ye.

Nyuma y’ubu butumwa, abakunzi b’uyu muhanzi batunguwe n’uko uyu mugore yagaragaraga ku ifoto, kuko bari bazi ko atwite yitegura kubyara nk'uko Harmonize yari aherutse kubabwira ko we n’umugore we bitegura kunguka umwana.

Ifoto ya Sarah Michelotti Harmonize yasangije abakunzi be

Kuwa 8 Kanama ubwo uyu muhanzi yari ku rubyiniriro mu mujyi wa Dodoma muri Tanzaniya yatunguye abakunzi be ababwira ko ari hafi kuba umubyeyi. Ubwo yari ku rubyiniriro yagize ati: ”Bidatinze magingo aya, turitegura kunguka umwana kubera ko Sarah atwite ubu tubivuga.” Iyi nkuru yashimishije cyane abakunzi be bari muri Jamhuri Stadium.

Src: Tuko