OMS yatangaje ko kugeza mu mpera za 2025, abarenga miliyoni 32 banduye Virusi itera SIDA bari bamaze guhabwa imiti igabanya ubukana bwayo. Kuva mu 2010, ubwandu bushya bwa HIV bwagabanutseho 42%, mu gihe impfu ziterwa na SIDA zagabanutseho 57%. Gusa, abantu miliyoni 9 baracyabura ubuvuzi bukenewe, kandi ubwandu bushya bukomeje kwiyongera mu bice bimwe by'isi.
Raporo kandi igaragaza ko ubwandu bushya bwa Hepatite B bwagabanutseho 32% kuva mu 2015, ndetse impfu ziterwa na Hepatite C zagabanutseho 12%. Nubwo bimeze bityo, Hepatite iracyahitana abantu bagera kuri miliyoni 1.3 buri mwaka ku Isi.
Umuyobozi Mukuru wa OMS, Dr. Tedros Adhanom Ghebreyesus, yavuze ati: "Iyi raporo igaragaza ko iyo ibihugu bishoye imari mu buzima, mu bumenyi no mu baturage, hari impinduka zigerwaho. Ariko kandi yerekana ko izo ntambwe zishobora gusubira inyuma bitewe no kugabanuka kw'inkunga, ibibazo by'ubutabazi n'ubusumbane bukomeje kugaragara."
OMS yasabye ibihugu gukomeza gushimangira ubuvuzi bw'ibanze, kongera uburyo bwo gusuzuma no kuvura abaturage, gukoresha ikoranabuhanga mu rwego rw'ubuzima no gukuraho inzitizi zituma abantu benshi batabona serivisi z'ubuzima, hagamijwe kugera ku ntego yo kurandura izi ndwara nk'ikibazo gikomeye cy'ubuzima rusange bitarenze umwaka wa 2030.