Umuvugizi wa RIB, Dr. Murangira B. Thierry, yabwiye InyaRwanda ko uyu muhanzi yafashwe tariki ya 16 Gicurasi 2026 nyuma y’igihe ashakishwa n’inzego z’ubugenzacyaha.
Ati: “Arakekwaho ibyaha bitandukanye birimo gukubita no gukomeretsa ku bushake, gukoresha ibikangisho, kunywa ibiyobyabwenge n’ibindi.”
Dr. Murangira avuga ko Yampano akekwaho kuba yarakoze ibi byaha mu bihe bitandukanye.
Nyuma yo kumenya ko hari ibirego bimurega, yaratorotse ndetse arihisha, ariko aza kubona ko nta yandi mahitamo afite maze yitaba ubugenzacyaha.
Kugeza ubu, afungiye kuri Sitasiyo ya RIB ya Kicukiro mu gihe iperereza rikomeje, ndetse dosiye ye iri gutunganywa kugira ngo ishyikirizwe Ubushinjacyaha.
Ku rundi ruhande, hari amakuru amaze igihe avugwa ko uyu muhanzi yaba yaragiye ahohotera umugore bivugwa ko bakundanaga uzwi nka Vava.
Uyu mukobwa aherutse gutangaza ko Yampano yamukubise, akamuruma izuru ndetse akanamutera ubwoba amubwira ko ashobora kuzamuhitana aramutse avuze ibyabaye hagati yabo.
Vava yavuze kandi ko ikibazo cyabo cyafashe indi ntera tariki ya 24 Werurwe 2026, ubwo yari kumwe na Yampano mu modoka bagiye muri Sauna.
Ngo yamusabye guhagarika gukoresha telefone ari gutwara imodoka, ibintu byarakaje uyu muhanzi kugeza ubwo amutegetse gusohoka mu modoka hagati mu muhanda.
Nyuma yo kuva mu modoka no gufata moto, yavuze ko Yampano yabakurikiye asa n’ugiye kumusubiza mu modoka, ariko ngo yihutishije imodoka arabatwara, ibintu yavuze ko byamushyize mu kaga ndetse bikamukomeretsa.
RIB yatangaje ko yataye muri yombi Yampano, ku wa 16 Gicurasi 2026