Uganda: Bushali mu bahanzi barenga 200 bazasusurutsa iserukiramuco ‘Nyege Nyege’

Imyidagaduro - 2026-11-14 13:39
Share:

Umwanditsi:

Uganda: Bushali mu bahanzi barenga 200 bazasusurutsa iserukiramuco ‘Nyege Nyege’

Umuraperi w’Umunyarwanda Bushali ari mu bahanzi 200 bemejwe ko bazaririmba mu iserukiramuco mpuzamahanga rya Nyege Nyege Festival, riteganyijwe kubera muri Uganda kuva ku wa 19 kugeza ku wa 22 Ugushyingo 2026.

Uyu muhanzi ari mu rutonde rw’abahanzi n’aba-DJ bashyizwe hanze n’abategura iri serukiramuco rizaba ribaye ku nshuro ya 11, rikazabera muri Adrift Overland Camp, ahitwa Kalagala Falls ku ruzi rwa Nil, mu gace ka Jinja muri Uganda.

Bushali azahurira ku rubyiniro n’abahanzi batandukanye baturutse muri Afurika no mu bindi bice by’Isi, barimo DJ Travella, De Schuurman, Azzi On The Beat, Ecko Bazz, Authentically Plastic, Kikelomo, Jay Mitta, Kampire, King Saha, Arsenal Mikebe na Sheila Gashumba uzwi nka Lil Stunner.

Mu bandi bazitabira iri serukiramuco harimo MC Yallah, DJ Diaki, DJ Enowiz, DJ Zion, Jackie Chandiru, Etania Life of the Party, Talia Goddess, The Mith na Faizal Mostrixx.

Aba bahanzi bazasusurutsa abazitabira iri serukiramuco mu gihe cy’iminsi ine.

Nyege Nyege Festival y’uyu mwaka yahawe insanganyamatsiko ya ‘The Wakaliwood Edition’, igitekerezo kigamije guhuza umuziki n’ubugeni bwo gukora filime.

Abategura iri serukiramuco batangaje ko ahazabera ibitaramo hazahindurwa nk’ahantu hafatirwa amashusho ya filime, ku buryo abazaryitabira n’abahanzi bazaba bafite amahirwe yo kugaragara mu mashusho y’ikorwa rya filime nshya ya Wakaliwood.

Wakaliwood ni izina ryahawe uruganda rwa sinema yigenga rwo muri Uganda, rukorera mu gace ka Wakaliga muri Kampala, rukaba ruzwi cyane kuri filime z'ibikorwa by'intambara n'ibikorwa by'ubutwari, zikozwe mu buryo bwihariye kandi bukoresha ubushobozi buciriritse.

Iyi mikoranire izatuma Nyege Nyege itaba gusa ahantu ho kwishimira umuziki, ahubwo inahinduke ahantu hahurira sinema, umuco, imyidagaduro n'ubugeni.

Mu gutangiza iri serukiramuco, hateganyijwe igikorwa cyihariye kizakorwa n'itsinda X.A.A Kadodi Imbalu Heritage Troup, rizafasha abitabiriye kwinjira mu birori binyuze mu muco n'imbyino gakondo.

Ku musozo waryo na bwo hateganyijwe ikindi gikorwa cyihariye, ariko abategura iri serukiramuco ntibaragaragaza abazagikora, bakaba bavuze ko kizaba ari igitangaza.

Abategura Nyege Nyege banagaragaje ko hazaba hari kajugujugu, mu bindi bizatuma iri serukiramuco rirushaho kugira umwihariko.

Bushali yongeye kugaragara mu iserukiramuco rimaze kumenyekana ku rwego mpuzamahanga

Kuba Bushali ari mu bazitabira Nyege Nyege ya 2026 bikomeza kugaragaza uruhare rw'abahanzi nyarwanda mu bikorwa by'umuziki n'imyidagaduro bihuriza hamwe impano ziturutse mu bihugu bitandukanye.

Uyu muraperi kandi si ubwa mbere agaragaye mu rutonde rw’abazitabira iri serukiramuco, kuko yanitabiriye iserukiramuco rya Nyege Nyege ryabaye mu 2025, ubwo ryizihizaga imyaka 10 rimaze ritangiye.

Mu bahanzi bakomeye bari mu bitaramo by’umwaka ushize harimo Skrillex, Flowdan, Kampire, DJ Travella, DJ Diaki na Arsenal Mikebe.

Nyege Nyege yatangiye mu 2015, ikura buhoro buhoro iba rimwe mu maserukiramuco akomeye ahuriza hamwe umuziki w'Abanyafurika n'uw'ibindi bice by'Isi. Mu myaka imaze ibayeho, yagiye iba urubuga ruhuza abahanzi, aba-DJ, abakora sinema n'abandi bafite uruhare mu guteza imbere ubuhanzi.

Mu 2026, iri serukiramuco ryaguriye ibikorwa byaryo no ku mugabane w’u Burayi, aho ryateguye igikorwa cyiswe ‘MIRROR WORLD’ cyabereye i Buruseli mu Bubiligi, ku wa 25 n’uwa 26 Nzeri 2026. Icyo gikorwa cyitabiriwe n’abahanzi barimo Kampire, DJ Travella, De Schuurman, D’Leesa, Laryssa Kim na Jay Mitta.

Nyege Nyege ya 2026 izaba kuva ku wa 19 kugeza ku wa 22 Ugushyingo, muri Adrift Overland Camp, Kalagala Falls muri Uganda, aho biteganyijwe ko izahuza abahanzi 200 ku marubyiniro arindwi mu gihe cy'iminsi ine.

Bushali ari mu bahanzi 200 bemejwe ko bazaririmba mu iserukiramuco mpuzamahanga rya Nyege Nyege rizabera muri Uganda kuva ku wa 19 kugeza ku wa 22 Ugushyingo 2026 

Nyege Nyege igiye kuba ku nshuro ya 11 ifite umwihariko wa Wakaliwood, aho umuziki, umuco na sinema bizahurizwa hamwe kuva ku wa 19 kugeza ku wa 22 Ugushyingo


Ibitekerezo (0)

    Inkuru nyamukuru

    Loading...
    Loading...
    Loading...
    Loading...

    Inkuru bijyanye

    Loading...
    Loading...
    Loading...
    Loading...
    Loading...
    Loading...
    Loading...
    Loading...