RFL
Kigali

Breaking: Robertinho watoje Rayon Sports yagizwe umutoza mushya wa Gormahia

Yanditswe na: SAFARI Garcon
Taliki:10/10/2020 13:25
0

Nyuma y'amasaha 24 ikipe ya Gormahia itangaje ko yatandukanye n'uwari umutoza wayo Steve Polack ukomoka mu Bwongereza, imaze gutangaza ko Roberto Oliveira uzwi nka Robertinho ukomoka muri Brazil ariwe wagizwe umutoza mushya w'iyi kipe yo muri Kenya.



Robertinho watoje Rayon Sports yo mu Rwanda, akigeza muri 1/4 muri CAF Confederations Cup mu 2018, yasesekaye muri Kenya mu gitondo cyo kuri uyu wa gatandatu tariki ya 10 Ukwakira 2020, arasinya ahita atangazwa nk'umutoza mushya w'iyi kipe.

Umuyobozi w'iyi kipe, Ambrose Rachie, yagize ati: "Twishimiye gutangaza ko umutoza wacu mushya Roberto Oliveira yageze muri Kenya avuye muri Brazil. Afite ubunararibonye mu gutoza ku mugabane wa Afurika, byatumye amenya cyane umupira wa Afurika. Turatekereza ko azaba urufunguzo rwo kugera ku musaruro mwiza mu kibuga".

Mu myaka ibiri ishize, uyu munya-Brazil yasezereye ikipe ya Gormahia ari kumwe na Rayon Sports mu mikino ya CAF Confederations Cup.

Ubwo yageraga muri Kenya, Robertinho yatangaje impamvu yahisemo Gormahia mu makipe menshi yo kuri uyu mugabane yamwifuje ngo ayatoze nyuma yo gutandukana na Rayon Sports.

Yagize ati"Nyuma yo gutandukana na Rayon Sports, nakiriye ubusabe bw'amakipe atatu yansabaga kugaruka muri Afurika, yose narayangiye, gusa sinari guhakanira Gormahia ubwo yabinsabaga kubera ko ari ikipe nkunda, nkunda imikinire yayo, nagiye nyikurikirana kenshi mu mikino nyafurika. Nishimiye amahirwe nabonye yo kuyitoza".

"Mu myaka ibiri ishize nashoboraga kuza muri iyi kipe, gusa ntibyari gushoboka kuko ikipe natozaga ya Rayon Sports yari mu rugamba rwo guhatanira igikombe cya shampiyona, ntabwo byari gushoboka ko nza".

Robertinho yahawe amasezerano y'imyaka ibiri yo gutoza Gormahia.

Mubyo ubuyobozi bwa Gormahia bwasabye Robertinho, harimo kuzea iyi kipe kure mu mikino nyafurika, kuko ibikombe by'imbere mu gihugu byo basanzwe babitwara.

Gormahia yegukanye igikombe cya shampiyona cy'umwaka ushize, izasohokera Kenya mu irushanwa rya CAF Champions League.


Robertinho yagizwe umutoza mushya wa Gormahia

Robertinho yatoje Rayon Sports ayigeza muri 1/4 cya CAF Confederations Cup 2018






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND