The Ben yegukanye igihembo muri Uganda, Bruce Melodie na Element ntibahirwa

Imyidagaduro - 2026-11-14 09:37
Share:

Umwanditsi:

The Ben yegukanye igihembo muri Uganda, Bruce Melodie na Element ntibahirwa

Umuhanzi w’Umunyarwanda The Ben yegukanye igihembo cy’umuhanzi mwiza muri Afurika y’Iburasirazuba (East Africa Best Artist) mu bihembo bya HiPipo Music Awards 2026 byatangiwe i Kampala muri Uganda, atsinda ibyamamare birimo Diamond Platnumz, Element EleéeH na Bien-Aimé Baraza.

Iki gihembo The Ben agitwaye nyuma yo guhatana n’abahanzi bakomeye bo mu karere, bikaba intambwe ikomeye mu rugendo rwe rwo gukomeza kumenyekanisha umuziki nyarwanda ku rwego mpuzamahanga.

Ibi bihembo byatanzwe ku wa 13 Ugushyingo 2026, mu birori byabereye muri Kampala Serena Hotel, byari bibaye ku nshuro ya 15. Byahuje abahanzi, abakora mu ruganda rw’imyidagaduro n’abandi batandukanye bagize uruhare mu iterambere ry’umuziki muri Uganda, Afurika y’Iburasirazuba no ku mugabane wa Afurika muri rusange.

The Ben yegukanye iki gihembo ahatanye n’abahanzi 12 bo muri Afurika y’Iburasirazuba, barimo Diamond Platnumz wo muri Tanzania, Bien wo muri Kenya, Jose Chameleone wo muri Uganda na Element EleéeH wo mu Rwanda.

Mu bandi bahanzi bari muri iki cyiciro harimo Ali Kiba, Harmonize, Joshua Baraka, John Frog, Natacha, Sheebah na Silver X.

Kwegukana iki gihembo kwa The Ben byatumye u Rwanda rugira umuhanzi wegukanye kimwe mu bihembo bikomeye by’iri rushanwa mu cyiciro cyahurizaga amazina akomeye mu muziki wo muri Afurika y’Iburasirazuba.

The Ben yari ahatanye mu byiciro bitatu, yegukana kimwe

The Ben yari umwe mu bahanzi nyarwanda bari bafite ibyiciro byinshi muri HiPipo Music Awards 2026, kuko yari ahatanye mu byiciro bitatu bitandukanye.

Icya mbere ni icy’umuhanzi mwiza muri Afurika y’Iburasirazuba (East Africa Best Artist), ari na cyo yegukanye.

Icya kabiri ni icy’indirimbo nziza muri Afurika y’Iburasirazuba (East Africa Best Act/Song), aho yari ahagarariwe n’indirimbo ye ‘Inshallah’. Iyi ndirimbo yari ihanganye na ‘Pom Pom’ ya Bruce Melodie, ‘Ayayaah’ ya Element EleéeH, ‘Happy’ ya Diamond Platnumz n’izindi.

Mu cyiciro cya gatatu cya Africa Number One, The Ben yari ahatanye n’abahanzi bakomeye ku mugabane wa Afurika barimo Burna Boy, Asake, Tyla, Ayra Starr, Diamond Platnumz, Joshua Baraka na Jose Chameleone.

Gusa iki gihembo cyegukanywe na Joshua Baraka wo muri Uganda, umwe mu bahanzi bakomeje kwigaragaza cyane mu muziki wa Afurika.

Element EleéeH na Bruce Melodie ntibahiriwe

U Rwanda rwari ruhagarariwe n’abandi bahanzi babiri barimo Element EleéeH na Bruce Melodie, na bo bari bafite amahirwe yo kwegukana ibihembo.

Element EleéeH, amazina ye nyakuri akaba ari Mugisha Robinson, yari ahatanye mu cyiciro cya East Africa Best Artist, aho yari ahanganye na The Ben, Diamond Platnumz, Bien, Jose Chameleone, Ali Kiba n’abandi.

Ntabwo yahiriwe n’iki cyiciro kuko igihembo cyegukanywe na The Ben.

