Texas: Abademokarate batsinze amatora nyuma y’imyaka 32 batsindwa

Hanze - 2026-11-04 09:30
Share:
Texas: Abademokarate batsinze amatora nyuma y’imyaka 32 batsindwa

Umudemokarate James Talarico yatsinze amatora yo kujya muri Sena ya Leta Zunze Ubumwe za Amerika ahagarariye Leta ya Texas, atsinda Ken Paxton wo mu Ishyaka ry’Aba-Républicains wari ushyigikiwe na Perezida Donald Trump.

Intsinzi ya Talarico, wari usanzwe ari umudepite mu Nteko Ishinga Amategeko ya Texas, yashyize iherezo ku myaka 32 Ishyaka ry’Aba-Démocrates rimaze ridatsinda amatora ku rwego rwa Leta muri Texas. Ni intambwe ikomeye kuri iri shyaka mu rugamba rwo gushaka ubwiganze muri Sena.

Texas ni imwe muri Leta zari zimaze igihe ziganjemo Aba-Républicains. Mu matora ya Perezida yabaye mu 2024, Donald Trump yari yayitsinzemo ku majwi aruta ay’uwo bari bahanganyeho amanota 14 ku ijana.

Talarico w’imyaka ine amaze mu Nteko Ishinga Amategeko ya Texas, yatsinze Paxton wari usanzwe ari umushinjacyaha mukuru wa Texas. Paxton yagiye avugwaho ibibazo by’amategeko, birimo icyemezo cyo kumweguza cyafashwe mu 2023 ndetse n’urubanza rumushinja uburiganya mu bijyanye n’imari n’imigabane.

Mbere yo kugera ku ntsinzi, Talarico yabanje gutsinda abandi bakandida bahataniraga guhagararira Abademokarate, barimo Jasmine Crockett na Colin Allred, wari warabanje guhatanira uwo mwanya mu 2024 ariko nyuma akivana muri iryo rushanwa kugira ngo yongere yiyamamarize kujya mu Nteko Ishinga Amategeko.

Iri rushanwa ryabaye rimwe mu matora ahenze cyane muri uyu mwaka, aho Aba-Républicains bakoresheje asaga miliyoni 316 z’amadolari mu bikorwa byo kugerageza kugumana uwo mwanya.

Ken Paxton yari yungukiye ku nkunga ya Donald Trump, nyuma y’uko Perezida Trump ashyigikiye ko ahagararira ishyaka rye, bigatuma Senateri John Cornyn wari usanzwe afite uwo mwanya atakaza amahirwe mu matora y'imbere mu ishyaka.

Mbere y’amatora yo ku wa 3 Ugushyingo 2026, Aba-Républicains bari bafite imyanya 53 muri Sena, mu gihe Abademokarate bari bafite 47. Kugira ngo Abademokarate bagire ubwiganze, basabwaga kongera imyanya nibura ine.

Intsinzi ya Talarico i Texas yabaye imwe mu mpinduka zikomeye muri aya matora yo hagati mu gihembwe cya manda ya Perezida, azwi nka Midterm Elections, aho Abanyamerika batora ababahagararira muri Kongere n'izindi nzego za Leta.

Umudemokarate James Talarico yatsinze amatora yo kujya muri Sena ya Leta Zunze Ubumwe za Amerika ahagarariye Leta ya Texas, atsinda Ken Paxton wo mu Ishyaka ry’Aba-Républicains wari ushyigikiwe na Perezida Donald Trump


Ibitekerezo (0)

    Inkuru nyamukuru

    Loading...
    Loading...
    Loading...
    Loading...

    Inkuru bijyanye

    Loading...
    Loading...
    Loading...
    Loading...
    Loading...
    Loading...
    Loading...
    Loading...