Iri tangazo ryashyizwe ahagaragara ku wa 2 Nyakanga 2026 n'Umuyobozi Mukuru wa OMS, Dr Tedros Adhanom Ghebreyesus, wasobanuye ko kuva ku wa 25 Gicurasi 2026 nta muntu mushya wari warongeye kugaragaraho ubwandu bwa Hantavirus, bituma iki cyorezo gifatwa nk'icyarangiye.
Ati: "Uyu munsi, umuntu wa nyuma wari warahuye n'uwanduye Hantavirus mu bwato MV Hondius yarangije igihe cye cyo gukurikiranwa, apimwa asanga nta virusi afite ndetse asubira mu rugo. Kubera ko nta bundi bwandu bushya bwongeye kugaragara kuva ku wa 25 Gicurasi, OMS yemeje ko iki cyorezo cyarangiye."
Icyorezo cyatangiriye mu bwato MV Hondius, butwara ba mukerarugendo mu ngendo zo gusura uturere twa Antaragitika n'ibirwa bya kure byo mu nyanja ya Atlantika y'Amajyepfo.
Uru rugendo rwatangiye ku wa 1 Mata 2026, ubwo ubwato bwavaga mu mujyi wa Ushuaia muri Argentine, bunyuraga ahantu hatandukanye harimo ibirwa bya Tristan da Cunha, mbere yo kwerekeza ku birwa bya Canary muri Espagne.
Nyuma y'uko hagaragaye abanduye Hantavirus, abagenzi basigaye bavanywe ku bwato bagezwa ahantu hizewe kugira ngo bakurikiranwe, mu gihe ubwato bwakomereje i Rotterdam mu Buholandi aho bwakorewe isuku n'isukurabikoresho (disinfection) mu buryo bwimbitse mbere yo kongera gusubizwa mu kazi.
OMS yatangaje ko iki cyorezo cyafashe abarwayi 13, barimo 12 bemejwe n'ibipimo ndetse n'umuntu umwe ukekwaho kuba yaranduye, mu gihe abantu batatu bahitanywe n'iyi ndwara.
Nubwo umubare w'abanduye utari munini, iki cyorezo cyahagurukije inzego z'ubuzima ku rwego mpuzamahanga kubera ko cyabereye ahantu abantu baturukaga mu bihugu byinshi bitandukanye bahuriraga, bikongera ibyago byo gukwirakwira kw'iyi ndwara.
Mu rwego rwo gukumira ubwandu, inzego z'ubuzima zakurikiranye abantu barenga 650 bari barahuye n'abanduye, bakomoka mu bihugu n'uturere 33. Iri genzura ryamaze iminsi 66, ari na ryo ryatumye OMS ibona gihamya ko nta bwandu bushya bwongeye kuboneka.
Hantavirus ni virusi idasanzwe ikunze gukwirakwizwa n'imbeba zo mu gasozi n'indi nyamaswa zifitanye isano na zo. Akenshi umuntu ayandura iyo ahumetse umukungugu cyangwa akoze ku mwanda, inkari cyangwa amacandwe y'izo nyamaswa.
Akenshi, Hantavirus ntabwo yandura hagati y'abantu. Icyakora, ubwoko bwa Andes virus, ari bwo bwagaragaye kuri MV Hondius, ni bwo bwonyine buzwi kugeza ubu bushobora kwandura hagati y’abantu, umuntu akanduza undi. Ni yo mpamvu OMS n'inzego z'ubuzima zahise zifata iki cyorezo nk'igikeneye kwitabwaho byihuse.
Ibimenyetso by'iyi ndwara bishobora gutangira nk'ibya grippe, birimo umuriro, kubabara umutwe, kubabara imikaya no kunanirwa, ariko ku barwayi bamwe ishobora gukomera ikangiza ibihaha cyangwa impyiko, bikaba byashyira ubuzima mu kaga.
Kugeza ubu, nta rukingo rwemewe cyangwa umuti wihariye uvura Hantavirus uraboneka. Abaganga bita ku barwayi bagamije kugabanya ibimenyetso no gufasha umubiri gukomeza gukora neza kugeza umurwayi akize.
Mu ntangiriro z'iperereza, byakekwaga ko umwe mu bagenzi yari yaranduriye Hantavirus mu gace kamwe ka Argentine kazwiho kuba iyi ndwara ihaboneka.
Nyamara nyuma y'iperereza ryakozwe n'inzego z'ubuzima muri Argentine no mu yindi mijyi, ntihabonetse imbeba zifite iyi virusi mu gace kakekwaga, bituma inkomoko nyayo y'ubwandu ikomeza gukorwaho ubushakashatsi.
Nubwo OMS yatangaje ko iki cyorezo kirangiye, yavuze ko urugamba rwo kumenya neza Hantavirus rugikomeje.
Iri shami ryatangaje ko riri gukorana n'ibihugu 21 mu bushakashatsi bugamije gusobanukirwa neza uko iyi virus yitwara mu mubiri w'umuntu, uko ikwirakwira ndetse n'uburyo hashyirwaho ibizamini byihuse, imiti n'inkingo bishobora gukoreshwa mu gihe kizaza.
Abashinzwe indwara z'ibyorezo muri OMS bagaragaje ko nubwo ubu bwandu butakiri ikibazo ku bwato bwa MV Hondius, Hantavirus iracyaboneka mu bice bimwe bya Amerika y'Epfo, bityo ibihugu bikaba bikwiye gukomeza gukaza ingamba zo kuyikumira no kuyikurikirana.
Icyorezo cya MV Hondius cyabaye urugero rw'uko ubufatanye bw'ibihugu byinshi, gukurikirana abahuye n'abarwayi no gufata ingamba zihuse bishobora gukumira ikwirakwira ry'indwara zishobora guteza ibibazo ku rwego mpuzamahanga.
Nubwo iki cyorezo cyarangiye, OMS ivuga ko amasomo yagikuyemo azafasha isi kurushaho kwitegura indwara zishobora kuvuka mu bihe biri imbere.