Uyu muhanzi ari mu bahagarariye u Rwanda muri ibi bikorwa
byahurije hamwe ibihugu bitandukanye bifite Igifaransa nk’ururimi bisangiye,
aho buri gihugu gihabwa umwanya wo kumurika umuco wacyo binyuze mu bihangano,
imbyino, imiziki n’ibindi bikorwa by’ubuhanzi.
Ruti Joel yasusurukije abari bitabiriye ibi birori binyuze
mu bihangano bye byubakiye ku njyana gakondo, biba umwanya wo kumenyekanisha
umuziki nyarwanda no kugaragaza umwihariko w’ubuhanzi bw’u Rwanda imbere
y’abaturutse mu bice bitandukanye by’Isi.
Uretse Ruti Joel, u Rwanda rwahagarariwe kandi n’Itorero
ry’Igihugu Urukerereza, ryifatanyije n’itorero ry’Igihugu rya Cambodia mu
bikorwa byabereye ahazwi nka Village de la Francophonie, i Wat Botum Vatey Park
mu murwa mukuru Phnom Penh.
Iri torero ryagaragaje umuco nyarwanda binyuze mu mbyino
n’imbyino gakondo, mu gihe ubufatanye n’itorero rya Cambodia bwabaye umwanya wo
guhuza imico y’ibihugu byombi.
Village de la Francophonie yatangiye ku wa 13 Ugushyingo
2026, ikazageza ku wa 17 Ugushyingo 2026. Ni igikorwa cyateguwe mu rwego rwo
kwizihiza inama ya 20 ya OIF, kikaba kigamije guhuriza hamwe imico, indimi
n’ubuhanzi by’ibihugu bigize uyu muryango.
Iki gikorwa kirimo ibikorwa bitandukanye birimo imurikagurisha,
inama, ibitaramo, kumurika umuco n’ibiribwa gakondo by’ibihugu bitandukanye.
Biteganyijwe ko kizitabirwa n’ibihugu n’inzego zitandukanye, buri kimwe
kikabona umwanya wo kwerekana umwihariko wacyo.
Iri serukiramuco ryafunguwe ku mugaragaro ku wa 13
Ugushyingo 2026, mu muhango witabiriwe na Minisitiri w’Intebe wa Cambodia, Hun
Manet, n’Umunyamabanga Mukuru wa OIF, Louise Mushikiwabo.
Inama ya 20 ya OIF ubwayo iteganyijwe kubera i Phnom Penh ku
wa 15 n’uwa 16 Ugushyingo 2026, ikazahuza abayobozi b’ibihugu na za Guverinoma
bikoresha Igifaransa, bakaganira ku bufatanye mpuzamahanga, amahoro, iterambere
rirambye n’ibindi bibazo bireba Isi.
Iyi nama ifite insanganyamatsiko igira iti: “Reinvest in
Peace for Shared Prosperity and Lasting Stability”, bisobanuye kongera imbaraga
mu kubaka amahoro agamije iterambere n’umutekano birambye bisangiwe.
Kuba abahanzi n’itorero nyarwanda bitabira ibi bikorwa ni
andi mahirwe yo kumenyekanisha u Rwanda binyuze mu muco, ubuhanzi n’impano
z’abarutuye, ndetse no kurushaho guteza imbere ubusabane hagati y’ibihugu.
Ruti Joel yasusurukije abitabiriye ibikorwa by’inama ya OIF
iri kubera i Phnom Penh muri Cambodia, aha yari kumwe n’Umunyamabanga wa Leta
muri Minisiteri y'Urubyiruko n'Iterambere ry'Ubuhanzi, Umutoni Sandrine

