Abamuhagarariye batangaje
inkuru y’urupfu rwe mu magambo agaragaza agahinda, bamwibukiraho kuba yari
umukinnyi wa filime, umugiraneza ndetse n’umuvugizi uharanira uburenganzira
bw’abantu bafite ubumuga.
RJ Mitte yamenyekanye cyane kubera uruhare yagize muri Breaking Bad, aho yakinnye yitwa Walter “Flynn” White Jr., umuhungu wa Walter White, wari icyamamare muri iyi filime. Yagaragaye mu bice 56 byayo.
Uyu mukinnyi yari afite
ubumuga buzwi nka cerebral palsy, bugira ingaruka ku mikorere y’ubwonko
n’imigendekere y’imikaya. Yifashishije ubunararibonye bwe mu buzima kugira ngo
agaragaze neza imbogamizi abantu bafite ubu bumuga bahura na zo, anaharanira ko
bahabwa amahirwe angana mu ruganda rwa sinema.
Abamuhagarariye bavuze
ko, uretse gushimisha abantu binyuze mu buhanzi bwe, yanabaye ambasaderi
w’imiryango irimo United Cerebral Palsy na Shriners Children’s, ikora ibikorwa
bifasha abantu bafite ubumuga n’abana bakeneye ubuvuzi.
TMZ yatangaje ko
umuyobozi wo mu nzego z’ubuyobozi z’intara imwe yo muri Leta ya Texas yemeje ko
Mitte yapfuye ku wa Mbere. Icyo gitangazamakuru cyongeyeho ko amakuru yavugaga
ko yaba yiyahuye, ariko ko iperereza ku rupfu rwe ryari rigikomeje.
Mu ntangiriro z’uku
kwezi, Mitte yari yagaragaye ari kumwe na Luis Moncada bakinanye muri Breaking
Bad. Amafoto n’amashusho bashyize ku mbuga nkoranyambaga yabagaragazaga
bishimye.
Uretse Breaking Bad,
RJ Mitte yagaragaye no mu zindi filime zirimo The Oak Room, The
Recall na The Guardians of Justice (Will Save You!).
Mu buzima bwe bwite, yari
yarasabwe n’umukunzi we Kennedy Suarez. Yamwambitse impeta amusaba ko
bashyingiranwa mu 2025, nyuma y’imyaka bari bamaze bakundana.
Mu 2019, Mitte yari
yaraganiriye n’umunyamakuru wa TMZ ku bijyanye n’uko abakinnyi bafite ubumuga
bakwiye guhabwa umwanya munini muri sinema ya Hollywood.
Urupfu rwe rusize icyuho
mu ruganda rwa sinema, cyane cyane mu bikorwa byo guharanira ko abantu bafite
ubumuga bahabwa amahirwe angana mu myidagaduro no mu zindi nzego z’ubuzima.