Ykee Benda yanenze abagabo bagabana fagitire n’abagore

Imyidagaduro - 2026-11-18 11:47
Share:

Umwanditsi:

Ykee Benda yanenze abagabo bagabana fagitire n’abagore

Umuhanzi Ykee Benda wo muri Uganda yavuze ko atemeranya n’imyumvire y’uko umugabo n’umugore bagomba kugabana amafaranga akoreshwa mu rugo ku rugero rungana, ashimangira ko umugabo ari we ukwiye gufata iya mbere mu kwishyura ibikenerwa mu rugo.

Uyu muhanzi yabitangaje ubwo yari mu kiganiro cyanyuraga kuri TikTok Live, aho yagaragaje ko adashyigikiye ko umugabo n’umugore bishyura fagitire z’urugo ku rugero rwa 50 kuri 50, cyane cyane iyo ari amafaranga ajyanye n’ibikenerwa by’ingenzi mu muryango.

Ykee Benda yavuze ko we ahitamo kwikorera inshingano zo gutunga urugo no kwishyura ibikenerwa, ashingiye ku myumvire ye y’uko umugabo agomba kugira uruhare rukomeye mu gutunga umuryango.

Yasobanuye ko kwemera ko umugore agira uruhare rungana n’urw’umugabo mu kwishyura ibikenerwa by’urugo bishobora gutuma inshingano zisanzwe zitezwe ku mugabo zihinduka buhoro buhoro.

Yagize ati: “Iyo ubyemeye, uba utangiye kubaka akamenyero ko gutuma umugore wawe aba nk’umugabo mu rugo rwawe kandi ari wowe mugabo. Ibyo narabyanze, buri gihe nshaka uko nabikemura.”

Yakomeje avuga ko umugabo adakwiye kureka inshingano zo kwishyura ibikenerwa mu rugo, kabone n’iyo umugore yaba afite ubushobozi bwo kubyishyura.

Ykee Benda yanagiriye inama abagabo yo kutemerera abagore babo kubishyurira fagitire z’urugo, avuga ko bishobora gutuma umugore atakaza ya myumvire yo kumva ko akeneye umugabo umuba hafi kandi akamufasha.

Yagize ati: “Naramuka agusabye kwishyura fagitire, jya umubwira ko utabishobora. Si ukubera ubwibone, ahubwo ni ukugira ngo akomeze kumva ko agukeneye nk’umugabo.”

Ibi bitekerezo bya Ykee Benda byagarutse ku biganiro bikunze kuvugisha benshi ku nshingano z’abagabo n’abagore mu mibanire, cyane cyane ku bijyanye no gucunga umutungo no kwishyura ibikenerwa mu rugo.

Ykee Benda yanenze abagabo bagabana fagitire n’abagore


Ibitekerezo (0)

    Inkuru nyamukuru

    Loading...
    Loading...
    Loading...
    Loading...

    Inkuru bijyanye

    Loading...
    Loading...
    Loading...
    Loading...
    Loading...
    Loading...
    Loading...
    Loading...