Amerika: FBI irashinja Iran n’u Burusiya kuba inyuma y'igitero cyagabwe ku makuru y'abatora no kubatera ubwoba hifashijwe Proud Boys

Mu gihe kingana n’iminsi igera kuri 13 ibura ngo amatora y’umukuru w’igihugu muri Leta Zunze Ubumwe za Amerika abe hatangiye kuvugwa uruntu runtu. Ikoranabuhanga ni kimwe mu biraje ishinga benshi kandi rinabateye inkeke ku bijyanye n'aya matora ya Amerika.

Kuri iyi nshuro FBI yatangaje ko ubutumwa bwoherejewe bamwe mu batuye muri Amerika bushobora kuba bwoherejwe n'abegamiye kuri bwana Donald Trump nk'uko byatangajwe na bwana John Ratcliffe ukuriye ubu butasi ku rwego rw'igihugu.

John Ratcliffe yanavuze ko abategetsi bo muri Amerika basanze Iran n'Uburusiya byarageze "ku makuru amwe ajyanye no kwiyandikisha kw'abatora".

Ibi biri kwibazwa mu gihe amatora abura iminsi 13 ngo abe

Ikigo cy’ubutasi mu kiganiro n'abanyamakuru cyabaye bisa n'ibitunguranye ubundi kidasanzwe kibaho amatora ya Perezida yegereje, kigaragara nk'icyemezo cy'impungenge leta ifite ku kwivanga mu bikorwa byo gutora no gukwirakwiza amakuru ayobya ibikorwa n'ibihugu bimwe by'amahanga.

Bwana Ratcliffe yavuze ko "emails mpimbano" za Iran bivugwa ko zoherejwe n'itsinda Proud Boys "mu rwego rwo gutera ubwoba abatora, guteza imidugararo no kwangiza" Perezida Donald Trump.

Yongeyeho ko amakuru ajyanye n'abatora ashobora kwifashishwa mu kugerageza "gutanga amakuru atari ukuri ku biyandikishije gutora hizewe ko abatezamo urujijo n'akajagari kandi akabangamira icyizere mufitiye demokarasi y'Amerika".

Bwana Ratcliffe yavuze ko abakuriye ubutasi "batabonye ibikorwa nk'ibyo ku ruhande rw'Uburusiya", ariko ko bazi ko Uburusiya bufite amakuru amwe ajyanye n'abatora.

Muri leta nyinshi, amakuru ajyanye n'abatora araboneka k'uyasabye, uretse ko buri leta igira ibisabwa bitandukanye ku muntu ushobora gusaba amakuru ajyanye n'abiyandikishije gutora, amakuru ahari ndetse n'uburyo ashobora gukoreshwa, nkuko bivugwa n'ikigo National Conference of State Legislatures.

Bwana Ratcliffe yagize ati: "Niba wohererejwe email igutera ubwoba cyangwa ikuyobya, wigira ubwoba kandi wiyikwirakwiza". Yavuze ko ibi bikorwa byo gushaka kugena amahitamo y'abatora bo muri Amerika ari "amagerageza yafashe hasi [yo gupfunda imitwe] y'abaturwanya bitereye icyizere".

Ese ku ruhande rwa FBI yavuze iki?

                   Bwana Christopher Wray 

Christopher Wray ukuriye ikigo cy'ubutasi imbere muri Amerika, FBI, na we yitabiriye icyo kiganiro n'abanyamakuru cyarimo Bwana Ratcliffe. Yavuze ko uburyo bwo gutora muri Amerika bugifite umutekano kandi "bucyihagazeho". Bwana Wray yagize ati: "Mukwiye kugira icyizere ko ijwi ryanyu rizabarwa".

"Ibyavuzwe mbere bidafitiwe gihamya bitandukanye n'ibi, bikwiye kudashirwa amakenga". Uyu mukuru wa FBI nta yandi makuru yatanze k'ukuntu ayo makuru ajyanye n'abatora yagezweho cyangwa icyo Abarusiya bashobora kuba barimo kuyakoresha.

Mu mwaka wa 2016, inzego z'ubutasi z'Amerika zanzuye ko abiba amabanga kuri mudasobwa (hackers) bashyigikiwe n'Uburusiya bari inyuma y'ibikorwa byo kubangamira Hillary Clinton mu matora yahatanyemo na Donald Trump.

Inzego z'ubutasi z'Amerika zavuze ko abo ba-'hackers' bakoresheje ibitero byo kuri mudasobwa ndetse no gukwirakwiza amakuru y'ibinyoma ku mbuga nkoranyambaga. Iran ntabwo irashobora kugera ku kwiba amabanga y'Amerika ikoresheje uburyo bw'ikoranabuhanga.

Ubutumwa bwohererejwe abanyamerika buvuga iki?

Izo 'emails' zohererejwe abiyandikishije gutora bo mu ishyaka ry'abademokarate bo muri za leta nyinshi, harimo na leta ya Florida iba ari isibaniro mu matora, zibashishikariza gutora Bwana Trump, bitaba ibyo bakazibonera ibizababaho.

Ibitangazamakuru byo muri Amerika bivuga ko imwe muri izo 'emails' igira iti: "Uzatora Trump ku munsi w'amatora cyangwa tuzaze tukwereke".

"Hindura ishyaka wari urimo ube umurepubulikani kugira ngo utwereke ko ubu butumwa bwakugezeho kandi ko uzabukurikiza". Kugeza ejo ku wa gatatu, Abanyamerika barenga miliyoni 40 bari bamaze gutora mu buryo bwo gutora hakiri kare mbere y'umunsi nyirizina w'amatora wo ku itariki ya 3 y'ukwa 11.

Umurepubulikani Donald Trump w'imyaka 74 ahatanye n'umudemokarate Joe Biden w'imyaka 77.

Src: BBC, washingtonpost.com