Imibare yashyizwe hanze n'urubuga rwa TickPick, rumenyerewe mu bucuruzi bw'amatike, igaragaza ko nta kindi gikorwa cya siporo cyigeze kigira amatike ahenze nk'ay'uyu mukino muri Amerika.
Itike ihendutse kurusha izindi yo kwinjira muri MetLife Stadium iri kugura Amadolari 6,943 (arenga Miliyoni 9 Frw), nubwo mbere y'uko Argentine isezerera u Bwongereza muri 1/2, yari iri ku giciro cya 7,200$.
Ni mu gihe impuzandengo y'igiciro cy'amatike amaze kugurwa n'abafana igeze kuri 11,327$, ibintu TickPick yavuze ko ari bwo bwa mbere bibayeho mu mateka y'imikino yabereye muri Amerika.
Mu matike amaze kugurwa ahenze kurusha ayandi, harimo abiri yo mu gice cya Section 115A muri MetLife Stadium yaguzwe 28,479$ buri imwe, bivuze ko uwayaguze yatanze 56,958$ (asaga Miliyoni 75 Frw) ku matike abiri gusa.
Uyu mukino wa nyuma wa Argentine na Espagne wahise ushyirwa ku mwanya wa mbere mu mikino yagurishije amatike ahenze kurusha indi yose yabereye muri Amerika.
Umukino wo guhatanira umwanya wa gatatu nawo urimo kugurwa amafaranga menshi. Nubwo utitabiriwe nk'uwa nyuma, umukino uzahuza u Bufaransa n'u Bwongereza mu guhatanira umwanya wa gatatu nawo uri kugurishwa amafaranga menshi.
Itike ihendutse yo kuwureba iri hafi 900$, gusa ibiciro byagabanutseho hafi 300$ nyuma y'uko u Bwongereza butsinzwe na Argentine muri 1/2.
Muri rusange, Igikombe cy'Isi cya 2026 cyabereye muri Amerika, Canada na Mexique cyamaze kwinjira mu mateka nk'irushanwa rya FIFA ryagurishijwemo amatike ahenze kurusha ayandi kuva iri rushanwa ryatangira mu myaka 96 ishize.
Mu ntangiriro z'iri rushanwa, impuzandengo y'igiciro cy'itike yari 1,622$, iza kuzamuka igera kuri 4,162$ muri 1/2 cy'irangiza.
Gusa hari n'imikino imwe n'imwe ibiciro byayo byigeze kugabanuka, nk'umukino wa 1/4 wahuje Espagne n'u Bubiligi, nyuma y'uko amakipe yombi asezereye Leta Zunze Ubumwe za Amerika na Portugal ya Cristiano Ronaldo, ibintu byatumye amatike agabanukaho hafi 60% mbere y'uwo mukino.