Element kandi yari ahatanye mu cyiciro cya Africa Best Act/Song abikesha indirimbo ‘Ayayaah’ yakoranye na Bien na Joshua Baraka.

Ku rundi ruhande, Bruce Melodie yari ahatanye mu cyiciro cya Africa Best Act/Song abikesha indirimbo ‘Pom Pom’ yakoranye na Diamond Platnumz wo muri Tanzania na Brown Joel.

Icyo gihembo cyegukanywe n’indirimbo ‘This Time’ ya Joshua Baraka na JAE5, bituma abahanzi nyarwanda bari bahatanye muri iki cyiciro batagira n’umwe ucyegukana.

Ibi byatumye The Ben aba we wenyine mu bahanzi batatu bahagarariye u Rwanda wegukanye igihembo muri iri rushanwa mu byiciro byavuzwe.

Umuhanzi Joshua Baraka wo muri Uganda ni umwe mu bagize ijoro ryiza muri ibi bihembo, kuko yegukanye igihembo cya Africa Number One, ahigitse ibyamamare bitandukanye byo ku mugabane wa Afurika.

Yegukanye kandi igihembo cya Artist of the Year, gihabwa umuhanzi witwaye neza kurusha abandi mu mwaka.

Mu bandi begukanye ibihembo bikomeye harimo King Saha wegukanye Best Male Artist, Karole Kasita wegukanye Best Female Artist na The Ganda Boys bahawe African Heritage Award.

Abandi begukanye ibihembo barimo:

- Best Regional Song: Tinah Baiby – ‘Naawo’.

- Breakthrough Artist: Lutty Neika.

- Most Viral Song: Sqoop Larma – ‘Temutuloga’.

- Song of the Year: Kalifah AgaNaga, Eddy Kenzo, FirebbyUg, Lil Pazo, Radio na Weasel – ‘Nassanga Rmx’.

- Video of the Year: David K. Murungi – ‘Esh Okankunda’.

- Africa Best Act/Song: Joshua Baraka na JAE5 – ‘This Time’.

- Best New Media/Digital Creator in Music: Talk and Talk Show.

- Best Gospel/Inspirational Act: Damasco Ssesanga – ‘Gumponya’.

- Best Diaspora Act: George Willdive.

Mu bihembo byihariye, Abitex (Abbey Musinguzi) yahawe igihembo cya Lifetime Achievement Award 2026, mu rwego rwo gushimira uruhare yagize mu ruganda rw’imyidagaduro.

HiPipo Music Awards imaze imyaka 15

HiPipo Music Awards ni ibihembo ngarukamwaka bitegurwa na HiPipo muri Uganda, bigamije kumenyekanisha no gushimira abahanzi, indirimbo n’abandi bafite uruhare mu iterambere ry’umuziki.

Ibi bihembo byatangiye mu 2013, bikaba bimaze kuba urubuga ruhuza abahanzi bo muri Uganda, Afurika y’Iburasirazuba n’ahandi ku mugabane wa Afurika.

Ibihembo by’uyu mwaka byari ku nshuro ya 15, bifite ibyiciro 15 byibandaga ku bahanzi bakizamuka, abamaze kumenyekana, indirimbo, amashusho y’indirimbo ndetse n’abakora ibijyanye n’ikoranabuhanga mu muziki.

Kwegukana igihembo kwa The Ben ni indi ntambwe ku muziki nyarwanda, cyane ko uyu muhanzi yari ahatanye n’amazina amaze kubaka izina rikomeye muri Afurika y’Iburasirazuba.

 

The Ben yegukanye igihembo cy’umuhanzi mwiza muri Afurika y’Iburasirazuba muri HiPipo Music Awards 2026, ahigitse ibyamamare birimo Diamond Platnumz, Bien, Element EleéeH na Jose Chameleone


Ibitekerezo (0)

    Inkuru nyamukuru

    Loading...
    Loading...
    Loading...
    Loading...

    Inkuru bijyanye

    Loading...
    Loading...
    Loading...
    Loading...
    Loading...
    Loading...
    Loading...
    Loading...